Jonas 4 - Kaxinawá Bíblia (BR)

Jonas Deuski sinatanikiaki, na hãtxarã

¹ Nínive anu hiweabu Deusũ hatu kupiamawẽ taea Jonasĩ haska betxipaiama Deuski sinatahairakĩ

² habe hãtxakĩ yuikĩ: —Uiã. Senhor Deusuũ, ẽ mae anu eki nukushũ Nínive anu mĩ ea yunua hatuwẽ nuikĩ mĩ hatu kupiama ishanaiwẽ taea eska shinaĩ ẽ hawaira Társis anu pashai ẽ hunekaĩkatsis ikimaki. Mia mĩ mekenã Deus pepa tsuabura hatuwẽ dabanã ikĩ mĩ hawaira sinataisma kupikatsi hatu banabimabiatã tsuaburawẽ nuihairakĩ mĩ shinã mĩ betsa watiru mĩ ea uĩmaii.

³ Haskawẽ taeshũ Senhor Deusuũ, ea tenãwẽ, iwanã, ẽ mia yukaii. Haskarã, peki, ẽ mawarã, ẽ ana hiweyamanunã— aka

⁴ hakia Senhor Deusũ kemakĩ yukakĩ: —Mĩ sinatai haska hãtxairã, haska pekẽ mĩ iki ikai?— aka

⁵ hanua ha maewã anua Jonas kaĩkaini bari huaikiri ka hanushũ ha maewã haska waimẽkaĩ, ishũ hanushũ uĩkatsi hi pũyã meshteshũ utati watã ha namã tsaukẽ

⁶ barĩ hau kuayamanũ heshe betsa daka Senhor Deusũ hawaira yume washũkĩ nishi benematã Jonasĩ bushka mamaki hunekĩ utawa, haska washuna Jonas hawẽ benimaya

⁷ ana penaya shena betsa Deusũ yunua hushũ nishi ewakĩ utawashina hawẽ tashu tasẽbaũkĩ keyua shanatã niri ikatsi utsia dakakẽ

⁸ bari mapekeaya bari huaikiria niwe shanabiri ikai Deusũ shũku imabirana hawẽ bushka barĩ kuahaira Jonas unãyamasi mawakatsis ikĩ yuikĩ: —Haskarã, peki, ẽ mawarã, ẽ ana hiweyamanunã— ikaya

⁹ hakia Deusũ kemakĩ yukakĩ: —Nishi ewashina ikis ma shanashuwẽ taea mĩ sinatakũkainairã, haska mĩ shinainã, pemẽ?— aka kemakĩ Jonasĩ yuikĩ: —Hawaikika, eã ẽ shinanã, peki! Hakia sinatayabi ẽ mawaii!— aka

¹⁰ hanushũ Senhor Deusũ Jonas shabakabi yuikĩ: —Miã nishi mĩ banamaki. Mĩ ewawamariki. Meshu bestitxai hukuĩ shaba bestitxai ewatã ana meshu betsatiã mawai utsishuki. Haskabiaya ha nishiwẽ mĩ nuihairaii.

¹¹ Hamẽ earã, eskawẽ ẽ nuiaii. 120.000 yura hiweabu hawẽ mekẽ yusiuri inũ hawẽ mekẽ yusmauri haratura hawa unãriabuma inũ inabu mirimahaira hayawẽ taeshũ mia binui ha maewã ewapahaira Nínive anu hiweabuwẽ eari ẽ nuihairakunikainaii— anikiaki, Deusunã.