João 9 - Kaxinawá Bíblia (BR)

Huni bekũ kaini Jesusũ bepeshnikiaki, na hãtxarã

¹ hanua sábado huĩrukũtitiã Jesusbe kaĩkaini kakĩ mae anu kenebaunibu hanu hikiti shui kesha huni bekũ kaĩni tsaushũ buanaibu pei hatu ea aki tsauwa binubaĩkĩ betxitã

² nũ hawẽ tsuma betsã Jesus yukakĩ: —Yusĩnaã, haskai na huni bekũ kaĩnimẽ? Kaĩriamakẽ tsuã Deuskiri txakabuwanimẽ? Hawẽ ibubũ animẽkaĩ? Hamebi iniraka?— aka

³ —Haskamaki. Hamebi Deuskiri txakabuwamaki. Hawẽ ibubũri txakabuwabumariki. Hakia ikis Deusũ pepawati kuxipa yura dasibibu ẽ uĩmatiruwẽ taea habiaska bekũ kaĩniki— iwanã

^4-5 —Na mai anu yurabube hiwea ẽ bĩ txashahaira keskaki, hatu unãmanikarã. Haska ẽ shaba hayawẽ taea hatũ ea yununitũ daya ashũrinãkãwẽ. Ea shaba keska ma ẽ kakẽ txakabu huaya ana tsua dayatirumaki, mexu beai keskayarã—

⁶ nuku watã maĩ kemu mitxushũ pupus watã hawẽ huni bekũ bepushkĩ

⁷ yuikĩ: —Siloé hanu ũpash uke merã habai anu mixki pukĩnibu anu ũpash tsauwa anu ka betxukitãwẽ— akarã, nukũ hãtxawẽ Siloé yuiarã, ‘Hari yunuaki’, Jesusũ hãtxa nĩkakĩ ikũwaĩ benikaini ka betxukia bepeshetã uĩbaini inũ kakẽ

⁸ hanua ha dapi hiweabu inũ habũ pei ea ikai uĩmisbu yuka irabekĩ: —Ha huni bekũ tsaushũ hatũ hatu pei ea amisrã, na hunirã, habiamẽ?— ikaibũ

⁹ betsabũ yuikĩ: —Haa, habiaki— ikeakeaibũ hanushũ betsabũri uĩkĩ yuikĩ: —Hamaki. Ha itsaki— ikaibũ ibubis huni bekũ bepesheatũ hatu yuikĩ: —Habia ẽ eaki— ikaya

¹⁰ hanushũ yukakĩ: —Haskatã mĩ ma bepesheamẽ?— akabu

¹¹ hatu yuikĩ: —Ha huni kenakĩ Jesus waibũ pupus watã ea bepushshũ: “Siloé anu betxukitãwẽ”, ea wa ka ẽ betxukia bepeshetã ẽ uĩ taewabirãshuki— hatu wa

¹² yukakĩ: —Hania ha hunirã?— akabu hatu yuikĩ: —Ẽ unãmaki. Hanira niaki— hatu wa

Huni bekũ kaĩni bepeshexina fariseubũ yukanibukiaki, na hãtxarã

^13-14 hanushũ sábado huĩrukũtitiã Jesusũ pupus watã shushawabaĩxinawẽ taeshũ fariseubu anu huni bekũ shushaxina iyushũ hatu yuiabu

¹⁵ fariseubũ yukakĩ: —Mĩ bekũnirã, haskatã mĩ ma bepeshexinamẽ?— akabu —Pupuswẽ Jesusũ ea bepusha betxukitã ẽ uĩ taewaxinaki— hatu wa

¹⁶ hatiri fariseubũ haska xinãbumawẽ taea betsabu yuinamei: —Moisés nuku yusĩni txibaĩ haki meseama sábado huĩrukuãma dayamisrã, ha huni Deus anuamaki— ikaibũ hakia betsaburi yuinamei: —Hawẽ unãmati dami atimaska akinã, huni txakabũ haska watirumaki— iki fariseubu hatũ xinã dabe wai pashkatã

¹⁷ huni shushaxina ana yukakĩ: —Mĩ beru mia shushawaxinawẽ taeshunã hakiri hawa mĩ yuiai?— akabu —Ha hunirã, Deusũ hãtxa yuishunikaki— hatu wa

¹⁸ hawẽ ibubu yukariama ha huni bekũ kaĩni ma uĩ pewaiwẽ taeshũ judeubũ ikũwãkatsi ikama henetã hanushũ hawẽ ibubu kenabu

¹⁹ beabu hanushũ judeu shanẽ ibubũ hawẽ ibu dabe hatu yukakĩ: —Narã, mĩ bakemẽ? Ikũ bekũ kaĩni mã yuimismẽ? Haskatã ma uĩmẽkaĩ?— akabu

²⁰ hawẽ ibubũ kemakĩ hatu yuikĩ: —Na hunirã, nukũ huni bakeki. Bekũ kaĩnirã, nũ unaiĩ.

²¹ Hakia haskatã ma uĩxina nũ unãmaki. Tsuãra shushawakĩ uĩmaxina nũ unãmariki. Habi yukakãwẽ, huni ewakirã, hamebi haskaxina hau matu yuinunã— hatu wa

^22-23 bebũkiri yuinamei: —Tsuãra yuikĩ: “Jesusrã, Messiaski”, ikaibu judeubu shanẽ ibubũ nĩkatã hatũ itxati hiwe anu hau ana itxayamanũbũ hatu nitxĩkatsi yubakaxinabuwẽ taea unaĩ hatuki datekĩ hawẽ ibubũ yuikĩ: —Huni ewaki. Ha yukakãwẽ— hatu wa

²⁴ hanua ana yuinametã shushawaxina ana kenashũ yuikĩ: —Txani txakamahaira Deusũ besuubi nuku yuiwe. Nukũ nũ uiaĩnã, ha hunirã txakabuki, Deusũ hãtxa txibãmarã— akabu

²⁵ hanushũ ana hatu yuikĩ: —Huni txakabumẽkaĩ, ẽ unãmaki. Ẽ bekũbiakẽ ikis ea uĩmaxina ha besti ẽ unaiĩ— hatu wa

²⁶ ana hawẽtxaĩs yukakĩ: —Mia haska kaya waxina mĩ ikai uĩmakinã, mia hawawẽ uĩmaxinamẽ?— akabu

²⁷ —Haskakĩ mã ea ana yukai? Dama ẽ matu yuishuki. Ẽ hãtxa mã nĩkamamẽ? Matũri daka mã txibanũ ika ikanai?— hatu wa

²⁸ kũyã akĩ hãtxa kuxipawẽ yuikĩ: —Mĩ hawẽ tsumaki. Nukunã, nũ Moisés txibãpakeaii.

²⁹ Deus Moisésbe hãtxaniki. Hakia ha huni haniara kaĩkiranimarã, nũ unãmaki— akabu

³⁰ —Mã ea peirawawa, ha huni haniara tashnia mã unãmarã. Haskabia ẽ beru ea bepeshxina ẽ ma uĩ pewaii.

³¹ Huni txakabũ Deus ea akairã, Deusũ nĩkaismaki. Hakia Deuski datekĩ hawẽ hãtxa ikũwãkĩ yukai Deusũ nĩkamiski, nũ unãnã.

³² Bai taei anua bekũ kaĩyã bepeshnirã, nũ haska nĩkaismaki.

³³ Deusũ yunuama haska watirumaki. Haskakẽ Deusũ Jesus merabewaxinaki— hatu wa

³⁴ hanũkaĩ ana sinatahairakĩ yuikĩ: —Mia bekũ txakabuhaira mĩ kaĩniwẽ taeshũ mĩ nuku yusĩtirumaki. Kariwe— atã hau ana hatube itxayamashanũ nematã nitxĩnibukiaki.

Fariseu shanẽ ibubu bekũ keska inibukiaki, na hãtxarã

³⁵ Hanu itxati hiwe anushũ bepeshxina nitxiãbu ka Jesusũ nĩkatã benabauni haki nukutã yukakĩ: —Mĩ Hutxi Kayabi Iuwa Deusũ Katuarã, mĩ ikũwaĩ?— aka

³⁶ —Shanẽ Ibuũ, ẽ Hutxi Kayabi Iuwa ẽ ikũwãtirurã, tsuamẽ?— aka

³⁷ Jesusũ ana yuikĩ: —Mĩ uĩ habe hãtxairã, ẽ habiaki— aka kẽwaĩ Jesus namã dãti ishũ yuikĩ:

³⁸ —Shanẽ Ibuũ, ẽ mia ikũwaiĩ— aka

³⁹ Jesusũ ana yuikĩ: —Deusũ hatu unãti waiwẽ taea yurabube ẽ hiwekũkainaii. Tsuabũra uĩsbumã bepesheshũ hau uĩshanũbũ inũ natiã tsuabũra xinãkĩ uĩbiai bekũ keska hau ishanũbũ ẽ huniki— ikai

⁴⁰ fariseu betsabũ habetã nĩkatã Jesus yukakĩ: —Nũ uĩyama nũ bekũ keska mĩ nuku xinaĩ?— akabu

⁴¹ Jesusũ hatu yuikĩ: —Deusũ yusĩa unãriama matũ txakabuwẽ mã kaneama ikeanaii. Hakia yuikĩ: “Nũ Deus unaiĩ”, ikĩ hawa nĩkama mã kaneaii— hatu watã,