João 21 - Kaxinawá Bíblia (BR)

Hawẽ tsumabuki ana Jesus nukunikiaki, na hãtxarã

¹ Jerusalém anua Jesusũ nuku betximai hãtxaxina ana Galiléia Iãnẽwã hawẽ kena betsa Tiberíades Iãnẽwã kesha anu nũ hawẽ tsumabu nũ ka Jesusũ eska wakĩ nuku uĩmani matu yuinũ nĩkakãwẽ.

² Galiléia anu nũ ka Simão Pedro inũ, Tomé ‘Tsupibu bakeẽ’, akĩ nũ kenamis inũ, Natanael hawẽ mae Caná Galiléia anua inũ, nũ Zebedeũ bakebu ea inũ ẽ betsa Tiago inũ, ana Jesusũ tsuma dabe betsa nũ itxa mapuabũ

³ Simão Pedrõ nuku yuikĩ: —Ẽ baka neshei kaii— ikaya —Nũ mibe kaii— abaini habe kai hawẽ shashu ewapawẽ nanetã habe kashũ hawẽ hisĩ ewapa pũtebiaxĩkĩ nũ hawa baka biamahaira ixiãyã

⁴ ma penakiranaya Jesus iã kesha nia uĩbiakĩ tsua nia dabanẽ nũ unãmakẽ

⁵ hui kuxipawẽ Jesusũ nuku yukakĩ: —Bakebuũ, bakarã, mã hayamẽ?— nuku wa nukũ kemakĩ: —Nũ hawa biamahairaki— nũ wa

⁶ —Ha shashu yusiuri hisĩ ana pũtekãwẽ, haurishũ mã biairã— nuku wa haska nuku yunushuri nũ pũtebauna ninibirãkĩ baka dasibi nuku neshema haska washũ shashũ nũ nanetimakẽ

⁷ ẽ ea Jesusũ abuhairamistũ Pedro yuikĩ: —Nukũ Shanẽ Ibu daki ikikiki— ẽ wa Simão Pedro hawaira nĩkatã tari pekashũ hisĩ pũtexinai hawaira sawekĩ kerũ atã ixtxui pukutã nunakainaya

⁸ hakia 100 metro besti shashuwẽ kakĩ hisĩ baka mata sharabaini nũ hawẽ tsuma betsabu keti itã

⁹ shashu anua butukaĩkĩ txi dekenẽ besti baka shuiai inũ misi mania nũ uĩayã

¹⁰ hanushũ Jesusũ nuku yunukĩ: —Ha baka mã bishurã, neri eskarabe bekãwẽ— nuku waya

¹¹ hanua Simão Pedro kakaĩ shashũ inatã hisĩmã baka itxapa bia ninikĩ sharabirãkĩ maxĩ mapema 153 hati baka ewapabu nanea hisĩ bashnekeamakẽ

^12-13 Jesusũ ana nuku yuikĩ: —Piyui bekãwẽ— nuku wa nuku baka neshemashũwẽ taea: “Nukũ Shanẽ Ibuki”, ikĩ unãtã: “Mĩ tsuamẽ?” iwanã, nũ yukama misi inũ baka shuia bishũ nuku inã keyutã

¹⁴ haskai mawaxina ana bestẽkaĩxĩshũ nukuki dabe inũ bestiki nukukĩ Jesusũ nuku uĩmaniki.

Jesusũ: Mĩ ea abuai? iwanã, Pedro yukanikiaki, na hãtxarã

¹⁵ Hanushũ pikĩ nũ meneaya Jesusũ Simão Pedro yukakĩ: —Jonasĩ bake Simãoneẽ, ea nĩkawe. Nabũ ea abuaibũ miãri ea abukĩ hatu binunũ, ishũ, mĩ yuixinarã, habiaskas mĩ xinaĩ?— aka —Shanẽ Ibuũ, ẽ mia abuairã, mĩ unaiĩ— aka —Habiaskari wakĩ enabu txashuwã bake keskabu hatu ea mekeshũkubaĩshãwẽ— iwanã,

¹⁶ ana Pedro yukakĩ: —Jonasĩ bake Simãoneẽ, mĩ ea abu kayai?— aka —Haa, ẽ mia abuairã, mĩ ea unaiĩ— aka —Habiaskari wakĩ ea ikũwaĩbu txashuwã keskabu ea hatu mekeshũkubaĩshãwẽ— iwanã,

¹⁷ ana hawẽ henekĩ Pedro yukakĩ: —Jonasĩ bake Simãoneẽ, mĩ ea abuhairai?— aka dabe inũ bestiki habias yukaiwẽ taea Pedro huĩti nixmai punu nukatã abuaiwẽ taeshũ yuikĩ: —Shanẽ Ibuũ, ẽ xinã dasibi unãkĩ ẽ mia abuhairairã, mĩ unaiĩ— aka —Habiaskari wakĩ enabu txashuwã keska hatu yusĩkĩ hatu ea mekeshuĩrakubaĩshãwẽ— iwanã,

^18-19 Jesusũ Pedro ana yuikĩ: —Ikũkĩ ẽ mia yuiai nĩkawe. Berunã kuxipakĩ tari sawetã hanira kairã, mĩ ma itixaraxinaki. Hakia mĩ anibu mexã dakakẽ huni betsã mia tari sawemakĩ hanu mĩ kakatsi ikamabiakẽ mia iyushãkanikiki. Habiaskabiakẽ ea nĩkatã ea txibãpakewe, ikisrã— akĩ haskatã Pedro mawakĩ Deus hatu kẽwãmashanai hau nĩka pewanũ Jesusũ yuiai nũ nĩkaniki.

Pedrõ Jesus Joãokiri yukanikiaki, na hãtxarã

^20-21 Jesusũ hãtxa nĩka keyutã dabekekaũ ea Jesusũ abuhairakubaĩmis bari kaya pi dakashũ ẽ yukakĩ: —Shanẽ Ibuũ, tsuã mia akimẽkaĩ, hatu atximakinã?— ẽ waxina hawẽ petxiuria ẽ huai Pedro dabekekaũ ea uĩkĩ Jesus yukakĩ: —Shanẽ Ibuũ, ha hunirã, haska wariashãkanimẽkaĩ?— aka

²² Jesusũ kemakĩ: —Shanẽ ibui ẽ ana huriamakenã João hiwea mawamas ishanai keska ẽ xinaĩ hawẽ dabanã iyamawe. Mianã, haska ẽ mia yunumis besti akubaĩkĩ ea txibãpakeshãwẽ —akĩ Jesusũ Pedro yuiniki.

²³ Haska bestibianikẽ ikũwaĩbu ekiri yuinamei: “Hawẽ tsuma João Jesusũ abuhairanirã, mawamas ishanikiki”, ikĩ ekiri kakakeakenibuki. Hakia: “Mawama ishanikiki”, akĩ Jesusũ ekiri yuiama hakia: “Shanẽ ibui ẽ ana huriamakẽ João hiwea mawamas ishanai keska ẽ xinaĩ hawẽ dabanã iyamawe”, akĩ Jesusũ Pedro yuibianikenã.

^24-25 Ana mirima Jesusũ akubaini dasibi nũ kene keyuarã, hati una mai hirabi anushũ meketirubumaki. Hakia Deuskiri Jesusũ nuku unãmai uĩkĩ nĩkakĩ dasibi ẽ tapĩniwẽ taeshũ ẽ hãtxa txanimawẽ eã ibubis ẽ matu keneshũshurã, hatiski. João