João 12 - Kaxinawá Bíblia (BR)

Jesusũ tae pemaki Mariã sheni hukanikiaki, na hãtxarã

¹ ha Páscoa nawai besi ana seis dia ma ika kemaibũ Jerusalém dapi Betânia anu nukube Jesus ka Jesusũ Lázaro bestẽwaĩma ana hiweawẽ taeshũ

² hawẽ xinã txãkãkĩ habũ Jesus duawakĩ bari kaya piti mirima nuku bawashunabu tapu txãpa anu Lázaro inũ hawẽ haibuaibu Jesusbe daka bashti ishũ piaibũ Martã piti betsa betsapa bebirã bebiranaya

³ hanushũ Mariã sheni hene ininipa hawẽ shãkama 300 gramo kesua hawẽ kena nardo has karuhaira beshũ Jesusũ taeki hukakĩ tae peuka dasibi hiwe napua iki inĩ xiamayaya hawẽ bu txaipawẽ tere akaya

⁴ nũ hawẽ tsuma betsa Judas Iscariotẽ txipu Jesus hatu atximashanaitũ yuikĩ:

⁵ —Haskakĩ hatu inãtã 300 shaba daya peiti biamamẽ? Ha peiwẽ nuitapaibu merabewati xarabĩ!— ibiai

⁶ ha nuitapaibuwẽ nuiamari hakia hatũ nukũ pei nukũ kapãkãki nũ mekemabia eskarabe bi yumetsubiakũkaini

⁷ Judasĩ haska yuiai nĩkatã Jesusũ yuikĩ: —Ana hari yuiyamawe, na eki tanashũ aruimashũ ẽ mawa txaputima wakĩ bebũkiri duawakĩ ea pushashukirã.

⁸ Nuitapaibu matube hiweabu mã hatu duawapaketiruki. Hakia earã, hawẽtxaĩs mã ea duawapaketirumaki— nuku wa

⁹ hanua Jesus Betânia anu hua judeu shanẽ ibubũ nĩkatã Jesus besti uĩnũ ikama Lázaro bestẽwaĩmari habe uĩnũ ika beabũ

^10-11 hakia Lázaro ana bestẽwaĩmawẽ taeshũ shanẽ ibu itxapabũ hatu henebaĩ Jesusũ hãtxa nĩkakĩ ikũwanũ ika pashkabainaibuwẽ taea datei Deusbe nukunabu hãtxashunika shanẽ ibubu yubakai: —Lázaro dikabi tenãtiki— ika yubakanibukiaki.

Jerusalém mae ewapanu Jesus hikinikiaki, na hãtxarã

^12-13 Jesus ushaxini bestẽkaini Jerusalémki kemai huai banabitã Páscoatiã nawai besi bexiã yurabu mirimabũ Jesus kẽwãbaĩkĩ shẽpã pei meshteshũ sanã sanã ashũkubaĩkĩ hãtxa kuxipawẽ yuibaĩkĩ: —Deus nukuwẽ nuikĩ nuku merabewamiski. Deusũ kuxipaya huai kẽwanãkãwẽ, nũ Israelbũ Shanẽ Ibu kayabikirã— iki haki nukui buaibũ

^14-15 hanushũ Deusũ hãtxa yuishunikã yuikĩ: “Jerusalém anuabuũ, matũ shanẽ ibu hawa keãma burro bake kamaki katsaumea hushanikiki. Dateama uĩshãkãwẽ”, hatu watã kenenirã, habiaskariai burro bake Jesusũ betxitã haki katsaumekaini kai Jerusalém hikiaya

¹⁶ hanushũ ha dukũ Jesus haskai nũ hawẽ tsumabũ nũ hawa nĩkakĩ pewama iniki. Hakia txipu Deusũ Jesus bestẽwaĩmakẽ xinãkĩ haska dasibi ikima ha kenenibu inũ kẽwãkubirãxinabu xinãkĩ atimas hakiri nũ nĩkaniki.

¹⁷ Habiatiãri Lázaro mawaxina Jesusũ kenakĩ bestẽwaĩ uĩmabũ yurã kaiã habu hatuki txanikĩ hatu yuibaũbaunaibũ

¹⁸ hawẽ hatu unãmati dami wakĩ bestẽwãxiãkiri nĩkatã Jesuski nukutani beaibũ

¹⁹ fariseubũ habũ ikũwãma uĩ yuinamei: —Uĩkãwẽ, nũ hawawẽ ana hatu beparãshũ itimakirã. Dasibibũ ikũwãbaini haki dasikanikikirã— ikaibũ

Gregonawabu Jesusbe hãtxakatsis inibukiaki, na hãtxarã

²⁰ judeububetã nawabu shuku betsa Gregobũ Deus kẽwaĩ hatube besi nawai Jerusalém anu bexiãbu

²¹ Filipẽ mae Betsaida Galiléia mai pakea anua Gregonawabu haki nukushũ yukakĩ: —Shanẽ ibuũ, nũ Jesusbe hãtxakatsis ikaii— akabu

²² hatu baxiyubaini kashũ André yuitã ha dabe kashũ haskaibu Jesus yuiabu

²³ Jesus hushũ hatu yuikĩ: —Matũ Hutxi Kayabi Iuwa Deusũ hatu ea kẽwãmakatsis ikairã, ma kemaikiki, ikisrã.

²⁴ Ikũ ẽ matu yuiaii. Heshe mai merã banama hawa bimitirumaki. Hakia mai uke merã bana hawẽ nami txapui dami hukuĩ yumetã bimihairamiski. Earã, ẽ haska keskayuaii.

²⁵ Hamẽ tsuabũra hawẽ hiwea ibubis abu yauxirã, ibubis benushãkanikiki. Hakia tsuabura hawẽ hiwea hawa yauxi nuiama ekiri ma xinã pewa ana hiwekuĩshãkanikiki, ikibi ikirã.

²⁶ Tsuabũra ea duawakatsi ikinã, hau ea txibãkubainũbũwẽ. Hanushũ ea txibãkĩ ea duawaiburã, ebe hiweriashãkanikiki. Haskawẽ taeshũ tsuabura ẽ Epa Deusũ hatu duawaya hanu ẽ hiweshanai anu ebe iriashãkanikiki, habũ ea duawamisburã— iwanã,

Haska wabu debushanaikiri Jesusũ hatu yuinikiaki, na hãtxarã

²⁷ haskai nũ nĩkaya Jesusũ hawẽ Epa yuikĩ: —Ikis hawẽtxaĩs huĩti meteshekei ẽ punu nixmahairaii. Hawa yuipa?— itã —Epaã, na ẽ yura hatu mepamatã ẽ pashanũ ea nitxĩwẽ, akĩ ẽ mia yuitirubia hakia habiaskatanũ ika ẽ huai mĩ ea yubaniki— atã

²⁸ ana yuikĩ: —Epaã, ewẽ taeshũ dasibibũ hau mia kẽwãshanũbũwẽ— akaya hanua nai anua Deusũ hui tashniaiwẽ yuikĩ: —Ẽ xinãwẽ mĩ ma abiakubainaya ana habiaskari wakĩ ẽ kena ana kuxipa wakĩ miwẽ ẽ ana hatu kẽwãmakatsis ikaii— akaya

²⁹ yurabu mapubaũshũ nĩkatã yuinamei: —Tĩ ikaĩkainimẽkaĩ— ikaibũ hatiritũ yuiriakĩ: —Deusũ nai tsuma hãtxaimẽkaĩ— ikaibũ

³⁰ haskaibu nĩkatã Jesusũ hatu yuikĩ: —Na hui tashniai mã nĩkashurã, ea merabewanũ ika hãtxa tashniamaki. Hakia matu merabewanũ ika hãtxa tashnishuki.

³¹ Na habiatiã yurabu unãti wakĩ diabo Satanás yurabu dasibibuwẽ shanẽ ibumis mebĩtã ẽ urẽshanaii.

³² Mai anushũ ea binikĩ sanãkĩ nitxĩmabũ haskawẽ taeshũ dasibibu ninia keska wakĩ ea anu ẽ hatu iweshanaii, hau itxapabũ ea ikũwanũbunã— iwanã,

³³ haskai cruzkia mawashanai hatube nukuki txanikĩ unãmaya

³⁴ hanushũ mapubaunabu betsã yuikĩ: —Deusũ hãtxa kenenibu anua uĩkĩ nũ manakamisrã, “Messias Cristo hua matube hiwepakeshanikiki”, akĩ kenenibukenã haskakĩ: “Nukũ Hutxi Kayabi Iuwa Messias binikĩ sanãkĩ nitxĩshãkanikiki”, ikĩ mĩ haska nuku yuishumẽ? Haskakenã, tsuamẽ, nukũ Hutxi Kayabi Iuwarã?— aka

³⁵ Jesusũ ana hatu yuikĩ: —Ana usha eskarabesi Deuskiri unãmanika shaba keskarã, matube hiweyuikiki. Haskayuaya na hãtxa nĩkai hiweyukãwẽ. Hamẽ bĩ nukawa keskai ma ẽ kakẽ tsuabũra unãriabuma mexũ atxia keskai hanira baiwẽ kai bai unãma mã meshtãtirubumaki. Unaĩrakãwẽ.

³⁶ Ha shaba mã ebe ketashamekatsis ikirã, mã shaba hayayuaki. Ha shaba mã haya nĩkatã ea ikũwãkãwẽ— hatu watã hunetã nukube kaĩkainiki.

Judeu shanẽ ibubu Deusũ hãtxa hayabia Jesus danãnibukiaki, na hãtxarã

³⁷ Hanushũ hawẽ unãmati dami atimaska Jesusũ hatu uĩmakĩ ashũbiakubaina hawa ikũwãma inibuki.

³⁸ Haska wanũbariaibukiri Deusũ hãtxa yuishunika Isaíasĩ yuikĩ: “Yavé Deusuũ, yurabu mĩ kuxipa mĩ hatu uĩmakubaĩmiski. Hakia nukũ hãtxa tsuã ikũwãbumaki”, aniki.

^39-40 Haska inũ, Isaíasĩ yuikĩ: “Hau uĩ pewayamanũbũ inũ hau xinã pewayamanũbũ Deusũ hatũ beru bekũ keska wakĩ hatũ huĩti kuxi waikiki. Haskawẽ taeshũ Deusũ yuikĩ: ‘Hatũ xinã betsa watã ea ikũwaĩbu ẽ hatu shushawakeanaii’ ”, akĩ Deusũ hãtxa ikũwãtirubumakiri Isaíasĩ keneniki.

⁴¹ Hanushũ Isaíasĩ namai keskakĩ Jesusũ kuxipa uĩtã hakiri txanikĩ hatu keneshuniki.

⁴² Isaíasĩ haska kenenikẽ judeu shanẽ ibu itxapabũ Jesus ikũwaĩbũ inũ shanẽ ibuhaira binuabu hatiribũri ikũwãbiai: “Hau nukũ itxati anua tashnimakĩ nuku nitxĩyamashanũbũ”, ika fariseubuki datekĩ yura itxapabũ Jesus ikũwaĩkiri shabakabi yuiama iyunibukiaki,

⁴³ Jesus xinãbiakĩ hawenabu kẽwãmayukatsis ikĩ Deuskiri beshmas kẽwãkĩ dateyabi xinãkinã.

Jesus danaĩbuwẽ taeshũ Deusũ hatu kupishanikiaki, na hãtxarã

⁴⁴ Hanushũ hãtxa kuxipawẽ Jesusũ nuku yuikĩ: —Tsuabũra ea ikũwãkĩ ea besti ikũwãma hakia ẽ Epa hatũ ea yununiri ikũwãkanikiki.

⁴⁵ Habiaskari wakĩ ea uĩkĩ hatũ ea yununiri unãriakanikiki.

⁴⁶ Yurabu mai anua hatu ikũwãmatanũ ika shaba keska ẽ huniwẽ taea tsuabũra ea ikũwaĩ mexu merã hari hiweama keska ishãkanikiki.

⁴⁷ Hakia yurabu kupinũ ika huama hatu merabewanũ ika ẽ huniwẽ taeshũ ẽ hãtxa nĩkabiakĩ tsuabũra txibãmakẽ ikis ẽ hatu kupiamaki.

⁴⁸ Hakia ẽ hãtxa danãkĩ abuabuma habuna kupiti ma hayaki. Shaba hawẽ henea unãtitiã ẽ hãtxawẽ taeshũ Deusũ habu hatu kupishanikiki.

⁴⁹ Eãnã, ẽ xinãnẽ ẽ matu yusĩamaki. Hakia Epa Deusũ ea yununitũ ea yunua yusĩkĩ ẽ matu yuimiski.

⁵⁰ Eã ẽ Epã hãtxa ẽ unaĩnã, harã hiwea keyutima hayaki. Haskawẽ taeshũ ẽ matu yuiaii, haska ẽ Epã ea yunukĩ yuinirã— akĩ nuku shabakabi yuiniki.