Jó 5 - Kaxinawá Bíblia (BR)

¹ yuikĩ: “Jó, haratu nai tsumã mia merabewakĩ mia kemaimẽkaĩ? Hatu sai atã manawe.

² Tsuabũra yura betsã mabu uĩ hawẽ kemui inũ tsuabura hawaira sinatai unaĩsmapai debumisbuki.

³ Huni betsa mabu paipaimayakĩ hatu binuai ẽ uĩmiski. Hakia txipu ha huni unaĩsmapa hawenabube hiwea hawaira dasibi habu yamai keyuimabuki.

⁴ Hanua hawẽ bakebu hiweyuabu tsuã hatu merabewatima hiweabu shanẽ ibubu itxashũ hatu itxakawakĩ beparãtã ana tsuã hatu nemashũtirumawẽ taeshũ

⁵ hatũ bai anua hatũ yunu bunikĩ hatu biãkĩ musha anu mapubiakẽ bishũ hatu piãkĩ keyuabu ha inũ, hatũ inabu inũ hatũ mabu bianũ ika hawẽ kemui hatuki sinatakubainimabuki.

⁶ Mai anua txakabu hamebi kaĩsmaki. Hawara bika betsa mai anua hamebi tashnismariki.

⁷ Haska karu kuabu hawẽ dekẽ sa imis keskakĩ yurabũ txakabu tuekĩ bika betsa betsapa hatu tenemakubaĩmisbuki.

⁸ Mĩ teneai keska eã tenekinã, hau ea merabewakĩ pewanũ Deus anu ẽ txĩtũkeanaii.

⁹ Hatunã, haska tsuã atirumahaira hatu haba imakĩ hawara sharabu itxapa Deusũ akubaĩmiski.

¹⁰ Mai anu Deusũ ui imakĩ yunumiski, nukũ bai anu yunu txa akinã.

¹¹ Habu keĩsbuma shinã pepabu Deusũ hatu shanẽ ibu wamiski. Bika teneaibu hanira pashawakĩ hanu pe hiwetirubu anu Deusũ hatu pe arumiski.

¹² Unanepa hãtxai yubakai parananaĩbu hatũ shinã hamẽ wãkĩ Deusũ hatu txakabuwamakĩ hatu itimaska wamiski.

¹³ Huni unanepa hawẽ shinã txakabuwẽ yubakai parananãmisbu Deusũ hatu beshtemiski.

¹⁴ Huni txakabubu bariri mapubiarã, bekũ kai me me akubainaibu meshu bekĩ hatu atxia keskabuki.

¹⁵ Huni betsa hãtxa kushipa nupe kenuhaira keskawẽ hãtxakĩ hatu nuitapa wakĩ hatu itxakawabiaibũ Deus hatuwẽ nuikĩ hatu nemashũmiski.

¹⁶ Deusũnã, huni babubu merabewakĩ hatu shinã txãkãwãkĩ ha itxakanikabũ kesha hatu hãbepukĩ nesewamiski.

¹⁷ Hau hiwei penũbũ yusĩkĩ tsuara Deusũ hatu nemakubaina shinã txãkãmisbuki. Haskawẽ taeshũ Deus kushipahairatũ mia nemai hawẽ hãtxa hawa danãyamawe.

¹⁸ Ha dikabi ibubis Deusũ mia deteshũ ha mĩ dete habiatũ mia neashanikiki. Hawẽ mekẽwẽ mia detekĩ txakãshũ ibubis Deusũ mia shusha watiruki.

¹⁹ Hawẽ yusĩti hãtxa mĩ nĩkakĩ txibãkubainaya mia mese mese wakĩ mia bika tenemaibu Deusũ hatu mia nemashũshanikiki. Hawa txakabu hau miki nukuyamanũ haska wakĩ Deusũ mia ashũkubaĩshanikiki.

²⁰ Piti hayama buni mawabaunaibũ Deusũ mia merabewakubaina mĩ mawama ishanaii. Ha inũ, hanu detenameaibutiã nupe txaipawẽ mia detenũ ika ibiaibũ Deusũ hatu mia nemashũshanikiki.

²¹ Mikiri txakabu yuikĩ mia yuaĩbu Deusũ mia nemashũshanikiki. Mia haska nemashunaya mese atimapahaira hubiaya mĩ dateama ishanaii.

²² Buni teneaibu inũ hamapai txakabu tashnibiabiranaya mĩ usã bestishanaii, yuinaka pianãbuki hawa hatuki meseamarã.

²³ Mĩ shekiwã trigo bai anu mishki kaĩkĩ mia itimaska wama ishanikiki. Ha dikabi yuinaka pianãburã, mĩ ina pepa keska ikubaĩshãkanikiki, mia hawa mese wamarã.

²⁴ Minabu mibe hiweabu unanuma pe hiwei mabu itxapa hayakubaĩshãkanikiki. Hanua mĩ inabu dasibi mĩ mekea mĩ pe uĩkubaĩshanaii, hawa betsa benuamarã.

²⁵ Mĩ bababurã, pai itxapahairashãkanikiki, bai anu basi mirimahaira benei pamis keskairã.

²⁶ Anibuhairai mĩ ma mawa kemabia kushipai mĩ benimakũkaĩshanaii, shekiwã trigo ma hushĩhaira tsekamisbu keskairã.

²⁷ Nukunã, haska nũ uĩkubaĩmis nũ ma tapiãki. Txanima habiaskaki. Na haska nĩkakĩ ibubis mĩtsiri unãti wakĩ tapĩkubaĩwẽ”, akaya