Jeremias 26 - Kaxinawá Bíblia (BR)

Haska Jeremiasĩ hatu yuia betxipaiama tenãkeanibukiaki, na hãtxarã

¹ Judá enabu mai pakea anu Josiasĩ huni bake Jeoaquim shanẽ ibui taekainaya Jeremias Senhor Deusũ yunukĩ

² yuikĩ: “Templo anushũ ea kẽwaĩ Judá enabũ mai pakea hatũ mae tibi anua bemisbu hatu yuinũ ika ẽ Templo hemaĩtĩ anu ka nishũ ha hãtxa mia yuikĩ ẽ mia yunushina dasibi hatu yuitãwẽ, hawa hãtxa betsa heneamarã.

³ Hẽtsã, haska mia nĩkatã hatũ txakabu heneshãkanimẽkainã. Haskaibũ eã haska ẽ shinãshina hatũ txakabuwẽ taeshũ hatu kupiama ẽ shinã betsa watiruki.

⁴ Eska Senhor Deusũ matukiri yuikiki. Ea nĩkakãwẽ: ‘Mã ea nĩkabuma inũ haska ẽ matu yusini mã akama

⁵ inũ ẽ dayarubu ẽ hãtxa yuishunikabu ẽ matu anu yunukubaina matu yusĩbiabu mã hawa nĩkama ẽ hãtxa mã danãmisbuwẽ taeshũ

⁶ haska Siló anushũ ẽ tari hiwe meribibiakẽ txakabuwakĩ ẽ yamawani keska wakĩ na Templo hiweri ẽ habiaskari washanaii. Mai hirabi anu nawa betsa betsapa shukuabu tibitũ hau ha uĩkĩ shinãpakeshanũbũ na maewã Jerusalémri txakabuwakĩ ẽ atimapa washanaii. Haska ẽ hãtxa ea hatu yuishũtãwẽ’, ea wa”,

⁷ Templo hemaĩtĩ anu kashũ habias hãtxa Jeremiasĩ hatu yuiai hawenabu Deusbe hãtxashunikabu inũ, Deusũ hãtxa yuishunika txakabubu inũ, yurã kaianẽ nĩkaibũ

⁸ haska Senhor Deusũ yunushu Jeremiasĩ hatu yuikĩ keyuaya Deusbe hawenabu hãtxashunikabu inũ, Deusũ hãtxa yuishunika txakabubu inũ, yurã kaianẽ hawẽ hãtxa nĩkatã haki sinatakĩ atxishũ yuikĩ: “Ibubis mĩ hãtxawẽ taea mĩ mawaii.

⁹ Siló anua yupukĩ atimapa wani keska wakĩ na Templo ashanikiki. Ha inũ, nukũ maewã Jerusalém yamawakĩ keyuabu nenu yurabu ana hiweama ishãkanikiki”, iwanã, dateama, “ẽ Senhor Deus hãtxashunaii”, ikĩ “Haskakĩ ibubis mĩ haska hãtxa yuishumẽ?” akeakeabu Templo hemaĩtĩ anushũ dasibibũ Jeremias kebaũshũ

¹⁰ Judá enabu shanẽ ibu inũ shanẽ ibu beshmasbũ ha haska waibu nĩkatã shanẽ ibuhairatũ hiwe anua tashnibirani Templo hemaĩtĩ anu hikia haskaibu unãti wanũ ika hanu hikiti shui hawẽ kenarã, “Bena” ha bebũ tsauabũ

¹¹ Jeremias hatu bebũ iweshũ ha shanẽ ibubu inũ yurã kaiã dasibi itxabu hatu nĩkamakĩ hawenabu Deusbe hãtxashunikabu inũ Deusũ hãtxa yuishunika txakabubũ hatu yuikĩ: “Na huninã, nukũ maewã atimapa washanaibukiri txanitxakashuwẽ taeshũ hatu yunukãwẽ, hau tenanũbunã, haskai dasibibũ ma nũ nĩkakãshuwẽ taeshunã”, akaibũ

¹² shanẽ ibubu inũ yurã kaiã Jeremiasĩ ana hatu yuikĩ: “Haska na Templo inũ nukũ maewãkiri ẽ hãtxai mã nĩkashurã, emebi ẽ ikamaki. Senhor Deusũ hawẽ kena kushipawẽ ea yunua hua ẽ txanishuki.

¹³ Haska mã hiwe txakakũkainai inũ haska mã atimapamis matũ shinã betsa watã shinãrikãwẽ. Matũ mekenika Senhor Deusũ hãtxa nĩkakĩ mã akubainaya haska ẽ matu yuishu keska matu anu txakabu yunuama ishanikiaki.

¹⁴ Hamẽ ea akinã, haska mã ea wakatsis ikai ea arikãwẽ, ẽ yura ẽ ma matu beshuãkirã.

¹⁵ Hawẽ hãtxa shabakabi dasibi ẽ matu yuinũ txanima Senhor Deusũ ea yunushinaki. Na ẽ matu yuishu haska shinãkatsi ikama ẽ hawamabiakẽ mã ea tenanã, matubu inũ nenu hiweabu matumebi mã txakabu ikũkaĩshanaii. Shinaĩrakãwẽ”, hatu wa

¹⁶ hanua shanẽ ibubu inũ yura kaianẽ hawenabu Deusbe hãtxashunikabu inũ Deusũ hãtxa yuishunika txakabubu hatu yuikĩ: “Nukũ mekenã Senhor Deusũ kena kushipawẽ nuku hãtxa waikiki. Ha huni hau tenanũbũ hawawẽ taeshũ nũ hatu yunutirumaki”, ikaibũ

¹⁷ anibu unanepabu itxabu anua betsa benikaũ ha yurã kaiã hatu yuikĩ:

¹⁸ “Judá enabu anua Ezequias shanẽ ibuhairakĩ hatu yunukubainaitiã mae betsa Moresete anua yumeni Deusũ hãtxa yuishunika Miquéiasĩ Judá enabu Senhor Deus hãtxashũkĩ: Eska Senhor Deus kushipahaira dasibi binuatũ matu yuikiki. Nĩkakãwẽ: ‘Mati Sião betsairã, hanu dayati bai besti ishanikiki. Jerusalém tekei keyui di ika hanus hawẽ mishki mania ikũkaĩshanikiki. Templo mati anurã, txaka besti benei besheshanikiki’, hatu waya,

¹⁹ shanẽ ibuhaira Ezequias inũ Judá enabũ Miquéias tenanibumẽ? Haska wamahaira inibuki. Hakia Senhor Deuski datekĩ hau hatuwẽ nuinũ shanẽ ibuhaira Ezequiasĩ Senhor Deus ea akimawẽ taeshũ haska hatu yuima keska hatu anu txakabu Senhor Deusũ yunuama inikiaki. Nukuburi haskakatsi ikama ibubis txakabuhairakĩ Jeremias tenãyamanãkãwẽ, ibubis txakabukĩ Deus sinatamamarã.

²⁰ Hamẽ betsarã maewã betsa Quiriate-Jearim anua yumeni Semaíasĩ huni bake Deusũ hãtxa yuishunika Urias Senhor Deusũ kena kushipawẽ na maewã inũ nukũ mai pakeakiri txakabu hatu yuiniki, haska Jeremiasĩ nuku yuiai keskarã.

²¹ Haska Uriasĩ yuiai shanẽ ibuhaira Jeoaquim inũ, hawẽ merabewanikabu inũ, hawẽ shanẽ ibu beshmasbũ nĩkaibũ Jeoaquimnẽ Urias hatu tenãmakatsi ikaya nĩkakĩ tapĩtã datei Egito anu Urias pashabiakẽ

²² Acborĩ huni bake Elnatã inũ huni betsabũ hau atxishũtanũbũ shanẽ ibu Jeoaquimnẽ hatu yunua

²³ hari bushũ Urias atxishũtãkĩ iweshũ shanẽ ibu Jeoaquim bebũ nitxiãbu Jeoaquimnẽ hatu yunua Urias tenãtã hanu nuitapaibu mawa hatu putamisbu anu kini anu hawẽ yura urenibukiaki”, akĩ

²⁴ Safãnẽ huni bake Aicão Jeremias hãtxashunaiwẽ taea hau yurã kaianẽ tenanũbũ shanẽ ibubũ Jeremias hatu yunuama inibukiaki.