Hebreus 6 - Kaxinawá Bíblia (BR)

¹ Haska tapĩkubaini ewairã, nũ yura ewa keska itirubukiaki. Haska bebũkiri Cristokiri matu yusĩkĩ taewanibu haskakiri nũ ana hawẽtxaĩs txĩtuãbirãbirãkĩ nũ matu yusĩtirumaki. Eska tibikirirã, ikũwãriabuma hatu ikũwãmatikirirã, hawara txakabu betsa betsapa aki hawẽ taea mawa kayabi anu bumisbu hatu putamakĩ yusĩakirirã, haska wakĩ Deus txibãkĩ ikũwãtikirirã,

² hatu naximakatsi hatu yusĩakirirã, habũ Cristo ikũwaĩbuki mapepishũ hatu Deus yukashũtikirirã, mawabu ana bestẽshanaibukirirã, Deusũ hatu unãti watã hanu hatu bika tenemapakeshanaikiri haskas yusĩawẽ besti nũ matu yusĩtirumaki.

³ Hakia ikũwaĩ haska tibiwẽ nũ ewakĩ nũ anũbũ Deusũ nuku merabewaya haskai Jesuski nũ txiti ipakenũbũ ana matu yuinũ nĩkakãwẽ.

^4-6 Tsuabura Deusũ hawenabu wakatsi hatu katushũ hawẽ Yushĩ Pepa hatu inãkĩ hatu merabewamapakeaya hawẽ hãtxa pepa unaĩ Jesus ana huaitiã haskasnũbariai keskai hiwei taekĩ habũ Jesus ikũwãkĩ txibãbiai putai txĩtũtã hatũmebi ana xinã betsa watirubumaki. Habu Deusũ bakẽ hãtxaki kashekĩ danãkĩ ana cruzki masta keska wakĩ hatunaburi Jesuski kashemaibuwẽ taeshũ hatu yusĩkĩ nukũri hatũ xinã hatu betsa wamakĩ nũ hatu pewatirumaki.

⁷ Ha inũ, mai pepa anu ui imakĩ yurabũ yunu banaimabu maĩ yume pewai hanu Deusũ hatu manakumiski.

⁸ Hakia mai betsa anu Deusũ ui imabia yurabũ yunu banaimabu maĩ yumewama txaka inũ musha bestikẽ ha mai txakabu Deusũ danãkĩ yupumisshũ hawẽ henekĩ kuashanikiki. Jesus ikũwãkĩ henetã Deus dayashũtxakaiburã, ha mai keskabuki.

⁹ Ẽ betsabu inũ ẽ puibuũ, haskakiri ẽ matu hãtxawabiairã, matukiri ẽ xinãnã, bai pepaki nukutã mã hawa txĩtũtirubuma mã ma mestẽwãtã pashani ẽ xinaiĩ.

¹⁰ Ha inũ, Jesus ikũwaĩbu betsabu merabewai hatuwẽ nuikĩ abukĩ mã Deus abukĩ Deusũ haska abuai akĩ mã benimawamiswẽ taeshũ hawa kanema matũ pepari hakimama matu duawakĩ matu hawa danãma iriashanikiki, haska natiã mã ariakubainaibuwenã.

¹¹ Haska matu tibitũ xinãkĩ mã akairã, betsabu uĩmakĩ heneama xinã txãkãkĩ hawara pepa mã uĩkatsis ikai heneama menekĩ akubaĩkãwẽ, haska Deus yubakani heneama manakinã.

¹² Ha inũ, Jesus txibaĩ txikixi hau mã punu nukayamanũbũ Jesus ikũwãkubaĩkĩ hawẽ unãnuma hiweti Deus yubakani bikubainaibu keska wakĩ hatu txibãkĩ pepa besti wakubaĩkãwẽ, hanu mã mawaitianã.

Deus yubakai hawẽ unãtinani betsa waismakiaki, na hãtxarã

¹³ Hanushũ matũ shenipabu Abraão Deusũ yubakatsi ikĩ tsuã Deusũ kuxipa binua datã atiruma Deus ibubis datã ikĩ yubakakĩ

¹⁴ Abraão yuikĩ: “Txanima eã mia pawakĩ mĩ bababu itxapa mia washũkĩ ẽ mia duawakubaĩshanaii”, aka

¹⁵ nĩkatã hawẽ yubati hãtxa manai hĩ hĩ ikama ikũkaĩkĩ atimas haska Deusũ yubani bi benimanikiaki.

¹⁶ Ha inũ, nukunabu yubakakatsi xinaĩ: “Hawara ẽ hatube yubakai ẽ akamakẽ haratura kuxipatũ hau ea haskara washanũwẽ”, iki tsuara kuxipaki mesei yubakamisbuki. Hanua haskakiri yubakaimawẽ taea ana xinã betsakĩ ana tsuã yuba betsa wakĩ maewatirumaki, hawẽ taea haa ikirã.

¹⁷ Deus haska yubakani meneshanai hawẽ yubakatirã, hawa maewama tsuabũra txanima ikũwãkĩ shabakabi bishanaibu hatu inãkatsi Deus hawẽ bakewẽ txanima ashanai hakiri yubakaniki, mestẽwainã.

¹⁸ Haska Deus yubakamis yubanametã maewai txani txakaismawẽ taea hawẽ nukuwẽ nuishanai nũ haki irushanũbũ ha ikũwãkĩ manakanãkãwẽ, nuku ashũshanikikirã, hawẽ taea yubakaniwenã.

¹⁹ Na haska ikũwãkĩ nũ manakaiburã, nukũ yushĩ nũ ma mestẽwãbuki, hawẽ shashu tsumakĩ mai betãti shãkama putakĩ mestẽwãkĩ mai pus amamisbu keska wakinã. Nukũ xinã haska mestẽwãwẽ taea Jesusũ ma nuku pewashuni anu hawa dateama nukũ Deus meribi anu nũ kematiruki.

²⁰ Nai anu haskai buaibu ha dukũtũ bai wai nuku bai bepẽshuni tsua bebui hikiriama ha nukũ Deusbe hãtxashunika binua ipakeshanai Melquisedeque dayapauni keska nuku ishuĩ kaniki.