Gênesis 4 - Kaxinawá Bíblia (BR)

Caim inũ hawẽ betsa Abelkiri eskai hiwenibukiaki, na hãtxarã

¹ Éden bai anua hatu kaĩma kashũ hunĩ Adão hawẽ aĩ Eva txutakĩ bakewa hawẽ bake tue bena kaiã ha dukũ bake nanea huni bake kaĩshũ kenakĩ: —Caimki— iwanã shinãkĩ: —Deusũ ea merabewaiwẽ taeshũ huni bake ẽ kaĩshuki— inikiaki.

^2-3 Hanua txipu ana hawẽ benẽ bake betsa wa huni bakeri kaiã kenakĩ: “Abelki”, anikiaki. Ha dabe yumewabu ewatã Abel txashuwã yumewanika ikaya Caim bai wanika inikiaki. Hanua betsatiã hanu Senhor Deus kẽwaĩbutiã inãkuĩkatsi ikĩ Caimnẽ hawẽ bai anua yunu beshũ inãyã

^4-5 habiaskari wakĩ inãkuĩkatsi ikĩ Abelĩ txashuwã bake shua pehaira beshũ Deus inã Deusũ Abel inũ hawẽ inãkuĩ hatuna besti betxipaihairakĩ hakia Caimnena danãyã Caim benimama amua sinatahairaya

⁶ hanushũ Senhor Deusũ Caim yukakĩ: —Mĩ haskai sinatai amuamẽ?— iwanã,

⁷ yuikĩ: —Ẽ mia yusiã nĩkai mĩ benimashanaii— atã ana yuikĩ: —Ẽ yusiã danaĩ mĩ pepamakẽ txakabu miki hikia sinata paẽ mia atxitã kanemakatsis ikikiki, inu pubeĩ keskairã. Hakia mĩ txakabũ mia maemapaya mĩ txakaburã, nemashãwẽ— aka

⁸ ha nĩkabiashina txipu shaba betsatiã Caimnẽ hawẽ betsa Abel yuikĩ: —Unu kayunuwe— abaina habe ka bai anu hikishũ Caimnẽ hawẽ betsa kushakĩ tenãkẽ

⁹ Senhor Deusũ unãtã txipu Caim yukakĩ: —Mĩ betsarã, hania?— aka —Earã, ẽ hawẽ mekenikamẽ? Ẽ unãmaki.— aka

¹⁰ Senhor Deusũ yuikĩ: —Mĩ haska washinamẽ?— iwanã —Mĩ betsã himi mai anu habai sai ikĩ hau ẽ mia kupinũ ea yuikiki. Mĩ betsarã, mĩ tenãshinaki— iwanã

^11-12 —Maiwẽ ẽ mia yupuaii. Mĩ betsã himi maiki habai metxashinawẽ taeshũ ẽ mia txakabuwaya mĩ yunu banabia mĩ mibã ana hukuãma ipakeshanikiki. Haskakẽ mai hirabi anu datei mĩ hiweakeakeshanaii— aka

^13-14 Caimnẽ yuikĩ: —Mia anua ea nitxĩkĩ ẽ mae anuari mĩ ma ea kaĩmariashuki— iwanã, ana yuikĩ: —Mai hirabi anu ẽ hawauma kakũkaini kauanaya mĩ ea datepaketi washuki. Enabu tibi eki nukua ẽ dateaya ea debu washãkanikiki. Mĩ ea kupia bikahairarã, haska tenei ẽ hiwetirumaki— aka

¹⁵ —Haskamaki— iwanã, Senhor Deusũ yura dasibi unãmakĩ yuikĩ: —Tsuãra Caim tenãyanã ẽ kupihairashanaii— atã, hau ha uĩtã hau deteyamanũbũ Senhor Deusũ unãti wakĩ Caimnẽ betũkuki kene netanikiaki.

Caim hawenabuya eskai hiwenibukiaki, na hãtxarã

¹⁶ Senhor Deus anua Caim tashnia Éden anua bari huaikiri ka Node mai pakea betsa anu hiweshũ

¹⁷ Caimnẽ aĩbu bitã habe hiweshũ txutanamekĩ bakewaima huni bake kaiã kenakĩ: “Enoqueki” atã hanua hawenabu pai mae ewapahairaibũ kenakĩ hawẽ bakẽ kenakiri kenakĩ: “Enoqueki”, arianikiaki.

¹⁸ Enoque bake betsarã, Irade inikiaki. Iradẽ bake betsarã, Meujael inikiaki. Meujaelĩ bake betsarã, Metusael inikiaki. Metusaelĩ bake betsarã, Lameque inikiaki.

¹⁹ Ha Lamequẽ aĩbu dabe aĩwã hatũ kena Ada inũ Zilá inikiaki.

²⁰ Adaki bake wa huni bake kaiã kenakĩ: “Jabalki”, anibukiaki. Jabal bababũ bitxi hiwe watã hawẽ hiwebaũkĩ ina awa yumewapaunibukiaki.

²¹ Ada ha katxu bake bia huni bake kaiã kenakĩ: “Jubalki”, anibukiaki. Jubalĩ bababũ harpa mimawati dispiya inũ teperewe mawanika ipaunibukiaki.

²² Zilá dikabitũ bake bia huni bake kaiã kenakĩ: “Tubalcaimki”, anibukiaki. Tubalcaimnẽ bababũ mane bronze inũ ferro mabu betsa betsapa txasha beshmas wamisbu ipaunibuki. Tubalcaimnẽ pui kaiã kenakĩ: “Naamáki”, anibukiaki.

^23-24 Shaba betsatiã Lamequẽ hawẽ aĩ dabe hatu yuikĩ: “Adaã, Ziláã, mã ẽ aĩ dabeki. Ẽ hãtxa nĩkakãwẽ. Huni berunãtũ ea kushakĩ ea tenãpanã eã ẽ tenãshuki. Huni betsã Caim deteaya 7ki kupitirubuki. Hamẽ, earã, huni betsã ea detearã, 77ki kupishãkanikiki”, hatu anikiaki.

Adão bake betsa Sete kainikiaki, na hãtxarã

²⁵ Ana Adão hawẽ aĩ Eva txutakĩ bakewaima ana huni bake kaiãyã kenakĩ: “Seteki”, iwanã, shinãkĩ yuikĩ: “Caimnẽ Abel debu waimawẽ taeshũ Deusũ huni bake betsa ea inãshuki”, inikiaki.

²⁶ Sete ewai aĩyãtã bake bawaima huni bake kaĩshuna kenakĩ: “Enoski”, akimashũ habiatiãri nukũ mekenika Senhor Deus ea akĩ kẽwãkĩ taewakubainibukiaki.