Gênesis 34 - Kaxinawá Bíblia (BR)

Diná nawã pesashinawẽ taeshũ hawẽ puibũ hatu detekĩ keyunibukiaki, na hãtxarã

¹ Hanua Siquém mae anu Jacó aĩ Léiã bake Diná txipash hiwe betsa anu aĩbu betsaki bai ka

² Heveu nawa shanẽ ibu Hamorĩ bake iyua Siquémnẽ Diná uĩkĩ atxishũ pesakĩ dakewatã

³ txipash betxipaihairakĩ daewanũ itã hau habe betxipainamenũ habe hãtxai petã

⁴ hawẽ epa Hamor banabimakĩ: —Ha txipash ẽ aĩwãkatsis ikai hawẽ epa ea yukashũtãwẽ— aka

⁵ hanu hawẽ puibu hayama txai bushũ hatũ inabu pimai buabũ Siquémnẽ hawẽ aĩbu bake txutashu yuiabu hawẽ huni bakebu beriabumakẽ Jacó ha mesti ha ikatsi ikama teneyunikiaki, hawa yuiamarã.

^6-7 Hanua hawẽ puibu beshũ Dinakiri nĩkatã shinãkĩ: —Nukũ pui Siquémnẽ txutakĩ nukũ ibubube nuku itxakawashinakiaki. Tsua haskatimahairaki— itã haskawẽ taea huĩti nishma haki sinatahairaibũ habe hãtxanũ ika Hamor hawẽ bake Siquémbe Jacó anu kashũ

^8-10 hatu yuikĩ: —Ẽ bake mĩ bakewẽ kemukĩ betxipaihairaikiki. Hau aĩwanũ ẽ mia yukashuniyuaii, eskatiã nũ enanamenũbunã, yura bestitxai keskairã. Eskairã, nukũ aĩbu bakebu bishãkãwẽ, matunari nũ biriakubainũbunã. Nukube mã hiweaya nukũ mai pakea matunari iriashanikiki. Nenu hiwekãwẽ, hanu hiwea dayakĩ mabu itxawakĩ ana mae ewawakubaĩshãkãwẽ— hatu wa

^11-12 hanushũ hawẽ bake Siquémnẽri hatu yuikĩ: —Matu daewakĩ hawara mã ea yuka ẽ matu inãshanaii. Inãkuĩ hamapai sharabu mã ea yuka ẽ matu inãtiruki. Haskawẽ taeshũ matũ bake txipash ea inãkãwẽ, hau ea benewanunã— hatu wa

^13-17 hatũ beyawẽ taeshũ hatũ pui nawa inãtiruma shinãkĩ hatũ pui itxakawashinawẽ taeshũ Jacó huni bakebũ hatu parãkĩ Siquém inũ hawẽ epa yuikĩ: —Mã haskabu nukũ pui nũ matu inãtirumahairaki, mã nukũ beya keskamarã, matũ hina kubitxi meshtekeumarã. Nũ haska matu inaĩ nũ dakekatsi ikamaki. Haskawẽ taeshũ nũ matu yunuamaki. Hakia haskakatsirã, ha dukũ nuku keskai huni tibi matũ hina kubitxi mã meshtekeaya nukũ puibu matu inãtã matunari nũ bitiruki. Habias yurabu shukua keskai nũ matube hiwetiruki. Hakia mã nukũ hãtxa nĩkama matũ hina kubitxi meshteamakẽ nukũ pui matu mebĩbaini nũ kaĩkaĩshanaii— akabu

¹⁸ hatũ hãtxa Hamor inũ hawẽ bake Siquémnẽ nĩkatã: —Haskarã, peki— ikaibũ

^19-20 Jacó aĩbu bake betxipaihairai meshteabu isĩki dateama hawẽ hina kubitxi Siquémnẽ hatu bimatã hanua hawẽ epa Hamorbe itxamisbu hemaĩtĩ anu Siquém kashũ shanẽ ibu keskakĩ hawenabu huni dasibi kena itxaibu hatu yuikĩ:

^21-23 —Ha huniburã, nukuki sinatabumaki. Haskawẽ taeshũ nukũ mai pakea anu hatube hiwenãkãwẽ, habube biakanaĩ nũ dasikubainũbunã. Uiã, hatũ hãtxa nĩkanãkãwẽ, nũ haska hatu txibãyã nukube hiweshãkanikikirã. Nukũ mai pakea ewapawẽ taea nuku inũ hatube nenu nũ hiwetirubuki, hatũ inabuya hatubetã pimairã, nukũ aĩbu bakebube nũ hatube biananãkubainũbunã. Hamẽ nukũ hina kubitxi nũ meshteamakẽ yurabu bestitxai keskai nukuki dasitã nukube hiwekatsi ikabumakiaki. Hakia nũ habu keskai huni tibitũ nukũ hina kubitxi nũ meshteaya hawenabui yura shuku bestitxai keskai nukube hiweshãkanikiaki. Nũ haskaya hatũ inabu inũ hatũ mabu nukuna ishanimẽkaĩ. Hatũ hãtxa nĩkanãkãwẽ, nũ haska hatu txibãyã nukube hiweshãkanikikirã— hatu wa

²⁴ Hamor inũ Siquémnẽ hãtxa hati bariyabu dasibi habu detenamei butirubu keskabũ hatu nĩkatã habũ kemakĩ: —Haskakenã, peka— ikaibu hanushũ habũ hina kubitxi meshtebaũkĩ hatu keyushinabu

²⁵ hatu haska washinabu shaba dabe inũ besti kaya huni dasibi isĩ tenehairaibũ Jacó bake dabe Simeão inũ Levi Dinã pui kayabibũ nupe txaipaya ka ha maewã anu hikishũ hiwe tibi hune hikikũkaũkĩ huni dasibi hatu dete keyunibukiaki.

²⁶ Hamor inũ hawẽ bake Siquém deteriatã hatũ hiwe anua hatũ pui Diná mebikinãbaĩkĩ iyuabu kaya

²⁷ hanua hatũ pui Diná Siquémnẽ itxakawashinawẽ taea Jacó huni bake betsabu ha hatũ betsã hatu tenãkãshu anu haburi bushũ hiwe tibi anua hatũ mabu biãbaũkĩ

²⁸ hiwe dapikea inũ bai anua ina sharabu bamakĩ hatu itxawatã

²⁹ hatũ mabu dasibi biãtã hatu tsuma wabaĩkĩ hatũ bakebu inũ hatũ aĩbuaibu dasibi hatu itxawabaĩkĩ ha maewã dasibi anua hatu iyukĩ hatu yumetsubainibukiaki.

³⁰ Hawẽ bakebũ hatu haska washuwẽ taea hatuki sinatakĩ Jacó hawẽ bake Simeão inũ Levi hatu ha akĩ yuikĩ: —Ea txakabuwakĩ nawa betsa betsapa mã ea hatu mesewamashuki, Canaã nawabu inũ Ferezeu nawaburã. Nukurã, nũ eskarabeski. Hakia haburã, itxapahairabuki. Habu dasitã nuku dete keyukĩ nuku yamawashãkanikiki, ea inũ enabu nuku teshe heneamarã— hatu wa

³¹ hawẽ bakebũ nĩkatã hatũ ibu yuikĩ: —Haska wakĩ nukũ pui dasibituna hininipa wakĩ beya wakĩ nuku beshpa betxitirubumaki— anibukiaki.