Gênesis 3 - Kaxinawá Bíblia (BR)

Adão inũ Evã Senhor Deusũ hãtxa nĩkama inibukiaki, na hãtxarã

¹ Senhor Deusũ yuinaka betsa betsapabu damiwanirã, dunũ hawenabu binumai unanepahairakĩ aĩbu parãkĩ yukakĩ: —Uiã. “Bai hi bimi betsa betsapa tibi piyamashãkãwẽ”, akĩ Deusũ matu nemashinamẽ?— aka

^2-3 aĩbũ yuikĩ: —Bai hi bimi nũ pitiruki. Hakia Deusũ nuku nemakĩ: “Bai nekia hi bimi betsa kemukĩ piyamashãkãwẽ. Meyamakãwẽ. Piarã, mã mawashanaii”, nuku ashiãki— aka

^4-5 dunũ ana yuikĩ: —Haskamaki. Mã mawama ishanaii. Deusunã, txanima unã keyuikiki. Mã ha keska iyamanũ ha hi bimi pepa inũ txakabu unãti mã piyamanũ matu nemashinaki, mã ha keska itirukẽnã— aka

⁶ aĩbũ shinãkĩ: —Ha hi bimi piti sharabuki. Hawẽruaki. Hawẽ unãtikiaki— ishũ tsekashũ pishũ hawẽ beneri ma hua inã hatũri pitã

⁷ shabakabi unãkĩ tariuma unãtã yuinamei: —Nũ hawawẽ huneamaki, nukũ yurarã— ishũ dakekĩ ni figueira pei keshea hawẽ txiabukutã

⁸ bari matsiaya mapuabũ Senhor Deus bai neki huai hawẽ bana nĩkatã bai txaka merã huneabũ

⁹ Senhor Deusũ huni kenakĩ: —Mĩ hanimẽ?— aka

¹⁰ tashnibirã kemakĩ: —Bai nekia mĩ huai nĩkatã tariuma datehairai ẽ huneshuki— aka

¹¹ —Mĩ tariumarã, tsuã mia yuishumẽ?— atã —Hi bimirã, “Piyamawe”, ẽ mia ashiã mĩ pishumẽ?— aka

¹² hunĩ yuikĩ: —Hatũ ea merabewati aĩbu mĩ ea inãshinatũ hi bimi ea inã ẽ pishuki— aka

¹³ Senhor Deusũ aĩbu yukakĩ: —Mĩ haskakĩ haska washumẽ?— aka aĩbũ yuikĩ —Dunũ ea parã ẽ pishuki— aka

^14-15 Senhor Deusũ dunu yuikĩ: —Mĩ hatu parãshũwẽ taeshũ yuinaka dasibi meranua ẽ mia txakabuwaii. Na habiatiã bari tibi hiwei nutawẽ kakĩ mĩ mai putu pipakeshanaii— atã —Mia inũ aĩbu, mĩ bababu inũ hawẽ bababu ẽ sinatanamemapakeshanaii— hatu watã Satanás dunu merã hiwea yuikĩ: —Mĩ hawẽ tae txitxuku keyukĩ isĩ wãbia maemakĩ aĩbũ babã binukĩ mĩ bushka butxushkĩ shepa wanũ barikiki— atã

¹⁶ aĩburi Deusũ yuikĩ: —Mĩ bake kaiaĩ tibi isĩhairawakĩ ana ẽ mia tenemapakeshanaii. Hakia: “Isĩhairaki”, mĩ ibiakĩ mĩ bene betxipai mĩ habe txutanamepakeshanaii, mĩ benẽ mia mekekĩ ibu warã— iwanã,

^17-19 huniri yuikĩ: —“Hi bimirã, piyamashãwẽ”, ẽ mia wabiashina mĩ ainẽ hãtxa nĩkatã mĩ pishuki. Haskawẽ taeshũ mai itxakanika ẽ mia washuaiĩ. Bari tibi hiwea mĩ piti mai anua bishũ pi mĩ dayahairapakeshanaii. Mĩ yunu banabia musha inũ txaka maĩ mia benemashũpakeshanikiki. Mĩ mai puturiama mĩ piti pi dayahairai mĩ niskãpakeshanaii. Mai ẽ mia damiwa mĩ mawarã, mĩ ana hawẽri maishanaii— akaya

²⁰ —Hanushũ na yurabu dasibi hau hawẽ hiweshanũbũ, iwanã, shinãkĩ hunĩ hawẽ aĩ kenakĩ: “Evaki”— anikiaki, nukũ hãtxarã: “Dasibi hiweshanaibũ hatũ ewa wakinã.”

²¹ Senhor Deusũ huni inũ hawẽ aĩ bitxi tari washũtã hatu sawematã

²² hanua Deus hamebi yuinamekĩ: —Uiã, hunirã, nuku keskatanã, pepa inũ txakabu unãtã hiwepakemati hi bimi bishũ pitiruki. Haskai huni inũ hawẽ aĩ hiwepakeshãkanikiki, mawamarã— itã

²³ Éden bai ewapa anua hatu kaĩmatã hanushũ ha hanua mai huni dami waima anua tashnimakĩ nitxĩkĩ hamebi hau bai wanũ nãta yununikiaki.

²⁴ Deusũ huni kaĩmatã hanua hiwepakemati hi bimi hanu kati bai anu hau hari ana tsua kayamanũ mekemakĩ yunukĩ bari huaikiria Éden bai hikiti shui anu hawẽ nai tsuma pũyã peiyabu nitxĩtã hawẽ meketi nupe txaipa txi hereya dabekekaũkĩ txashakaũkĩ hau mekenũbũ hawẽ nemakĩ Senhor Deusũ hatu mekemanikiaki.