Gênesis 21 - Kaxinawá Bíblia (BR)

Isaque kaĩ eskanikiaki, na hãtxarã

^1-4 Senhor Deusũ Abraão yubaimashũ Sara shinãkĩ hatu merabewaya hanushũ Abraão mestebuhairabiatũ hawẽ aĩ Sara txutakĩ bakewaima haska Deusũ yubakĩ yuima keska Sara huni bake bimaima kaiã Abraão kenakĩ: “Isaqueki”, ashĩshũ 8 shabatiã hawẽ hina kubitxi bikĩ meshtenikiaki, haska Deusũ yunuima txibãkinã.

⁵ Hanua Abraão 100 ano hayakẽ Sara Isaque kaĩtã

⁶ Sarã shinãkĩ: “Deusũ ea benimawakĩ ea usãmashuki. Haskakẽ ẽ huni bake kaĩshina habũ nĩkatã benimariashãkanikiki, ebetã usãriairã.

⁷ Ẽ benẽ ea bakewaima kaĩshũtã ẽ txutxu amashũtirurã, tsuã bebũkiri shinãtirumahaira ikimaki. Hakia ẽ bene mestebuhairabiatũ ea bakewaima ẽ huni bake kaĩshũshinaki”, inikiaki.

Agar inũ hawẽ bake Ismael hatu hiwemabiashũ Abraão hatu nitxinikiaki, na hãtxarã

⁸ Hanua ha hawẽ bake Isaque ewaya hawẽ beya txibãkĩ txutxu henemakĩ taewakẽ habiatiãri Abraão hawenabu piti itxapa washũ hatu pimakĩ benimawaya

⁹ hawẽ aĩ betsa Egito nawa Agarĩ bake Ismael haki beparamekĩ dayuikĩ Isaque itxaya hawẽ ibu Sarã uĩshũ

¹⁰ sinatakĩ Abraão yuikĩ: “Mĩ dayaru escravo Egito nawa hawẽ bakebe nitxĩriwe, ẽ ana hatu betxipaiamakirã. Hanu nuku nũ mawaya nukũ mabu inũ, nukũ inabu inũ, nukũ dayarubu Ismael hau Isaquebetã pashkayamashanũ, ẽ bake kayabi Isaque bestitũ ibu wakĩ bishanikiki. Haskawẽ taeshũ hatu nitxĩriwe”, aka

¹¹ Ismael hawẽ bake ma berunãwẽ dabanã Abraão shinaĩ hawẽ nui pes dakakẽ

^12-13 hanushũ Deusũ Abraão yuikĩ: “Mĩ dayaru Agar inũ mĩ bake Ismaelwẽ dabanã ikĩ shinaĩ pesyamawe. Haska Sarã mia yunuai keska hatu wawe. Haska ẽ mia yubanirã, Isaquewẽ taea minabu kayabi besti inũbarishãkanikiki. Hakia mĩ dayaru escravã bake mĩ bakeriwẽ taeshũ Ismaelĩ enabu itxapahairari ẽ mia hatu ashũriashanaii”, aka

¹⁴ haska washina penamahaira Abraão butushũ bitxi bishtuki ũpash maneshina inũ misi Agar hawẽ dayaru inãkĩ hau haya butanũbũ peumatã hawẽ huni bake berunãbe nitxiã bui Berseba mai pakea hanu tsua hiweriabumanu iaketani

¹⁵ hawẽ ũpash inũ hawẽ piti keyui ma netsukẽ hawẽ bake Ismael ũpash manuhairai ma babukẽ ni utapã namã hau dakayunũ yunua dakakẽ

¹⁶ henebaini uĩ benãta tsaushũ shinãkĩ: “Ẽ bake mawai ẽ uĩkatsi ikamaki”, ika hawẽ bakekiri petxitã tsaukẽ hawẽ bake kashaya

¹⁷ hanua hawẽ bakẽ hui Deusũ nĩkaya nai anushũ Deusũ nai tsumã Agar kenakĩ yuikĩ: “Agarĩ, mĩ haskai ikai? Mĩ bake ni utapã namã daka kashai Deusũ nĩkashuki. Miarã, dateyamawe, mã mawamakirã.

¹⁸ Benitã mĩ bakeri metsũshũ heneyamawe, mĩ bake Ismael duawakĩ hawenabu itxapa ẽ hatu wariashanairã”, atã

¹⁹ hanua Deusũ Agar ũpash inãkĩ txatxa uĩma kashũ bikĩ bitxi bishtuki txatxa ũpash mata washũtã hawẽ bake amanikiaki.

²⁰ Deusũ merabewakubainaya hawẽ bake Ismael ewai pia kuĩwẽ tsaka mebeyai dekuyakũkaini

²¹ Parã mai pakea betsa hanu tsua hiweabumanu hawẽ ewabe hiweaya txipu hawẽ ewã Egito anuabu aĩbu iweshũ aĩyã wãkĩ aĩbu bimanikiaki, hawenabu kayabi bimakinã.

Abimeleque Abraãobe yubakanamenibukiaki, na hãtxarã

²² Habiatiãri Gerar nawa shanẽ ibu Abimeleque hawẽ detenamenikabu shanẽ ibu betsa Ficolbe Abraão anu hushũ yuikĩ: —Mĩ Deusũ haibuki. Dasibi mĩ akai Deusũ mia merabewakubaĩmiski.

²³ Eskawẽ taea Deusũ nuku uiãyã ma mae anua ẽ mibe yubakaii, ea inũ, ẽ bakebu inũ, enabu pakubainaibu mia inũ minabu hau nuku txakabuwayamashanũbũwẽ. Ea yubawe. Mĩ nuku dapi hiweaya ẽ mia duawaima keska wakĩ ea inũ enabu na mai pakea anu nũ hiweabu habiaskari wakĩ nuku duawariapakeshãkãwẽ— aka

^24-25 Abraão nĩkatã kemakĩ: —Ẽ mia yubatiruki. Hakia mia yuinũ, nĩkawe, ea haska waimaburã. Mĩ tsumabũ ẽ ũpash kini ea mebĩmabuki. Ẽ mibe yubakaya minabũ nuku ana habiaska watirubuki— aka

²⁶ hanushũ Abimeleque Abraão nĩkatã kemakĩ: —Tsuabũ mia akimamẽ? Haska mia waimabu natiã ẽ hawa unãmaki. Mĩ ea yuiama ikima ẽ dama nĩkaii— aka

²⁷ hanua txashuwã itxapa inũ ina awa itxapa Abraão Abimeleque inã habe yubakai parananãtima ha dabe yubakanametã habias shabatiã

²⁸ hanushũ Abraão hawẽ txashuwã bake yushãs 7 katushũ pashkatã tari nitxĩkẽ

²⁹ haska wai Abimeleque uĩkĩ yukakĩ: —Haskakĩ mĩ txashuwã bake 7 yushãs mĩ katushũ tari nitxĩshumẽ?— aka

³⁰ Abraão kemakĩ: —Ha txashuwã bake 7 ẽ mia inã mĩ bishuwẽ taeshũ txanima dasibitũ unãkĩ: “Ha ũpash kini Abraão hatu pukĩmaniki”, akĩ unãshãkanikiki— aka Abimeleque txashuwã bikĩ: —Peki— itã ibuwaya

³¹ hanua ha dabe yubakaibuwẽ taeshũ ha ũpash pukĩ anu mae kenakĩ: “Bersebaki”, anibukiaki.

³² Berseba anua yubakanametã hawẽ detenamenikabu shanẽ ibu Ficol inũ Abimeleque hawẽ mae Filisteu nawabu hiweabu anu txĩtũbainibukiaki.

³³ Hanushũ Berseba anu hawẽ ũpash kini dapi hi betsa Abraão banatã hanua Senhor Deus hiwea ikibi ikabe hãtxakĩ kẽwanikiaki.

³⁴ Hanua haskai Abraão Gerar nawabu anu hatu dapi bai kani hawenabube hiwepaunikiaki, bari itxapa hanu Filisteu nawabu hiweabu anurã.