Gênesis 2 - Kaxinawá Bíblia (BR)

^1-3 Haska dayakĩ nai inũ, mai inũ, hiweabu dasibi damiwakĩ keyutã hawẽ dami daya menetã ana damiwama 7 dia shaba keyutã Deus huĩrukunikiaki. Haskawẽ taeshũ Deusũ hawẽ henea 7 dia shaba hawena wakĩ meribi wanikiaki, huĩrukũti wakinã.

Mae Éden anu huni hiwei taenikiaki, na hãtxarã

^4-5 Nai inũ mai hirabi Deus, hawẽ kena kayabi Senhor Deusuũ, hatũ damiwakẽ eskakubainibukiaki. Habũ bai uruti huni hayariamakẽ mai anu Deusũ ui imariamawẽ taea piti yunubu beneriamakẽ

⁶ hanũkaĩ basnũ mai anua kaĩkĩ mai bemetxa waya

⁷ Senhor Deusũ mai mishpu bitã damiwakĩ ha keska wakĩ huni hiwemanũ ishũ hawẽ dekĩ anu shũ aka huni haskai hiwei taenikiaki.

^8-9 Hariria bari huaikiri estekiria Éden anu Senhor Deusũ bai banakĩ mai anua hi hawẽruabu inũ hi piti bimiyabu benemashũ, bai nekia mibã hi bimiya ha pia hiwepakemati pepa inũ txakabu unãti hi benemariashũ ma huni damiwa iyushũ hari hiwemanikiaki.

¹⁰ Bai metxa wai Éden anua hene tashni habai taei hene tibi tesheshai 4 hene habai taenikiaki, heneirã.

^11-12 Hene ha dukũ hawẽ kenarã, Pisom inikiaki. Hanua Havilá hirabi datãbauna hanu ouro mane tashipa pepahaira inũ, bdélio mane inũ, sardônica hayanibukiaki.

¹³ Hene shesha betsa hawẽ kenarã, Giomki Cuxe hirabi datãbauna inikiaki.

¹⁴ Hene ha dabe inũ besti hawẽ kenarã, Hidéquel inikiaki. Hanua bari huaikiria Assíria datãbaina inikiaki. Hanua hawẽ henei hene dabe inũ dabe Eufrates inikiaki.

^15-17 Éden bai anu Senhor Deusũ huni iyushũ bai ibu wamakĩ mekemakĩ yuikĩ: “Na bai anu hi betsa betsapa bimi mĩ pitiki. Hakia pepa inũ txakabu unãti hi bimi betsa mepakeyamashãwẽ. Hamẽ mĩ kemukĩ piarã, mĩ mawashanaii”, iwanã, yuitã

¹⁸ ana shinãkĩ: “Huni ha mesti hiwearã, pemaki”, ishũ “Hau hatũ merabewapakeshanũ, ẽ damiwashuaiĩ, ha itsarã”, ishũ

¹⁹ hanua mai anua yuinaka daniyabu inũ peiyabu damiwashĩshũ: “Hau hunĩ harakirira hatu kenanũ”, ishũ Senhor Deusũ uĩmakĩ iwea hamapai yuinaka sharabu bestibu ha hunĩ hatu kenakĩ keyua hariri hatũ kena inibukiaki, ikibi ikirã.

²⁰ Haska inabu yuinaka inũ peiyabu inũ inabuma yuinaka hunĩ kenakĩ keyutã hakia ha keska hatũ merabewapakeshanai hayamakẽ

²¹ Senhor Deusũ hawẽ kushipawẽ huni ushã ushahairakẽ hawẽ pishi bestitxai tsekashũ namiwẽ shui buatã

²² ha pishi aĩbu wakĩ damiwashũ huni ushanu iyua huni bestẽtã

²³ yuikĩ: “Narã, hawẽ nami ẽ namiki. Hawẽ shau ẽ shauriki”, iwanã, “Huni anua tsekawẽ taeshũ kenakĩ: ‘Aĩbuki’ ”, anikiaki.

²⁴ Haskawẽ taea hunĩ hawẽ ibubu dapashkabaĩ aĩyainã, hawẽ aĩbe hiwei yura bestitxai keskati waniki.

²⁵ Hanua huni inũ hawẽ aĩ tariuma dakeama hiwei taenibukiaki.