Êxodo 16 - Kaxinawá Bíblia (BR)

Piti betsa uĩsbuma Deusũ hatu inãkubainikiaki, na hãtxarã

¹ hanua Elim anua Israelĩ enabu dasibi ana bui Egito mai pakea anua pashai buimabu ushe ha katxu shaba 15tiã hanu tsua hiweabumanu hawẽ kena Sim anu hikiabu Elim inũ Mati Sinai namakis anua

² hanua bunihairakĩ hune Moisés inũ Arãoki sinatakĩ habũ yuãkĩ

³ yuikĩ: —Egito anushũ kẽti nami mata inũ shekiwã misi mirima shaba tibi nũ yanihairawakubainaibũ Senhor Deusũ buni tenemakĩ unãshubira nuku debuwaya Egito anu pe nũ ikeanimaki. Hakia nenu hanu tsua hiweabuma anushũ nuku buni tenemakĩ unãshubira nuku dasibi debuwanũ, iwanã, shinãkĩ mã nuku iweshinaki— iake iakeaibũ

⁴ hanushũ Senhor Deusũ Moisés yuikĩ: —Piti nai anua ui keska wakĩ ẽ matu niri ashuaiĩ. Ha yurabũ shaba tibi kaĩbaĩ hati ha shabatiã besti pitirubu hau itxawakubaĩshanũbũwẽ. Tsuabũra ẽ yunuti nĩkaibu inũ tsuabũra ea nĩkabuma ẽ hatu unãti wakatsis ikaii.

⁵ Hanua huĩrukũtitiã ana hawa piti bitirubumakẽ ha huĩrukũti iriamakẽ semana tibi shaba mekẽ bushkatitiã hanu piti itxapa dabeki bitã hatũ hiwe anu hau bushũ arukubaĩshanũbũwẽ— aka

⁶ Moisés inũ Arãonẽ nĩkashũ hatu yuikĩ: —Egito anua Senhor Deus bestitũ matu iweimarã, na bari kaya haska unãtã mã kẽwãshanaii.

⁷ Haska inũ, Senhor Deusũ kushiparã, penama mã uĩshanaii. Haska Senhor Deuski mã haki ha ikai matu nĩkakubainikiki. Uĩrakãwẽ. Nuku dabetũ haska Deuskiri nũ matu yuibiakubaina haskai mã nukukiri ha iriakũkainai?— hatu wa

⁸ Moisĩ ana hatu yuikĩ: —Mã Senhor Deus yuaĩ nĩkashũ mã pinũbũ bari kaya nami matu inã mã yani wanũbũ penaya misi itxapari matu inãriashanikiki. Mã nukuki ha ibiaya nukurã, nũ hawamaki. Hakia nukuki ha ikama nukũ mekenika Senhor Deuski mã ha ikaii— hatu watã

⁹ hanushũ hawẽ betsa Arãori Moisĩ yuikĩ: —Israelĩ enabu dasibi eska hatu yuiwe: “Matũ ha iti hãtxa matu nĩkaiwẽ taea ha kuĩ nai anua butua anu Senhor Deus bebũ itxakãwẽ”, akĩ hatu ea yuishũwẽ— akaya

¹⁰ haska Moisĩ Arão yuishu Israelĩ enabu hatu yui hãtxaya hari tsua hiweabumakiri uĩ dabekeaibũ hawẽ kushipa hatu uĩmakĩ nai kuĩ butua txasha txasha ikaya

¹¹ Senhor Deusũ Moisés ana yuikĩ:

¹² —Israelĩ enabũ ha ikaibu hatũ hãtxa ẽ nĩkashuki. “Bari kaya mã nami piaii. Hanua penaya misi pikĩ yanihaira watã ẽ earã, ‘Ẽ matũ mekenika Senhor Deus’, mã unãhairashanaii”, akĩ ea hatu yuishũwẽ— aka habias hãtxari Moisĩ hatu yuiaya

¹³ hanua bari kaya kuma keska mirimahaira nuyabirani hanu hatũ ushati tari hiwe pũtebaunabu anu butuabu atxishũ deteshũ bawashũ piabũ penayari nibi itxapatũ mai metxa wabia

¹⁴ ma tsusĩkẽ mai anu hawara atsa nisa keska duru mania

¹⁵ uĩ unãbuma yuka iki: “Habaa! Hawamẽ?” ikaibũ atimas Moisĩ hatu yuikĩ: —Mã ha pinũbũ ha misi Senhor Deusũ matu inãkubaĩshanikiki.

¹⁶ Senhor Deusũ ea yuishina matu yuinũ ea nĩkakãwẽ. Bari tibi hati mã pitirubu hiwe ibu tibitũ hau itxawakubaĩshanũbũwẽ. Matũ hiwe tibi anua hati yurabu tanatã matube hiweabuti 2 litro yura tibituna itxawakĩ bishũkubaĩkãwẽ— hatu wa

¹⁷ haska hatu yuishu keska misi bikĩ hiwe ibu tibitũ hatiritũ itxapa bikĩ betsabũ hatũ yura tanabaĩ eskarabes duakabi bushũ yaniwabũ

¹⁸ haska Deusũ hatu tanashina keska txibãkĩ txitxãki tanashũ itxapa buabu dasibitũ pikĩ keyuabu teshe hayabuma hanua itxapama duakabi buabu pi hawa buniama hati hatũ piti misi tanashũ bikubainibukiaki.

¹⁹ Moisĩ ana hatu yuikĩ: —Matũ piti hawa teshe wataskayamakãwẽ, arukinã— hatu wabia

²⁰ hawa nĩkama hatiritũ: “Meshukiri pishanũ”, iwanã, teshe aruabu penaya txapui pisi maiyai shenahairakẽ haska uĩtã hatuki Moisés sinatahairaya

²¹ hanua penaya tibi hati hawenabũ pitirubu hiwe ibu tibitũ itxawakubainaibũ bari kukĩ ha misi payukĩ keyuaya

²² ha mekẽ bushkati shabatiã sexta penaya hawenabu tibi tanabaĩ mã bishiã ana binumakĩ habia tiri yura tibituna 4 litro hati shaba dabe pitirubu bitãshũ shanẽ ibubu beshmasbu Moisés anu bushũ haska yuiabu

²³ hatuki sinatama Moisĩ hatu yuikĩ: —Narã, Senhor Deusũ ea yuishinaki. Meshukiri huĩrukũtitiã sábado meribiki. Hanu nukũ mekenika Senhor Deus nũ kẽwãshãkanaii. Hawara shuikatsi ikĩ natiã shuitirubuki. Hawara huakatsi natiã ikis huatirubuki. Ikis pitã hawẽ teshe arukãwẽ, meshukiri pitirã— hatu wa

²⁴ haska Moisĩ hatu yuia shinãkĩ pitã hawẽ teshe aruabu penaya hawa txapuama shena hayamakẽ

²⁵ hanua Moisĩ ana hatu yuikĩ: —Senhor Deus kẽwaĩ mã huĩrukũwaĩwẽ taeshũ piti tesheshina ikis pikãwẽ, na shaba sábadotianã. Habia shabatiãri nai anua misi piti mã ana hawa biamaki.

²⁶ Hakia ha mekẽ bushka shabatiã penaya mã itxawatirubuki. Hamẽ metuti shaba huĩrukũtianã, hanu daya hayama ikũkaĩshanikiki— hatu wabia

²⁷ hatiritũ nĩkama kaĩbaĩ metuti shaba sábadotiã: “Misi itxawanũ”, ika bushũ hawa betxiabumahairakẽ

²⁸ hanushũ Senhor Deusũ Moisés ana yuikĩ: —Ẽ yunuti hãtxa inũ ẽ yusiã hãtxa mã danainã, hatiã mã beshtekeshanai, ẽ ana matuki sinatayamashanunã?

²⁹ Nĩkakãwẽ. Ha huĩrukũtitianã, matũ huĩrukũtiki. Mekẽ bushkati shaba penaya dabeki piti ea Senhor Deusũ ẽ matu inãkubaĩshanaii.

³⁰ Haskakẽ shaba metuti tibi huĩrukũtitianã, matũ mae anu hawa dayai buyamakubaĩshãkãwẽ, hakimamarã— hatu wa

³¹ Narã, nai anua misi piti Israelĩ enabũ yuikĩ: “Manáki”, akĩ kenapaunibukiaki, heshe hushupa coentro bimi keskarã, hawẽ nis buna batapa kapã keskarã.

³² Txipu Moisĩ ana hatu yuikĩ: —Senhor Deusũ yunuti matu yuinũ ea nĩkakãwẽ. “Egito anua matu iweshũ nenu hanu tsua hiweabuma anushũ misi ẽ matu pimaima matunabu pakubaĩkĩ hau uĩkubaĩshanũbũ ha piti maná bishtu litro dabe mata watã hatu arushũkubaĩkãwẽ”, akĩ ea yuishinaki— iwanã,

³³ hawẽ betsa Arão yuikĩ: —Haki aruti kẽti beputiya bishũ nai anua misi litro dabe mata washũ haki aruti kẽti merã naneshũ beputã nukunabu pakubaĩkĩ hau uĩkubaĩshanũbũ Senhor Deus bebũ hawẽ hatube yubakani hãtxa aruni bau merã tsaũwẽ, nukunabũ hau hatu arushũkubaĩshanũbunã— aka

³⁴ haska Senhor Deusũ Moisés yunushina keska wakĩ hau hatu arushũkubaĩshanũbũ ha dukũ haska bebũkiri hatube yubakani hãtxa aruni bau merã nai anua misi Arãonẽ arukĩ tsaunikiaki.

³⁵ Bukubaũkĩ hanu tsua hiweabuma anushũ Canaã mai pakeanu hikiriama 40 ano nai anua misi Israelĩ enabũ piyukubaunibukiaki. Hanua hanu yurabu hiweabu anu ma hikiabũ Senhor Deusũ ha misi ana hatu inãma inikiaki.

³⁶ Hatũ nai anua misi tanati, litro daberã, hawẽ kena gômerki. 10 gômerã, efa bestitxaiki.