Êxodo 14 - Kaxinawá Bíblia (BR)

Israelbu Ianẽwã Tashipa pukebainibukiaki, na hãtxarã

¹ ana penaya Senhor Deusũ Moisés ana yuikĩ:

² “Txĩtũkirã Pi-Hairote dapi Migdol inũ Ianẽwã Tashipa namakis hatũ tari hiwe ana hau pũteshanũbũ hatu yuiwe, Baal-Zefom besuuri ianẽwã kesha anu hau ushanũbunã.

³ Mã haskaya Faraónẽ matukiri shinãkĩ: ‘Txĩtũ keshtukũkaini hani kati unãma ma benuabuki. Hanu tsua hiweabumanu bui hani butirubumaki’, ikĩ matu shinãshanikiki.

⁴ Hanushũ ana Faraó ẽ nĩkaisma wakẽ patapakĩ matu ana atxinũ ishũ hawẽ detenamenikabubetã Faraónẽ matu txibãshanikiki. Matu haska waya Faraó inũ hawẽ detenamenikabu ẽ hatu yamawaiwẽ taeshũ ‘Earã, ẽ Senhor Deus emebi ẽ hiwearã’, hawenabu Egito nawabũ ea hanu unãkayabishãkanikiki”, akĩ hatu unãmashũ Senhor Deusũ hatu yunua Israelĩ enabu txĩtũbiranaibũ

⁵ “Israelĩ enabu ma pashashinabuki”, akĩ Egito nawa shanẽ ibuhaira Faraóki txaniabu hawẽ shanẽ ibu beshmasbubetã Faraónẽ shinã betsawatã: “Nũ hawa shinãmakẽ pashaibũ nũ hatu nemama ishiãki. Nuku tsuã ana dayashũtirumaki”, iki yuinamea akeakeaibũ

^6-7 hanua Faraónẽ hatu txibãkatsi hawẽ cavalo tarãbaĩti hau pewanũbũ hatu yunua ma pewakĩ keyuabu 600 cavalo tarãbaĩti pepas inũ cavalo tarãbaĩti itxapa betsa pe beshmas dasibi Faraónẽ hatu itxawamatã shanẽ ibu beshmasbũ habũ tarãbaĩti shukua tibi hatu yunukubainaibu hatu txibãmakĩ: “Israelĩ enabu atxinũ”, ika bukĩ Faraónẽ hawẽ detenamenikabubetã hatu txibãbainaibũ

⁸ Senhor Deusũ Faraó nĩkaismakĩ huĩti kushiwatã hanua Israelĩ enabu pashaibu Senhor Deusũ hatu kushipawaya kaĩbaĩshinabu Faraónẽ shinãma hatu atxikatsis ikaya

⁹ cavalo tarãbaĩti anu mapubainaibu inũ cavaloki katsaumebainaibu hawẽ detenamenikabu habu dasibibu Faraóbetã Israelĩ enabu atxinũ ika txibãbaini Pi-Hairote dapi Baal-Zefom besuuri ianẽwã kesha anu hatũ tari hiwe pũtebaũshinabu anu bui ma bari kaya hatuki kemai

¹⁰ Egito detenamenikabu kushibiranaibũ uĩ Israelĩ enabu datehairakĩ hau Senhor Deusũ hatu merabewanũ kashai keskakĩ Senhor Deus yukabiakĩ

¹¹ Moisés hãtxa txakabuwakĩ yuikĩ: —Egito nawabũ nuku tenanũ ika bekanikiki. Hari Egito anua nũ mawa hani nuku mai watirubumakẽ nenushũ nuku tenanũ, iwanã, mĩ nuku tashnimabirashinamẽ, tsua hiweabuma anushũ nuku tenã bestinũ ikarã?

¹² Hanu tsua hiweabumanua mawama Egito nawabu nũ ana hatu dayashũkubainaii, akĩ uatiã mia yuikĩ: ‘Nuku heneribaĩwẽ’, akĩ Egito anushũ nũ mia yuimaki— akĩ yuiabu

¹³ Moisĩ hawenabu hatu kemakĩ: —Datei babuama mesteĩ huĩti kushitã manakãwẽ. Haska hatu maemakĩ Senhor Deusũ matu merabewai samama mã uĩshanaii, ha yurabu matube bei matuki kemariabuma ana mã hatu uiãma ishanaii.

¹⁴ Hawawẽra Senhor Deusũ matu hatu nemashunaya pes mapushũ mã hatu uĩshanaii— hatu waya

¹⁵ hawaira Senhor Deusũ Moisés ana yuikĩ: —Datebiakĩ haskakĩ mĩ ea yukai? Bari huaikiri hau bushanũbũ hatu yuiwe.

¹⁶ Hanua mianã, mĩ mestẽti hi hene bemaki sanãkĩ hene pashkawe, hatu dami washũkinã. Mĩ haska wakẽ mai tsusĩkẽ hanu bui paibaĩkĩ ianẽwã namakis Israelĩ enabu mibe pukebaĩshãkanikiki.

¹⁷ Hakia eanã, hatu uĩmakĩ hau matu txibaĩ ianẽwã namakis hikibainũbũ Egito nawabu hatu nĩkaisma huĩti kushi washũ Faraó inũ, hawẽ detenamenikabu inũ, hatũ cavalo tarãti inũ, habu cavaloki katsaũmeabu dasibi yamawakĩ yura dasibi ẽ kushipa ẽ hatu uĩmashanaii, hau hakimama shinãkubaĩshanũbunã.

¹⁸ Haska hatũ cavalo tarãtiki mapubainabu inũ, hatũ cavalo katsaumeabu inũ, hatũ shanẽ ibuhaira Faraó debuaiwẽ taeshũ: “Ea ẽ Senhor Deus emebi ẽ hiwea”, haska unãkubaĩshãkanikiki, Egito nawa dasibibunã— aka

¹⁹ nai kuĩ buru tsaua kayãbis Israelĩ enabu bebũ kai Deusũ nai tsumapã hawaira hatu betsa washũkĩ bebũ kai maewakĩ

²⁰ nai kuĩ meshu wakĩ Egito nawa detenamenikabu inũ Israelĩ enabu namakis nitxĩtã Egito nawabukiri hatu meshu watã hanua Israelĩ enabu anu hatu shabawabainaya hanua Egito nawabũ Israelĩ enabuki hawa hatuki nukuama ishiaĩbũ

²¹ habiatiãri hene bemaki hawẽ mestẽti hi Moisĩ sanãkẽ bari huaikiria niwe kushipahaira shũku imashĩkĩ Senhor Deusũ ianẽwã pashkakĩ ha namakis mai tsuĩ wãkĩ dami wakĩ keyukẽ

²² hanua yusiuri inũ yusmauri kebẽkĩ kene keska huyũkĩ hene dabe wakẽ ha namakis mai tsusĩ anu Israelĩ enabu pukebaĩbainaibũ

^23-25 haska washũ Senhor Deusũ ana hatu nemama Israelĩ enabu pukei keyuaibũ Faraónẽ hatu uĩtã hatu yunua hawẽ detenamenikabu cavalo katsaumeabu inũ cavalo hawẽ tarãbaĩtiki mapubainaibu dasibitũ habũ atxitanũ ika buaibu hau hene haki dasiwakĩ namakis hikikaĩkĩ hatu txibaĩ pukebaini ianẽwã namakis anu buaibu penaya txi here buru tsaua inũ nai kuĩ kayãbis merãshũ Egito nawa detenamenikabu hatu uĩkĩ hatũ cavalo tarãbaĩti tae txakabuwakĩ hani katiruma wakĩ hatu bika tenemakĩ Senhor Deusũ hatu itxakawaya Egito nawa detenamenikabu yuinamei: —Hatũ mekenika yushĩ Senhor Deusũ nuku itxakawaikiki. Txĩtuĩ pasharinãkãwẽ— ikaibũ

²⁶ ianẽwã kesha betsauri Israelĩ enabu pukei mapekei keyuabũ Senhor Deusũ Moisés ana yunukĩ: —Ianẽwanẽ Egito detenamenikabu hau hatu atxinũ hene bemaki mĩ mestẽti hi ana sanãwẽ— aka

²⁷ ianẽwã bemaki hawẽ mestẽti hi Moisĩ ana sanãkẽ Egito detenamenikabu pashapanãbũ penaya ianẽwã ana haki dasiwakĩ hene merã Egito detenamenikabu Senhor Deusũ hatu atximakĩ bitxikĩ keyunikiaki.

²⁸ Israelĩ enabu hatu atxinũ ika ianẽwanu Faraónẽ detenamenikabu hatu txibaĩ hikibainaibũ hene ana haki dasikĩ hatu atxia hawẽ cavalo tarãbaĩtiki mapuabu inũ cavalo katsaumebainaibu tsua hawa pashama

²⁹ hakia bebũkiri mai tsusĩ anu bui yusiuri inũ yusmauri hene pashka dabea namakis Israelĩ enabu pukebainaibũ

³⁰ Egito detenamenikabũ hatu atxipanãbũ Senhor Deusũ Israelĩ enabu hatu merabewakĩ Egito detenamenikabu hatu hasa mashi anu mawa maniabu uĩkĩ

³¹ haska hawẽ kushipawẽ Senhor Deusũ hatu kupishu uĩshũ hatũ mekenika Senhor Deus kẽwaĩ haki mesekĩ hawẽ tsuma Moiséskiri mesekĩ ha dabetũ hãtxa Israelĩ enabũ ikũhairawanibukiaki.