Ester 8 - Kaxinawá Bíblia (BR)

Yunuti bena Judeu nawabu keneshunibukiaki, na hãtxarã

¹ habias shabatiã Judeu nawabu maemanũ ika ishiã Hamãnẽ hiwe inũ hawẽ hamapai haya mebĩtã shanẽ ibuhaira Assuerõ Ester inãkẽ Esterĩ Assuero yuikĩ: “Eska betsa mia yuinũ ea nĩkawe. Mardoqueurã, ẽ epa betsã bakeki, ea hatũ yumewani ẽ nãtakea puirã”, akaiwẽ taeshũ

² hau teneshnũbũ Hamã iyuriabuma Assuerõ hawẽ meitxikiti mebĩshũ ibubis ana sawea shanẽ ibu wakĩ hawẽ meitxikiti metsekeshũ Mardoqueu inã saweriaya hawara sharabu Hamã hayakũkaĩshina hawẽ mabu mekeshunika wakĩ Esterĩ Mardoqueu katutã

³ habiatiãri kashai hawẽ beũ hene titiki iki Assuerõ tae bebũ dakashũ Judeu nawabu dasibi hau tenãshanũbũ hatube yubakakĩ txakabuwakĩ Hamãnẽ hatu yunuima hau ha txibãkĩ ayamashanũbũ hau hatu nemakĩ beshteshũshanũ Esterĩ ea akĩ ana hãtxa wakĩ taewaya

⁴ hau habe hãtxanũ hawẽ shanẽ ibũ ouro mestẽti haki sanã Ester benikaũ nishũ

⁵ Assuero yuikĩ: —Txanima kayabi ea betxipaikĩ mĩ ewẽ benimaimẽkaĩ. Mĩ nukũ shanẽ ibukẽ haska ẽ mia yukai pemẽkaĩ. Hawara ẽ mia ea akai pe shinãkĩ Hamedatã bake Hamãnẽ yunuti hãtxa hatu bumaima nemakĩ hau ayamashanũbũ mĩ ana kene bena wakĩ nuku hatu yunushũtiruki, hanu província tibi mĩ yunumis anushũ Judeu nawabu hau tenãyamashanũbunã.

⁶ Enabu Judeubu dasibi inũ enabu kayabi hatu detekĩ txakabuwaibu uĩ datekĩ ẽ haska tenetirumaki— aka

⁷ shanẽ ibuhaira Assuerõ kemakĩ hawẽ aĩ kayabi Ester inũ Mardoqueu yuikĩ: —Judeu nawabu dasibi hatu tenãmakatsis ikimawẽ taeshũ teneshkãshuki. Hamapai sharabu Hamã hayakũkaĩshina ẽ ma mia ibuwamashuki.

⁸ Nukũ yunuti hãtxa shanẽ ibuhairatũ kenaya ẽ meitxikiti keneyãwẽ ma netãbu ha yunuti hãtxa tsuã nemakĩ betsa watirumaki. Hamãnẽ yunuti hãtxa eãri ẽ nematirumaki. Hakia Judeu nawabu merabewakĩ harakiri mã shinaĩ haska mã betxipaiaikiri mã nematiruki. Hakia ẽ kenawẽ ẽ shanẽ ibu beshmasbu hatu nemama mã yunuairã, hau hatu anu bushanũbũ ana kene betsa watã ẽ meitxikiti ẽ kenayãwẽri netãpaketã Judeubu merabewakĩ mã hatu bumatiruki— hatu wa

⁹ ushe 3tiã hawẽ kena Sivã shaba 23tiã shanẽ ibuhairatũ keneshunikabu hawaira Mardoqueũ hatu kena bei itxashũ maewã bari huaikiria Índia anua taekirana 127 província bari kaikiri inũ sulkiri Etiópia anu depia hanu Assuerõ hatu yunumis anu hiweabu Judeu nawabu shukuabu tibi inũ, maewã yununikabu tibi inũ, província yununikabu tibi inũ, yura shukuabu betsa betsapa shanẽ ibubu tibi hau hatu bushũtanũbũ habũ hãtxa inũ haska kenemisbuwẽ Mardoqueũ yunuti bena hatu kenemabu

¹⁰ kene tibiki shanẽ ibuhairatũ kena “Assuero” Mardoqueũ keneshũ shanẽ ibuhairatũ meitxikiti kenayawẽ netãpakekĩ keyushũ shanẽ ibuhairatũ cavalo mirima anua kushibaĩmisbu katuabu ha cavaloki katsaumebaĩkĩ kene tibi bushũ hau hatu inãbaũtanũbũ Mardoqueũ hatu yunua buabu

^11-12 kene tibi anu eska shanẽ ibuhairatũ Judeu nawabu yunua habias shaba Hamãnẽ katuima ushe 12tiã hawẽ kena Adar inũ shaba 13tiã hanu Assuerõ hatu yunumis província tibi anushũ habias shaba bestitxaitiã hatũ hiwea mekei hatu nemanũ ika hanira mae betsa betsapa hiwebaunabu anu Judeu nawabu itxatirubuki. Tsuara yura shukuabu inũ haratura província anu hiweabũ hatu detenũ ika detetiya beaibu Judeu nawabũ hatu detekĩ tenãkĩ hatũ aĩbuaibu inũ hatũ bakebu dasibibuwẽ hawa nuiama hatu yamawakĩ keyutã hatũ hamapai sharabu hayashinabu mebĩkĩ ibuwatirubuki.

¹³ Hatuki sinataibu hatu kupinũ, iwanã, Judeu nawabũ hau pewakubaĩshanũbũ província tibi inũ dasibi hanu hiwebaunabu tibi hatu banabimakĩ keyubaũkĩ na yunuti hãtxa shanẽ ibuhairatũ hãtxa keska yununikabũ hau hatu unãmakubaĩshanũbũwẽ.

¹⁴ Shanẽ ibuhairatũ hatu yunuawẽ taea kene bunikabu cavaloki katsaumetã hawa manama hawaira kaĩbaini buabũ shanẽ ibuhairatũ maewã kushipa Susã anu habias yunuti hãtxa hatu banabimai hatuki txaniriabaunabu

¹⁵ shanẽ ibutã sãpu tima tari nãketapa inũ hushupa sawea mane ouro maiti hawẽrua sawea shanẽ ibũ yabukuti tari mãyunepa tashi ushna duakabi peyabukukaini shanẽ ibuhairatũ hiwe anua Mardoqueu tashnikainaya Susã anu hiweabũ uĩtã benimahairai sai sai ikubainaibũ

¹⁶ ha dikabi Judeu nawabu hatũ benima paewẽ uĩ huĩti benimai ana dateama besibaunaibũ

¹⁷ hanira província tibi inũ mae tibi inũ hiwebaunabu anu shanẽ ibuhairatũ yunuti bei hikiabu yununikabũ hatu banabimabuwẽ taea Judeu nawabu benima txakayamai piti washũ pi besibaunaibũ ha dikabi Judeu nawabũ hatu maematã hamapai sharabu haya hatu mebĩtirubuwẽ taea hatuwẽ datei nawa betsa betsapabia: “Nũ Judeu nawaki”, ikubainibukiaki.