Esdras 7 - Kaxinawá Bíblia (BR)

Jerusalém anu Esdras hawenabube hikinikiaki, na hãtxarã

¹ Txipu bari itxapa kaya Pérsia nawa shanẽ ibuhaira bena hawẽ kena Artaxerxesĩ hatu yunukubainaya hawenabu Deusbe hãtxashunika hawẽ kena Esdras Pérsia anu hiwea hawenabu hati inikiaki. Esdrasĩ eparã, Seraías inikiaki. Seraíasĩ eparã, Azarias inikiaki. Azariasĩ eparã, Hilquias inikiaki.

² Hilquiasĩ eparã, Salum inikiaki. Salumnẽ eparã, Zadoque inikiaki. Zadoquẽ eparã, Aitube inikiaki.

³ Aitubẽ eparã, Amarias inikiaki. Amariasĩ eparã, Azarias inikiaki. Azariasĩ eparã, Meraiote inikiaki.

⁴ Meraiotẽ eparã, Zeraías inikiaki. Zeraíasĩ eparã, Uzi inikiaki. Uzĩ eparã, Buqui inikiaki.

⁵ Buquĩ eparã, Abisua inikiaki. Abisuã eparã, Finéias inikiaki. Finéiasĩ eparã, Eleazar inikiaki. Eleazarĩ eparã, Arão ha dukũ hawenabu Deusbe hãtxashunika ipaunikiaki.

^6-7 Israelĩ enabu mekenika Senhor Deusũ hawẽ yunuti hãtxa inũ hawẽ nemati hãtxa Moisés yuia Moisĩ keneni ibubis tapĩhairanishũ Esdrasĩ hatu yusĩkubaĩmiswẽ taeshũ Esdras Senhor Deusũ merabewai uĩkubainaiwẽ taeshũ shanẽ ibuhaira Artaxerxes anu kashũ Esdras haskakatsis ikĩ yuka: “Peki”, akimawẽ taea shanẽ ibuhaira Artaxerxesĩ hatu yunui 7 ano kaya Babilônia anua Jerusalém anu txĩtuĩ Esdras hati hawenabuya hunikiaki, hatiri Deusbe hawenabu hãtxashunikabu inũ, Levĩ enabu inũ, kãtamisbu inũ, beputi mekenikabu inũ, Deus kẽwãti hiwe dayarubu Esdrasbe buirã.

^8-9 Artaxerxesĩ hatu yunukubaini ma 7 ano kaya ha shaba ha dukũ inũ, ushe ha dukũ ikaitiã Babilônia anua unanuma tashni taebirani maĩ bukubainaibũ Senhor Deusũ hatu duawakĩ merabewaya shaba ha dukũ inũ ushe 5tiã Jerusalém anu hikinibukiaki.

¹⁰ Haska Senhor Deusũ yununi hawa betsa wama mestẽwãkatsi ikĩ uĩkubaĩkĩ hawẽ yunuti hãtxa inũ hawẽ nemati hãtxa hawenabu yusĩkĩ hatu txibãmashanũ, iwanã, Esdrasĩ shinanikiaki.

¹¹ Israelĩ enabu hawenabu hau hatu txibãmashanũ, iwanã, hawẽ yunuti inũ hawẽ nemati hãtxa Senhor Deusũ yusini unãhairai hawenabu Deusbe hãtxashunika Esdras yusinika inãkatsi ikĩ eska hãtxa shanẽ ibuhaira Artaxerxesĩ hatu kenemashũ Esdras inãni habias hãtxa huni betsã ana keneni uĩkãwẽ:

¹² “Ẽ ea Artaxerxes shanẽ ibuhairatũ shanẽ ibubu itxapa ẽ hatu yunukubainai Deus nai anuatũ yunuti hãtxa unãhairai hawenabu Deusbe hãtxashunika Esdras hau unanuma kakũkaĩshanũ, iwanã, ẽ hakiri matu shinãmaii.

¹³ Hanu ẽ mai pakea anua ẽ hatu yunubaunai anu Israelĩ enabu dasibi hiwebaunabu Jerusalém anu mibe bukatsi ikaibu butirubuki. Israelĩ enabu Deusbe hãtxashunikabu inũ Levĩ enaburi buriatirubuki.

¹⁴ Deusũ yusini hãtxa mĩ haya txibãkĩ Judá enabũ mai pakea anu inũ Jerusalém anu haskara hiwebaunabu uĩkĩ mĩ tapĩkubaũshanũ ea shanẽ ibuhaira inũ ẽ 7 unanepã ea merabewamisbũ nũ mia yunuaii.

¹⁵ Israelĩ enabũ mekenika Deus Jerusalém anu hiwea pe shinãkĩ hawa yaushiama prata pei heshe inũ ouro pei heshe nũ mia inãkuiaĩ butãwẽ.

¹⁶ Ha dikabi Babilônia mae hatiubumanu hiwebaunabũ pei mia inaĩbu bikĩ itxawatã Jerusalém anu Deus kẽwãti hiwe waibu hau hawẽ hatu merabewakubaĩshanũbũ pe shinãkĩ yaushiama minabu yurã kaiã inũ minabu Deusbe hãtxashunikabũ pei inãkuĩriaibu buriatãwẽ.

¹⁷ Jerusalém anu matũ mekenika Deus kẽwãti hiwe anu hawẽ txi tapu anushũ hau menukĩ keyushũkubaĩshanũbũ ina awa bake inũ, txashuwã bene inũ, txashuwã bake inũ, habuyabi menuti shekiwã trigo inũ, uva vinho na peiwẽ hati bikubaĩshãwẽ, hawa mina wamarã.

¹⁸ Deusũ haska betxipaikĩ mia shinãmai txibãkĩ ouro pei heshe inũ prata pei heshe teshewẽ haska pe shinãkĩ mia inũ mibe dayamisbubetã mĩ haskara wakubaĩtiruki.

¹⁹ Ha inũ, mĩ mekenika Deus kẽwãti Templo anushũ hawẽ kẽwãti mabu nenu benibu mia inãshinabu bushũ Jerusalém mekenika Deus bebũshũ ana inãkĩ tsaũbaũshãwẽ.

²⁰ Mĩ mekenika Deus kẽwãti hiwe anu hawara mabu betsa hayama binũ, iwanã, ẽ pei mekenikabũ aruti hiwe anua hawara bikatsi ikĩ ha pei mĩ bitiruki.

²¹ Haska inũ, mã enaburã, ea ẽ shanẽ ibuhaira Artaxerxesĩ Hene Eufrates bari kaikiri anua mã pei mekenikabu dasibi ẽ matu yunuaii. Deus nai anuatũ yunuti hãtxa unãhairai Esdras hawenabu Deusbe hãtxashũmistũ hawara dasibi matu yukai hawaira inãshãkãwẽ.

²² Hatirã, 3.300 quilo prata mane inũ, 22.000 litro shekiwã trigo inũ, 2.200 litro uva vinho inũ, 2.200 litro piti sheni hati hawa binumama inãkĩ hatira sal bikatsis ikĩ matu yukai hawa tanama inãshãkãwẽ.

²³ Haska Deus nai anuatũ hawẽ hiwe anu hayakatsi matu yukai sinatamama hawaira inãkubaĩshãkãwẽ, hau ea inũ ẽ huni bakebu inũ hatishũ nukũ mai pakea ẽ matu yunuai nĩkaibu anu hawẽ kupiti hau nuku yunuyamashanunã.

²⁴ Jerusalém anu Deus kẽwãti hiwe anu dayamisbu inũ, Deusbe hawenabu hãtxashunikabu inũ, Levĩ enabu inũ, kẽwaĩ kãtamisbu inũ, hawẽ hemaĩtĩ beputi mekemisbu inũ, merabewanikabu inũ, dayarubu imposto mã hatu yukayamakubaĩshanũbũ ẽ matu nemaii. Na yunuti hãtxa nĩkakĩ mã ẽ mekenikabunã, haskaki nĩkairakãwẽ.

²⁵ Hamẽ miarã, Esdrasĩ, ea nĩkawe. Haska mĩ mekenika Deusũ mia tapĩmakĩ yusĩmis txibãkĩ Hene Eufrates bari kaikiri hene kesha betsauri hiweabu mĩ mekenika Deusũ hãtxa unaĩbu inũ unãbuma hatu yusĩkubaĩwẽ. Ha inũ, hau habũ mae mekekĩ yununũbũ hatũ yununika kushipabu katukĩ hatũ shanẽ ibu beshmasbu katukĩ hatu yunushãwẽ, hau habũ hawa kaneama hatu pe mekekĩ yunukubaĩshanũbunã.

²⁶ Mĩ mekenika Deusũ yunuti hãtxa inũ hawẽ nemati hãtxa inũ ea Pérsia nawa shanẽ ibuhairatũ ẽ yunuti hãtxa inũ ẽ nemati hãtxa danãkĩ txibãbuma hawaira hau hatu kupikubaĩshanũbũwẽ, tenaĩmẽkaĩ, ana mae betsa txaihaira anu nitxĩmẽkaĩ, pei itxapa biãkĩ kupimẽkaĩ, bitxiti hiwe anu bitximẽkaĩ. Hatiski, ẽ hãtxarã”, atã haska Artaxerxesĩ kenemanikiaki.

Esdras Deus kẽwaĩ habe hãtxanikiaki, na hãtxarã

²⁷ Eskawẽ taeshũ Esdrasĩ Deus kẽwãkĩ yuikĩ: “Nukũ shenipabũ mekenika Senhor Deusuũ, mĩ pepahairaki. Jerusalém anu mĩ kẽwãti hiwe ana atimapa uĩkatsi ikama hau pewanũbũ Pérsia nawa shanẽ ibuhairatũ shinã mĩ pe shinãma hatu yunua akimabuki.

²⁸ Habiaskari wakĩ ea shinã txãkãwãkĩ hatu bebũshũ hatũ shanẽ ibuhaira inũ, hawẽ unanepabũ merabewamisbu inũ, hawẽ shanẽ ibu beshmasbu hatuwẽ ea nuimakĩ mĩ hatu ea betxipaimaimaki. Haskawẽ taea Jerusalém anu Israelĩ enabu shanẽ ibubu unanepabu hau ebe txĩtunũbũ hatu itxawatã ẽ hatube txĩtuĩmaki”, akĩ Esdras Deusbe hãtxakĩ yuinikiaki.