Efésios 2 - Kaxinawá Bíblia (BR)

Deusũ Cristowẽ nuku hawenabu wamiskiaki, na hãtxarã

¹ Uatiã matu hiwearã, txakabu betsa betsapa aki Deusuma pashka mawawẽ datei mã hiwenibuki,

² na mai anushũ yura txakabubũ akai txibaĩ yushĩ txakabu shanẽ ibũ shaba natukã anu nishũ hawẽ xinãnẽ hatu yunuaitũ habũ benimawai keskai xinãkĩ Deus nĩkakĩ txibãmarã.

³ Haskawẽ taea uatiã nukubu nũ hiwea habiaskasri nũ iyunibuki, nukũ xinãnẽ txakabu abukĩ txibaĩ hiwea kemu pae tibi nukũ yurã yunuai xinaĩ ha ashũkĩ meneirã. Haskawẽ taea hawẽ nuiti nukukiri nũ hayamakẽ txanima Deusũ nuku kupitiru nũ inibuki, betsabũ ikũwãma ikaibu keskairã.

⁴ Hakia Deus nui heneisma nukuwẽ nuitxakayamakĩ nuku duahairawakĩ

⁵ nukũ txakabũ nuku beshea nũ mawa keskabiakẽ Cristo Deusũ yunua huni mawa ana bestẽwãtã hawẽ taeshũ nuku hiwea inãniki. Hawẽ pepawẽ taeshũ Deusũ matũ txakabu buanikẽ hanushũ matũ mã ma mekea biaki.

⁶ Haskakinã, nũ Jesus Cristo ikũwãkĩ txibaĩ ana mawabu keskama haki habe dasia nũ ma besteni keska mai anu nũ hiweyuabu nai anu ha dapi nũ ma tsauwa keskabuki.

⁷ Haska wanũbarikatsi hawẽ pepa nuku unãmakatsi ikinã, Jesus Cristowẽ taea nukuwẽ nui kai nuku ashuniki.

⁸ Hiwekuĩa bikinã, nũ hawawẽ ibubis nukũ kupiti bi pashatirumabiakẽ Jesus nuku mawashuni nũ ha ikũwãkubainaiwẽ taeshũ Deus pepahairatũ nuku duawakĩ nuku inãni ikũwaĩ nũ ma mekeaki.

⁹ Haska nuku waya hawara pepa tibi aki nũ imiswẽ ha xinaĩ nũ kẽtirumaki.

¹⁰ Deusũ haska nukukiri xinãkĩ hatũ nuku damiwakinã, hawẽ bake Jesus Cristoki dasitã hawenabũ hawẽ daya pepa inũ hawẽ bai pepa txibãkĩ ashuĩ nũ hiweyukubaĩshanũbũ Deusũ bebũkiri nuku katukĩ pewaniki.

Jesusunã, yura shukua bestitxai wanũ ika hunikiaki, na hãtxarã

¹¹ Haskakẽ mã judeubuma ha judeubũ hatũ hina kubitxi meshtemisbu matukiri hãtxakĩ: “Deus yubakani hayama habũ hatũ hina kubitxi meshteabumarã, nukunabumaki”, iki ibubiskiri hãtxakĩ: “Deusũ yubani txibãkĩ nukũ hina kubitxi nũ meshtemis nũ Deusunabuki”, iki hãtxariakanikiki.

¹² Uatiã matu hiwearã, Cristouma inũ, Israelbube danãnanaĩ inũ, hawa Deusũ hatu yubakĩ matu yubama iniki. Haska mã hiwea iyuniki, xinãkãwẽ. Haskawẽ taea Deus unãma inũ hawa manakati pepa hayama na mai anu mã hiwepauniki.

¹³ Uatiã Deuski mã kematiruma iniki. Hakia natiã Jesus Cristo mawakĩ hawẽ himi habawaniwẽ natiã txai mã ibiani mã ma ha dapiki.

¹⁴ Cristorã, ha besti nukũ unãnuma hiwemanikaki. Ha Cristõnã, nũ judeubu inũ mã judeubuma habias hawenabu wakatsi ikĩ haskawẽ taea nũ danãnanaĩ pashka hiwemisbu ha kene Templo anua hawẽ kenekĩ kebẽnibu keska hawẽ yurawẽ ha kene kebẽnibu keska yamawakĩ ana xinãtima waniki, nũ ana sinatanameyamashanũbunã.

¹⁵ Deusũ Moisés yunua hawẽ hãtxa kenekĩ hawẽ yunuti inũ hawẽ nemati haska txibaĩ nũ danãnanãrabei hiweshũ xinaĩ nũ ibiakubaĩmisbũ ana nuku haska hiwemakatsi ikama natiã yura shuku dabe wama hawenabu bestitxai keska nuku waniki, yura bena nuku wakinã, nũ judeubu inũ mã judeubumarã. Haska wakĩ nuku unãnuma hiwetiwaniki.

¹⁶ Cristo hamebi haska nuku dasi wakatsi meneirã, nũ ha shuku dabe sinatai nũ danãnanãrabei hiwemis Cristo cruzkia mawakĩ Deus nukuki sinatai nuku ha dabe daewashuniki, nũ judeubu inũ mã judeubumarã. Nuku haska wakĩ nuku yura bestitxai keska waniki.

¹⁷ Cristõ hawẽ kaka pepa bei hukinã, unãnumati beniki, mã judeubuma mã txaihaira Deusuma hiweabukiri inũ nũ judeubũ Deuskiri txaima unãbiakĩ nũ ikũwaĩsma nuku yusĩ pewakĩ merabewairã.

¹⁸ Natiã Cristowẽ taeshũ judeubu inũ judeubumãri habias Yushĩ Pepawẽ Deus beyawai nũ haki kematirubuki.

¹⁹ Haska inũ, uatiã Deuskiri unãma hariri mã xinãma ibiani natiã haska Deusũ nuku yubani ikũwaĩ nũ hayabu matuburi mã Deusbe haibunametirubuki, haska judeubũ Jesus ikũwaĩ keskai mã ma Deusũ enaburiki.

²⁰ Haskakẽ mã ikũwaĩbu dasibirã, mã mixki hiwe keskabuki. Habu dukũtũ mixki hiwe wakatsi bepushkĩ buyamisbu keskarã, Jesusũ kuxipayabu inũ hawẽ hãtxa yuishunikabũ yusĩkĩ Jesus Cristokiri besti akaibu txanima Cristo hamebi hawẽ mestẽwãti kayabiki, mixki ewapa maratãshũ tsamĩkĩ mestẽwãmisbu keskarã.

²¹ Habu dasibitũ nũ Cristo ikũwaĩburã, mixki hiwe wakĩ benibaĩmisbu keskaki. Mixki tibi tsamabaĩmisbu keska wakĩ nukũ Shanẽ Ibuki yura betsa betsapabube husiakeakekaĩkĩ Templo meribi nũ hiwe wakeakekanaii.

²² Ha dikabi maturã, Deusũ Yushĩ Pepa mã haya Cristoki dasiarã, mã hawẽ kẽwãti Templo keska Deus matube hiweikiki.