Apocalipse 7 - Kaxinawá Bíblia (BR)

Deusũ bebũkiri hawenabu katuni hawẽ nai tsumabũ habu unãti wanikiaki, na hãtxarã

¹ ha binukainaya hanushũ ana uĩkĩ nai tsuma dabe inũ dabe mapuakeakeabu ẽ uĩayã betsa bari huaikiri leste anu nia betsa bari hikiaikiri oeste anu nia betsa norte anu nia betsa sul anu nia habũ niwe dasibi tsumashũ nemakĩ mai inũ iãnẽwã inũ hi mapua hau niwe hanu shũku ikĩ hau itxakawayamayunũbũ

² hanua nai tsuma betsa bari huaikiria lestekiria hukĩ nukũ Epa Deus hiweatũ hawenabu unãti washũti hayatũ hui kuxipawẽ ha nai tsuma dabe inũ dabe habu kuxipa mai inũ iãnẽwã daũti hayabu hatu

³ yuikĩ: “Meyamayukãwẽ. Deusũ tsumabu habũ betũkuki netãkĩ habu Deusunabu nũ unãti wariamakẽ mai inũ iãnẽwã inũ hi mapua itxakawakĩ daũyamayukãwẽ, Deusunabu hau mawayamayunũbunã”, hatu wa

⁴ haska wakĩ 144.000 Israelĩ 12 huni bakebũ bababu shukuabu Deusũ hawenabu hawẽ betũkuki hawẽ unãtiwẽ unãti wakĩ yura betsa betsapabu katukĩ

⁵ Judã bababu 12.000 hawenabu wakĩ unãti netãkĩ Rúbenẽ bababu 12.000 habiaskari wakĩ Gadẽ bababu 12.000 habiaskari wakĩ

⁶ Aserĩ bababu 12.000 habiaskari wakĩ Naftalĩ bababu 12.000 habiaskari wakĩ Manassésĩ bababu 12.000 habiaskari wakĩ

⁷ Simeãonẽ bababu 12.000 habiaskari wakĩ Levĩ bababu 12.000 habiaskari wakĩ Issacarĩ bababu 12.000 habiaskari wakĩ

⁸ Zebulomnẽ bababu 12.000 habiaskari wakĩ Josẽ bababu 12.000 habiaskari wakĩ Benjamimnẽ bababu 12.000 habiaskas wakĩ Deusũ hatu unãti wakĩ katumai ẽ nĩkashuki.

Nai anushũ hati tsuã tanatirumabũ tari hushupa saweabukiri yuinikiaki, na hãtxarã

⁹ Hanushũ ana uĩbaũkĩ yurawã hati tsuã tanatiruma ẽ uĩshu matu yuinũ nĩkakãwẽ. Nawabu mai pakea tibi anuabu inũ, yura betsa shukua tibi anuabu inũ, dasibi hãtxa tibi anuabu inũ, mae tibi anuabu Deus shanẽ ibu haki tsauti inũ txashuwã bakẽ besuuri habu nishũ tari hushupa txaipa saweshũ shẽpã tsuma nishũ

¹⁰ hui kuxipawẽ habũ yuikĩ: “Nukũ Epa Deus shanẽ ibu haki tsauti anua inũ hawẽ bake txashuwã bake nukũ meketirã, habuanuaki”, ikaibũ

¹¹ dasibi Deusũ nai tsumabu inũ, habu hiwea dabe inũ dabe inũ, ha 24 mekenikabu hatibu shanẽ ibũ tsauti anu mapubaunabu Deusũ besuuri maĩ beti ishũ kẽwãkĩ

¹² yuikĩ: “Nukũ Epa Deus unãnepa Shanẽ Ibu kuxipahairaki. Benimawakĩ hawẽruawakĩ kẽwãkubainãkãwẽ, niti ikamarã. Haskakirã”, ikaibũ

¹³ hanushũ mekenika betsã ea yukakĩ: “Na tari hushupa saweaburã, tsuabumẽ? Hania beabumẽ?” ea wa

¹⁴ kemakĩ: “Shanẽ ibuũ, mĩ miã unaiĩ”, ẽ wa hanushũ mekenikatũ ana ea yuikĩ: “Txanimaki. Itxakawanikatũ yura dasibi mai hirabi anuabu bikawakĩ hatu nuitapawaya yurabũ hatũ txakabu henekĩ habũ tari detsis keska txashuwã bakẽ himiwẽ txukakĩ habũ detsis yamawakĩ habũ tari hushu pehairawabuki.”

¹⁵ “Jesusũ haska wakĩ na mapubaunabu hatu pepawa Deus shanẽ ibu haki tsauti anu manishũ mexu merã inũ bariri Deus hanu hiwea anushũ duawakubainaibu Deusũ habu mekekubaĩshanikiki, xinã txãkaĩburã.

¹⁶ Haria ana nuitapai buni ũpash manui ikama inũ, barĩ ana hatu kuama inũ, shana bakakĩ ana hatu bikawama ishãkanikiki.

¹⁷ Ha inũ, txashuwã bake Deus shanẽ ibu haki tsauti namakis niatũ ũpash paisma pehaira txatxa hene hawẽ hiwemati haya anu hatu iyushũ amai hatũ mekenã ishanikiki. Hanushũ ha kashamisbu Deusũ hatũ beru beũ hene dasibi tashka washanikiki”, ea wa