Apocalipse 5 - Kaxinawá Bíblia (BR)

Txashuwã bakẽ una sebi keneya txurenikiaki, na hãtxarã

¹ Hanushũ ẽ nĩkaya una sebi kene dabeya uke merã inũ bemaki keneya sete hawẽ tsamia tsuã hune mekĩ bepẽtiruma inũ txureriama unãtiwẽ tsami dakabirana Deus hawẽ tsautiki tsaushũ hawẽ mekẽ yusiuriawẽ tsuma ẽ uĩayã

² nai tsuma kuxipatũ uĩbaũkĩ hui kuxipawẽ habu yukakĩ: “Tsua pepa kuxipahairatũ atirumẽ? ha una tsamia tibi dashnukĩ hatũ txureairã”, hatu wa

³ hakia nai anu inũ, mai anu inũ, hanu mawabũ yushĩ maniabu anu tsua pepahaira hayamakẽ tsuã txureshũ uĩtirumakẽ

⁴ txanima tsua pepa kuxipa hushũ txureshũ uĩtirumawẽ taea nui ẽ kashahairaya

⁵ mekenika betsã ea yuikĩ: “Kashayamawe. Shanẽ ibu Davĩ baba betsa ha Judã baba yuinaka dasibibũ shanẽ ibu inu betsa hawẽ kena leão nũ dabimis pepa kuxipahairakĩ haki sinataibu maemanitũ ha unãti tsamia tibi hatũ dashnu dashnu akĩ keyutã ha una txuretiruki. Manayuwe”, ea waya

⁶ hanushũ Deus tsauwa naxui ika namakis ha hiweabu dabe inũ dabe mapubaunabu inũ habianuri ha 24 mekenikabu tsaubaunabu anu ha namakis naxui ika txashuwã bake hawẽ yura txatxinibu mawa keska nia sete mashũyã inũ sete beruya ẽ uĩshuki. Txashuwã bake hawẽ sete berurã, ha hawẽ yushĩwẽ mai hirabi anu Deusũ hatu yusĩmakubainairã, haska ẽ uĩshuki.

⁷ Hanushũ txashuwã bake ha Deus hanu tsau anu kemashũ hawẽ mekẽ yusiuri anua una sebi bitã tsumakẽ

⁸ hanua benimahairakĩ ha hiweabu dabe inũ dabe inũ, ha 24 mekenikabũ hatũ mimawati betsa hawẽ kena harpa inũ ouro mane kẽtxa ni pei inĩti ha kuashũti keska mata haska hawenabu Deusbe hãtxamisbu tsumashũri habu dasibibũ txashuwã bake kẽwaĩ haki dãti itã

⁹ dasibibũ nawati bena huiwẽ nawakĩ yuikĩ: “Mĩ pepahairaki. Mawakĩ mĩ himiwẽ yura shukuabu tibi anua inũ, nawa tibi anua inũ, hãtxa tibi anua inũ, mai pakea tibi anua Epa Deus bishũkĩ hawenabu hatu wakĩ

¹⁰ Deusbe hãtxashunikabu mĩ ma hatu waniki. Deusbe hanu shanẽ ibushanaibu hatu wanishũ mai anua habu shanẽ ibushãkanikiki. Haskakẽ miã besti Deusũ una bishũ mĩ txuretiruki. Mĩ pepahairaki”, akaibũ

¹¹ hanushũ ana uĩkĩ ẽ nĩkaya ha hiweabu inũ ha mekenikabu inũ nai tsuma mirimahaira Deus shanẽ ibu haki tsauti dapi manibaunabũ

¹² hãtxa kuxipawẽ habũ yuikĩ: “Txashuwã bake deteabu ana bestẽni pepa kayabirã, hatũ besti bitiruki, kuxiparã, pepa tibirã, unãnepahairarã, shanẽ ibu kuxiparã. Duawai xinã txãkaĩ benimawakĩ nũ ha kẽwaiĩ”, ikaibũ

¹³ hanushũ ana ẽ nĩkaya ha dasibi Deusũ damiwakĩ hatu hiwemani nai anushũ inũ, mai anushũ, inũ mawabu yushĩ bumisbu anushũ, inũ iãnẽwã anushũri habũ kẽwãriakĩ yuikĩ: “Ha Shanẽ Ibu haki tsauti anu tsauwa inũ txashuwã bake hatu duawakĩ xinã txãkãwãkĩ hawẽ benimawatiwẽ hau shanẽ ibuhaira wakubainũbũwẽ, niti ikamarã”, ikaibũ

¹⁴ ha hiweabu dabe inũ dabebũ habiaskari xinãkĩ kemakĩ: “Habiaskaki”, iriaibũ ha 24 mekenikabu dãti iki beti itã kẽwãriaibũ