1 Samuel 4 - Kaxinawá Bíblia (BR)

¹ Samuelĩ Deusũ hãtxa nĩkatã Israelĩ enabu mae tibi hatu yusĩkubainaya shaba betsatiã Israelĩ enabu hatu detenũ ika Filisteu nawabu itxatã bei Afeca anu hatũ tari hiwe pũtebaunabũ hatu maemai hatube detenamenũ ika Israelĩ enaburi buriai Filisteu nawabu maniabu bebũ Ebenézer anu itxatã hatũ tari hiwe pũteriabaunabũ

Israelĩ enabube Deus yubakani hãtxa aruni bau Filisteu nawabũ hatu mebĩbainibukiaki, na hãtxarã

² Filisteu nawa detenamenikabu habu pashkama kekutã kaĩbirãkĩ Israelĩ enabube detenamekĩ taewakĩ Israelĩ enabu maemakĩ bai namakishũ 4.000 hunibu detekĩ tenãkĩ hatu keyuabu

³ Israelĩ enabu mẽtsisipa detenamenikabu txĩtũbirani hatũ tari hiwe pũtebaunabu anu hikiabũ, anibu unanepabũ hatu yukakĩ yuikĩ: “Filisteu nawabũ nuku maemakãshurã, haskai Senhor Deusũ hatu nuku nemashunama ishumẽ? Nukube nashui ikaĩ hau Senhor Deusũ nukuki sinataibu hatu nemakĩ nuku maemashũshanũ Siló anua Senhor Deus hatube yubakani hãtxa aruni bau binũ bukãwẽ!” ibaĩ

⁴ haska shinãtã huni itxapa Siló anu hatu yunua bushũ hanua Senhor Deus dasibi kushipabu binu keyua hatube yubakani hãtxa aruni bau ha querubin hamamaki Senhor Deus mekeabu tsaumis beaibũ Elĩ huni bake dabe Hofni inũ Finéias hatube buriaibũ

⁵ Israelĩ detenamenikabũ tari hiwe pũtenibu anua hawẽ hãtxa aruni bau bei hikiaibu uĩ benimahairai detenamenikabu dasibi sai sai itxakayamakĩ mai dikabi taka akaibũ

⁶ haskaibu Filisteu nawabũ nĩkai yuka ibauni: “Haskai sai sai itxakayamakanimẽkaĩ, Hebreubu anuarã?” iki haskakenã, “Senhor Deusũ hãtxa aruni bau hatũ mae anu ma beabu ikanikiki”, ikĩ tapĩtã

⁷ datekĩ habũ yuikĩ: “Hatũ mae anua haskaisbumabia hatũ mekenika Deus kushipa ma beabuki. Ikis hatuki datei nũ pemahairaki.

⁸ Nũ peirawa! Ha mekenika Deus kushipa dasibi binuhairatũ hau nuku atxiyamanũ tsuã ha nuku mepãmashũtirumẽ? Nũ nuitapahairaii. Hawẽ kupiti dami kushipawẽ ha Deusũ Egito nawa detenamenikabu yamawanikiaki.

⁹ Haskabiakẽ dateama shinã txãkãtã nukũ piaki txiti iki kushipanãkãwẽ, babuama nũ hatu maemanũbunã. Haska nũ hatu dayaru wamis keska hau habũri nuku ayamashanũbũ txĩtuãma pubẽkaĩ hatube detenamenãkãwẽ”, ikeaketã

¹⁰ Filisteu nawa detenamenikabu kushibaĩ hawaira Israelĩ enabu hatu maemakĩ detekĩ keyuabu hatiri pashai hatũ mae tibi anu buabũ itxapahaira tenãkĩ hatu deteabu 30.000 Israelĩ enabu maĩ bua detenamenikabu ma mawai keyuabũ

¹¹ Deus hatube yubakani hãtxa aruni bau dikabi Filisteu nawabũ atxitã habianuri Elĩ bake dabe Hofni inũ Finéias tenãriabũ

¹² hakia detenamenika betsa Benjamimnẽ enabu pashai Siló anu kushikaini habias shabatiã hawẽ tari buash pishta inũ hawẽ yura dasibi mai has haira hikiaya

¹³ habiatiãri Deus hatube yubakani hãtxa bau bushiãbuwẽ taea Elĩ shinaĩ nuihairai Deuski nukuti tari hiwe hikiti shui anu tsauti ewapaki tsaukẽ ha huni hukirã Siló anu hikitã dasibibu haskakãshu hatu banabima nĩkai kashai bis bis itxakayamabaunaibũ

¹⁴ Elĩ nĩkatã yuka iki: —Ha kashai bis bis ikirã, hawa haskai ikanimẽkaĩ?— ikaya ha hunĩ Eli yuiritanũ ika hawairakiranaya

¹⁵ hanua Eli ma 98 ano haya ma beshush hairayama tsauaki

¹⁶ nukushũ ha hunĩ yuikĩ: —Detenameaibu anua haria hatu maemabirani yumãtã piskukirani barikis ẽ huaii— aka Elĩ yukakĩ: —Ẽ bakẽ, hawa matu haska wakãshumẽkaĩ, ea yuiriwe— aka

¹⁷ kemakĩ yuikĩ: —Filisteu nawabube detenamei Israelĩ enabu pashakãshuki. Ha inũ, hatu detekĩ keyukĩ nukunabu itxapa hatu tenãkãshuki. Ha dikabi mĩ huni bake dabe Hofni inũ Finéias tenãriakãshuki. Hanua Deus nukube yubakani hãtxa aruni bau dikabi Filisteu nawabũ hatu ma mebĩriakãshuki— akĩ

¹⁸ haska yuia hawẽ yubakani hãtxa aruni baukiri Elĩ nĩkatã ma anibu shua shãkamahaira hawẽ tsauti ewapaki Deuski nukuti tari hiwe beputi dapi tsaua anua manaskakaĩ tĩ iki mapu tetsekea mawanikiaki. Unãti wanika Elĩ 40 ano hatu merabewaya Israelĩ enabũ hawẽ hãtxa nĩkakubainibukiaki.

¹⁹ Elĩ babawã, Finéiasĩ aĩ tuya ma kaĩ kema hawẽ yubakani hãtxa aruni bau ma hatu mebĩkãshu inũ hawẽ kuka inũ hawẽ bene ma mawakãshu nĩkai datei hawẽ bake isĩ pikutã hune tenei uminakeakei hawẽ bake kaiã

²⁰ ha aĩbu ma debuai uĩkĩ habũ merabewakĩ yuikĩ: “Dateyamawe, huni bake mĩ ma kaiãkirã”, abiabu nĩkamas ma debukẽ

^21-22 hawenabũ yuikĩ: “Hawẽ yubakani hãtxa aruni bau ma nuku mebĩkãshuwẽ taea Israelĩ enabu ana tsuã nuku kẽwãkĩ nukukiri pe shinãtirubumaki. Nũ ma babuabuki. Haskawẽ taea ha bakeishta kenakinã: ‘Icabô washunãwẽ’ ”, anibukiaki. Haska shinãkĩ ha bakeishta dabikinã, Deus hatube yubakani ma hatu mebĩkãshu inũ hawẽ kuka inũ hawẽ bene mawashu shinãkĩ haska washunibukiaki.