លោកអេលីហ៊ូវចោទណាពីអៃយ៉ូបថានិយាយមិនបានការ1 លោកអេលីហ៊ូវមានប្រសាសន៍ ទៀតថា៖ 2 «តើអ្នកស្មានថាអ្នកត្រូវទាំងស្រុងឬ? តើអ្នកអាចពោលថា អ្នកសុចរិត ជាងអុលឡោះឬ? 3 អ្នកបានអង្វរទ្រង់ថា: “បើខ្ញុំមិនប្រព្រឹត្តអំពើបាបសោះ នោះគ្មានប្រយោជន៍អ្វីសម្រាប់ទ្រង់ទេ ហើយខ្ញុំក៏មិនចំណេញអ្វីដែរ!”។ 4 ខ្ញុំសូមឆ្លើយទៅអ្នក ព្រមទាំងមិត្តភក្ដិរបស់អ្នកដូចតទៅ: 5 សូមអ្នកសម្លឹងមើលទៅលើមេឃ សូមមើលទៅពពក ថាតើវាខ្ពស់ជាងអ្នកប៉ុនណា! 6 បើអ្នកប្រព្រឹត្តអំពើបាប តើអ្នកធ្វើឲ្យទ្រង់អំពល់យ៉ាងណា បើអ្នកបំពានលើហ៊ូកុំកាន់តែច្រើនឡើងៗ តើទ្រង់ខ្វល់ខ្វាយឬទេ? 7 បើអ្នកជាមនុស្សសុចរិត តើបានផលអ្វីចំពោះទ្រង់? តើទ្រង់ទទួលអ្វីពីអ្នក? 8 តាមពិត អំពើអាក្រក់ដែលអ្នកប្រព្រឹត្ត ផ្ដល់តែទុក្ខទោសដល់មនុស្សដូចអ្នកប៉ុណ្ណោះ ហើយអំពើសុចរិតដែលអ្នកប្រព្រឹត្ត ក៏ផ្ដល់ផលប្រយោជន៍សម្រាប់តែមនុស្សដែរ។ 9 ពេលណាមានការជិះជាន់សង្កត់សង្កិនច្រើន មនុស្សតែងតែស្រែកថ្ងូរ ហើយពេលណាអ្នកកាន់អំណាចប្រព្រឹត្ត អំពើឃោរឃៅកាន់តែខ្លាំងឡើងៗ មនុស្សតែងតែស្រែកហៅគេជួយ 10 តែពុំមាននរណាម្នាក់ពោលថា: “អុលឡោះដែលបានបង្កើតខ្ញុំ ហើយធ្លាប់ដាស់តឿនខ្ញុំ ឲ្យច្រៀងទំនុកតម្កើងនៅពេលរាត្រីនោះ តើទ្រង់នៅឯណា”? 11 ទ្រង់ប្រៀនប្រដៅឲ្យយើងមានចំណេះ ជាងសត្វដែលរស់នៅលើដី ទ្រង់ប្រទានឲ្យយើងមានប្រាជ្ញា ជាងបក្សាបក្សីដែលហើរនៅលើមេឃ។ 12 ពេលគេស្រែករកទ្រង់ ព្រោះតែអំនួត និងអំពើអាក្រក់របស់គេ ទ្រង់មិនឆ្លើយទេ 13 គេស្រែករកទ្រង់ តែឥតបានផលអ្វីឡើយ ព្រោះទ្រង់មិនព្រមស្ដាប់ ទ្រង់ដ៏មានអំណាចខ្ពង់ខ្ពស់បំផុត មិនរវីរវល់នឹងគេទេ។ 14 អ្នកពោលថា អ្នកមិនឃើញទ្រង់ អ្នកបានផ្ញើសំណុំរឿងទៅទ្រង់ ហើយអ្នកនៅរង់ចាំ។ 15 អ្នកគិតថាទ្រង់មិនដាក់ទោស ហើយទ្រង់ក៏មិនចាប់ភ្លឹកនឹងការបះបោរ របស់អ្នកដែរ។ 16 អ្វីៗដែលអៃយ៉ូបនិយាយសុទ្ធតែឥតបានការ អ្នកចេះតែពោលពាក្យសំដីឥតខ្លឹមសារ»។ |
© 2014 United Bible Societies, UK.
United Bible Societies