Salm 6 - An Bíobla Naofa 1981

Urnaí in Am na Buartha

¹ Do stiúrthóir an chóir. Le gléasanna téad. Ar chláirseach na n‑ocht dtéad. [Salm le] Dáiví.

² A Thiarna, ná lochtaigh mé i d'fhearg agus ná cuir pionós orm is tú ar buile chugam.

³ Déan trócaire orm, a Thiarna, óir is lagbhríoch mé; slánaigh mé, óir tá mo chorp á chiapadh,

⁴ agus tá m'anam á chéasadh go géar, ach tusa, a Thiarna, cá fhad...?

⁵ Fill, a Thiarna, fuascail m'anam agus saor mé as ucht do bhuanghrá.

⁶ Óir níl cuimhne ag aon neach ort i measc na marbh; cé a thabharfaidh moladh duit san uaigh?

⁷ Tá tuirse orm de dheasca m'osnaíola, ním mo leaba le mo dheora gach oíche; fliuchaim mo tholg le huisce mo chinn.

⁸ Tá mo shúil á snoí le dobrón: chuaigh sí in aois de dheasca mo naimhde go léir.

⁹ Imígí uaim a lucht déanta na hurchóide, óir tá éiste ag an Tiarna le glór mo ghoil.

¹⁰ Thug an Tiarna aird ar m'achainí; tá glactha ag an Tiarna le mo ghuí.

¹¹ Beidh náire is mórbhuaireamh ar mo naimhde uile. Cuirfear ar gcúl go tobann faoi náire iad.