Salm 5 - An Bíobla Naofa 1981

Urnaí a Iarraidh Treorú Dé

¹ Do stiúrthóir an chóir. Le gaothuirlisí. Salm le Dáiví.

² Tabhair cluas do mo bhriathar, a Thiarna, agus éist le m'osna.

³ Claon chun glór mo ghuí, a Rí liom is a Dhia!

⁴ Óir is chugatsa a chuirim m'urnaí, a Thiarna; éisteann tú liom ar maidin. Ag faire is ag feitheamh dom ar maidin, cuirim chugat mo ghuí.

⁵ Ní Dia tú lenarb áil an urchóid: ní mhaireann an t‑olc leat.

⁶ Ní sheasfaidh an scaothaire an fód os comhair do shúl.

⁷ Is gráin leat lucht oibrithe an oilc; scriosann tú lucht éithigh. Is fuath leis an Tiarna an fear fuilteach agus an cealgaire claon.

⁸ Rachadsa cheana i do theachsa trí líonmhaire do thrócaire; cromfaidh mé i do theampall naofa le heagla romhat, a Thiarna.

⁹ Treoraigh mé a Thiarna, i d'fhíréantacht mar gheall ar mo naimhde; réitigh do shlí romham.

¹⁰ Níl an fhírinne le fáil ina mbéal; tá cealg ina gcroí. Is uaigh ar leathadh a gcraos; is mealltach a dteanga.

¹¹ Agair do bhreithiúnas orthu, a Thiarna; go dteipe ar a mbearta; cuir an ruaig orthu de dheasca a gcionta óir d'éirigh siad i d'éadan.

¹² Bíodh áthas ar chách a ritheann chugat; gairdídís go brách; caomhnaigh an dream lenarb áil d'ainm chun go ndéana siad gairdeas ionat.

¹³ Óir beannóidh tú an fíréan, a Thiarna; beidh do chineáltas amhail sciath ina thimpeall.