Salm 39 - An Bíobla Naofa 1981

“Grásta na Foighne in aghaidh na hÉagóra”

¹ Do stiúrthóir an chóir, .i. do “Iduthun”. Salm le Dáiví.

² Dúirt mé: “Tabharfaidh mé aire do mo shlite sula ndéana mé peaca le mo theanga. Cuirfidh mé srian le mo bhéal nuair a bheidh an t‑éagráifeach os mo choinne.”

³ Bhí mé balbh agus d'fhan mé i mo thost, bhí éad orm de dheasca a rathúnais.

⁴ Bhí mo chroí go te ionam istigh; las tine de bhladhm ar mo mhachnamh dom, agus leis sin labhair mo theanga.

⁵ Foilsigh dom, a Thiarna, mo chríoch dhéanach, nocht dom líon mo laethanta, ionas gurab eol dom neamhbhuaine an tsaoil.

⁶ Is gairid an seal a thug tú dom, is neamhní mo ré shaoil i d'fhianaise. Níl i neach dá maireann ach puth anála

⁷ agus gabhann an duine seacha mar scáil. Gal gaoithe a shaibhreas go léir; ní fios dó cé a gheobhaidh ar chruinnigh sé.

⁸ Cad fáth dom bheith ag feitheamh, a Thiarna? is ionat atá mo dhóchas ar fad.

⁹ Saor mé ó mo chionta go léir, ná tabhair mé mar cheap magaidh don amadán.

¹⁰ Bhí mé i mo thost; níor oscail mé mo bhéal de bhrí gur tusa faoi deara é.

¹¹ Tóg uaim anois do sciúirse; tá mé cloíte ag buillí do láimhe.

¹² An uair a smachtaíonn tú an duine le hachasán i ngeall ar a pheaca leánn tú mar leamhan an ní is luachmhar leis; níl in aon neach ar bith ach puth anála.

¹³ Éist le mo ghuí agus le m'urnaí, a Thiarna, ná tabhair cluas bhodhar do mo ghlao. Óir is aoi mé atá ag baint fúm agatsa i m'oilithreach ar nós m'aithreacha go léir.

¹⁴ Lig dom, go bhfaighe mé aoibhneas sula dté mé faoi dheoidh ar ceal coiteann.