Salm 20 - An Bíobla Naofa 1981

Urnaí ar son an Rí

¹ Do stiúrthóir an chóir. Salm le Dáiví.

² Go n‑éiste an Tiarna leat lá an bhuairimh: go gcumhdaí ainm Dia Iacóib thú!

³ Go gcuire sé cúnamh chugat ón sanctóir agus go dtuga sé taca duit as Síón.

⁴ Go mba cuimhin leis d'ofrálacha go léir: go mba taitneamhach leis d'íobairtí uileloiscthe.

⁵ Go dtuga sé mianta do chroí duit, go gcomhlíona sé do bhearta go léir.

⁶ Go ndéanaimid lúcháir as ucht do bhua, agus gairdeas in ainm ár nDé. Go ndeonaí an Tiarna d'achainíocha go léir duit.

⁷ Is deimhin liom anois go bhfuil an bua tugtha ag an Tiarna dá ungthach; go bhfreagróidh sé óna fhlaitheas naofa le gníomhartha is le cumhacht a dheasláimhe.

⁸ Bíonn dóchas droinge i gcarbaid agus dóchas droinge eile in eachra; cuirimidne, áfach, ár ndóchas in ainm an Tiarna, ár nDia.

⁹ Treascrófar iad siúd agus titfidh siad; seasfaimidne an fód go daingean.

¹⁰ Tabhair an bua don rí, a Thiarna, agus éist linn nuair a ghlaoimid ort.