Salm 146 - An Bíobla Naofa 1981

Is aoibhinn don Té a mbíonn a Dhóchas i nDia aige

¹ Alleluia. Tabhair moladh don Tiarna, a anam liom.

² Molfaidh mé an Tiarna le mo bheo; molfaidh mé mo Dhia fad a mhairfidh mé.

³ Ná cuirigí bhur muinín i bhflatha, ná sa duine trí nach dtagann slánú.

⁴ Nuair a scarann an anáil leis filleann sé sa chré agus téann a bhearta ar ceal an uair sin.

⁵ Is méanar don té a bhfuil a chúnamh i nDia Iacóib; a chuireann a dhóchas sa Tiarna, a Dhia,

⁶ an té a rinne neamh agus talamh, an fharraige, agus gach a bhfuil iontu. An té a sheasann lena bhriathar de shíor;

⁷ agus a dhéanann ceart don dream atá faoi chois. Is é a thugann bia don ocrach. Is é an Tiarna a scaoileann na braighdeanaigh.

⁸ Osclaíonn sé súile na ndall. 8b Tógann sé suas an dream atá crom. 8c Tugann an Tiarna grá don fhíréan;

⁹ Cumhdaíonn an Tiarna an coimhthíoch; 9b déanann sé tacaíocht don dílleachtaí is don bhaintreach. 9c ach cuireann sé slí na bpeacach trína chéile.

¹⁰ Beidh an Tiarna i réim go brách, ina Dhia agat, a Shíón, ó ghlúin go glúin.