Iób 7 - An Bíobla Naofa 1981

¹ Nach bhfuil tréimhse dianseirbhíse ag an duine ar talamh? Agus nach cosúil a laethanta le laethanta amhais?

² Mar dhaor a shantaíonn an scáth, Agus mar amhas a iarrann luach a shaothair.

³ Is amhlaidh a dátaíodh dom míonna mairge gur gearradh amach dom oícheanta buartha.

⁴ I mo luí dom deirim: “Cá huair a thiocfaidh an lá?” Ar m'éirí dom deirim arís: “Cá huair a thiocfaidh an oíche?” Agus bím do mo chiapadh go comhrac lae agus oíche.

⁵ Tá míola ag snámh ar mo chorp agus salachar ina bhrat air; Tá mo chraiceann ag scoilteadh agus ag leá leis.

⁶ Is luaithe mo laethanta ná fearsad fíodóra, Agus tá siad arna gcríochnú gan dóchas.

⁷ Á, cuimhnigh nach bhfuil i mo bheatha ach puth anála; Ní fheicfidh mo shúile sonas go deo arís.

⁸ An tsúil a chonaic mé, ní fheicfidh sí mé níos mó. Casfaidh do shúil i mo threo, ach beidh mé ar iarraidh.

⁹ Mar a scaipeann an néal, agus a imíonn sé ar ceal, Sin mar nach bhfillfidh aníos an té a théann síos go Seól.

¹⁰ Ní thagann sé abhaile arís, Agus ní aithneoidh a áitreabh é a thuilleadh.

¹¹ Uime sin ní chuirfidh mé cosc le mo theanga, Labhróidh mé agus mo spiorad á bhuaireamh. Beidh mé ag cáiseamh agus m'anam faoi dhoilíos.

¹² An mé an Mhuir nó an Ollphiast A rá is go gcuirfeá lucht faire i mo chúram?

¹³ Má deirim: “Tabharfaidh mo leaba faoiseamh dom, Agus déanfaidh mo tholg mo phian a bhogadh,”

¹⁴ Ansin cuireann tú scéin orm le brionglóidí Agus scanradh le físeanna,

¹⁵ I dtreo gur fearr le m'anam folathachtadh, Agus an bás féin ná [caidreamh le] mo chnámha

¹⁶ Nuair a rachaidh mé in éag, ní thiocfaidh anam ionam go brách. Lig dom féin, mar níl i mo ré ach puth.

¹⁷ Cad tá sa duine le go ndéanfá mór níos fiú de? Nó go dtógfá ceann de?

¹⁸ Go ndéanfá fiosrú air gach maidin Agus é a thriail gach nóiméad?

¹⁹ Cá fhad go dtógfair díom do shúile Agus ligean dom mo sheile a shlogadh?

²⁰ Abair gur pheacaigh mé, cén dochar duit sin, A fhir faire an chine dhaonna? Cad ab áil leat ag déanamh sprice díom, I dtreo gur ualach ort mé?

²¹ Cad chuige nach dtógann tú mo pheaca ar shiúl Agus mo choir a mhaitheamh dom? Óir is gearr go luífidh mé sa chré; Agus lorgóidh tú mé, ach ní bheidh mé ann chuige.