Iób 26 - An Bíobla Naofa 1981

Iób Fíréanta

¹ Ansin d'fhreagair Iób, agus dúirt:

² Nach breá an chabhair a thug tú don lag! Nach mór an fhuascailt a rinne tú ar an ngéag thláith!

³ Nach maith an chomhairle a thug tú don aineolach! Agus an misneach don lagmhisniúil.

⁴ Ach cé leis a ndearna tú do chomhráite? Agus cé leis an spiorad a tháinig uait?

⁵ Bíonn na Rafáím ar crith faoin talamh thíos, Bíonn eagla ar na huiscí agus ar a lucht áitribh.

⁶ Tá Seól tarrnocht os a chomhair, Agus Abadón gan bhrat.

⁷ Eisean a leath an Roinn Thuaidh thar an bhfolús Agus a chroch an chruinne ar neamhní.

⁸ Cheangail sé na huiscí ina néalta, Agus níor stróiceadh na scamaill faoina n‑ualach.

⁹ Chlúdaigh sé aghaidh na [lánré], Agus leath sé a néal thairsti.

¹⁰ Chuir sé fáinne thart ar dhromchla na n‑uiscí, Ag an teorainn idir solas agus dorchadas.

¹¹ Tagann creathán ar cholúin na spéire, Agus uafás, nuair a chloiseann siad é ag bagairt.

¹² Chiúnaigh sé an fharraige lena chumhacht, Agus threascair sé Ráhab lena éirim.

¹³ Shoilsigh a anáil na spéartha, Agus ghoin a lámh an nathair ar teitheadh.

¹⁴ Ach féach! níl sa mhéid sin go léir ach imill a bhealaí! Ní chloisimid uaidh ach macalla cogair! Cé a thuigfeadh toirneach a chumhachta?