Iób 18 - An Bíobla Naofa 1981

Ní Cabhair Fearg

¹ Ansin d'fhreagair Bildead ó Shiúach agus dúirt:

² An gcuirfidh tú srian go deo le do theanga? An gcaithfimid éisteacht, agus gan labhairt go pras?

³ Cén fáth nach bhfuil ach meas madra agat orainn, Agus gur cuma leat sinn nó [ainmhí éigiallda]

⁴ A stollann é féin le barr feirge? An gcaithfear an tír a bhánú ar do shon Agus an charraig a chur as a leaba?

⁵ Ní foláir, ambasa, solas an choirpigh a mhúchadh, Agus lasair a thine a dhul in éag.

⁶ Lagófar an solas ina bhoth Agus múchfar an lampa os a chionn.

⁷ Déanfar a choiscéimeanna daingne a chrapladh, Agus leagfaidh a chomhairle féin ar lár é.

⁸ Óir tugann a chosa féin isteach sa líon é, Agus siúlann sé i measc na sás.

⁹ Béarfaidh gaiste ar sháil air Agus greamóidh sé sa dol.

¹⁰ Beidh súil ribe i bhfolach ina chomhair sa talamh, Agus gaiste roimhe ar an gcosán.

¹¹ Beidh scanradh air ó uafáis ina thimpeall, Agus iad á leanúint go dlúth ar a shála.

¹² Beidh an gorta aige mar [pháirtí] Agus an mí-ádh go dlúth lena thaobh.

¹³ Déanfaidh galar a chraiceann a chnaí, Agus céadghin an bháis a ghéaga a chreimeadh.

¹⁴ Scuabfar é óna bhoth mar ar bhraith sé slán sábháilte. Agus tabharfar é i láthair rí na n‑uafás.

¹⁵ Lonnóidh [Lilit] faoina dhíon, Agus scaipfear ruibh ar a ghabháltas.

¹⁶ Seargfaidh a fhréamha laistíos, Agus feofaidh a chraobha lastuas.

¹⁷ Rachaidh gach cuimhne air sa tír ar ceal, Agus ní mhairfidh a thásc ina dhúiche.

¹⁸ Tiomáinfear é ó sholas go dorchadas, Agus ruaigfear as an saol é.

¹⁹ Ní bheidh síol ná sliocht air i measc a chine, Ná comharba air ina áit chónaithe.

²⁰ Cuirfidh a chríoch uafás ar an domhan thiar, Agus scéin ar an domhan thoir.

²¹ B'áit chónaithe choirpigh an áit seo go dearfa, Áitreabh duine nárbh eol dó Dia.