Joel 3:18 - Ang Pulong sa Dios

¹⁸ “Nianang adlawa panalanginan ko kamo. Mahimong abunda ang inyong bag-ong bino gikan sa daghang mga ubas sa kabukiran. Mahimong abunda usab ang inyong gatas gikan sa daghang mga baka ug mga kanding nga nagsab-sab sa mga bungtod. Dili gayod mamad-an ang inyong mga sapa. Motubod ang tuboran gikan sa Templo sa Ginoo ug magpatubig kini sa lugut nga adunay mga akasya.

Ang Biblia 2011

¹⁸ “Nianang adlawa, ang kabukiran magpatulo ug tam-is nga bino, ug ang kabungtoran magpaagas ug gatas, ug ang tanang mga sapa sa Juda magpadagayday sa tubig; usa ka tuboran motungha gikan sa balay sa Ginoo, ug patubigan niini ang walog sa Sitim.

Maayong Balita Biblia

¹⁸ Niadtong panahona ang kabukiran malukop sa mga parasan, may mga baka na unya sa kabungtoran, ug daghan nang tubig sa tibuok Juda. May suba nga modagayday gikan sa Templo sa Ginoo, ug patubigan niini ang Walog sa mga Acasia.

Ang Bag-ong Maayong Balita Biblia

¹⁸ Niadtong panahona ang kabukiran malukop sa mga parasan, may mga baka na unya sa kabungtoran, ug daghan nang tubig sa tibuok Juda. May suba nga modagayday gikan sa Templo sa Ginoo, ug patubigan niini ang Walog sa mga Acasia.

Joel 3:18 Cross References

Job 29:6

Niadtong mga panahona, ang akong mga baka naghatag ug daghan kaayong gatas, ug ang akong mga olibo naghatag ug daghan kaayong lana.

Salmo 46:4

Adunay suba nga naghatag ug kalipay sa siyudad sa Dios, ang balaan nga puloy-anan sa Labing Halangdong Dios.

Exodo 3:8

Busa minaog ako sa pagluwas kanila gikan sa kamot sa mga Ehiptohanon, ug sa pagdala kanila ngadto sa maayo, lapad, ug mabungahon nga yuta, nga ginapuy-an karon sa mga Canaanhon, Hitihanon, Amorihanon, Perisihanon, Hibihanon, ug mga Jebusihanon.

Isaias 30:25

Sa adlaw nga pamatyon ang inyong mga kaaway ug lumpagon ang ilang mga tore, mobuhagay ang tubig sa matag taas nga bukid ug bungtod.

Isaias 35:6

Maglukso-lukso ang bakol sama sa usa, ug mosinggit sa kalipay ang amang. Mobugwak ang tubig sa disyerto, ug modagayday ang mga sapa ngadto sa kamingawan.

Isaias 44:3

Kay hatagan ka nako ug tubig nga mohupay sa imong kauhaw ug mobasa sa imong malang yuta. Gamhan ko sa akong Espiritu ang imong mga kaliwat ug panalanginan ko sila.

Isaias 45:8

“Maghatag akog kadaogan sama sa paghatag sa kalangitan ug ulan. Ug dawaton kini sa mga tawo sa kalibotan. Molungtad ang kaluwasan, ug ang pagkamatarong sama sa tanom nga nanubo. Ako, ang  Ginoo, ang naghimo niini.

Isaias 55:1

Miingon ang Ginoo, “Duol kamo, kamong tanan nga giuhaw, ania ang tubig! Bisan wala kamoy kuwarta, duol kamo ug kaon! Dali kamo, kuha kamog bino ug gatas nga walay bayad!

Isaias 66:11

aron matagbaw usab kamo sa iyang kauswagan sama sa bata nga nagsuso sa iyang inahan ug nabusog.

Jeremias 31:12

Moadto sila sa Bukid sa Zion ug manghugyaw sa kalipay. Maglipay sila tungod sa akong kaayo kanila, sa abunda nga trigo, bino, lana, ug mga kahayopan. Mahisama sila sa tanaman nga kanunayng gibisbisan, ug dili na sila maguol pag-usab.

Miqueas 6:5

Mga katawhan ko, hinumdomi ninyo nga gisugo ni Balak nga hari sa Moab si Balaam nga anak ni Beor nga tunglohon kamo. Apan gisugo ko si Balaam sa pagpanalangin kaninyo. Hinumdomi usab ninyo kon giunsa ko kamo pagtabang sa pagtabok sa Suba sa Jordan sa dihang naglakaw kamo gikan sa Shitim hangtod sa Gilgal, aron maamgohan ninyo ang gibuhat ko sa pagluwas kaninyo.”

Zacarias 14:8

Niana usab nga adlaw, motubod ang preskong tubig gikan sa Jerusalem. Ang katunga niini modagayday ngadto sa Patay nga Dagat ug ang katunga ngadto sa Dagat sa Mediteraneo. Magpadayon kini sa pagtubod sa ting-init ug sa ting-ulan.

Numeros 25:1

Samtang nagkampo ang mga Israelinhon sa Shitim, ang mga lalaki nagsugod sa pagpakighilawas sa mga babayeng Moabihanon.