Revelation 11:2 - ASII LAKDAP Bible (BSI)

² Shatmaq, shomjam kinphai ka naq shinkiq. Jamkhano ngukla, kriika thatsang maiqse ma alike kun she. Tsangshiq raq Asii Chelati ka jipi lüroq blai ri lünai, ji maq nishishi mihaihii baiq.

Hawa Naga Bible 2001

² Yuq muinz shomc yuimx wawc yuzphic kox wangx kuex nauk htaz kaz, yvmx khoc lac ngoz ruiux lec kvruex kuex pungnuk miqsaz htenc muex vkuy gay wuez shec ningkhvnc nuex, tsuingshiq rueq Vsawc Ghaqyungx kuex yapix lex 42 tup yaz maq nuiuz gay shuex.

Muklom

² Etharin ran wang himthal shi chan nak thák u; chammatakoi esha Gentile tang ma kochak ta, ning aa asang samhaq sha rangrokbali rangni japi náng thula thanup nak na.

Revelation 11:2 Referencias Cruzadas

Tvtsvmc 79:1

O Shiikeawe lei, thatsang maiqse raq ümmungtan long wanto. Tsangshiq raq asii üm Shomjam tiisheshi baiqto raüta Jerusalem ka wiita tiibunbaiqto.

ISAIA 48:2

Kra taümaq miimin, namshiq ka asii chelati nguta shiikongkhiq tiitsakitlan, kiimaq namshiq ka Israilnok Shiikeawe ma kamti, apaiq mang ka Ajong Pinthum Tatiwe nguta srasiqtlan.

ISAIA 5:5

“Ngi raq ispiqro ka akhiishe mirha. Sonruk tro wa ruk ka asiiqshe mirbaiqha, atiiwong chang ruk ka arun she mirbaiqha. Lata rum nyamse kong miishe mitiiphaqha. Lata rumnyamse kong ma ji maq wiita mitiinibaiqha.

ISAIA 52:1

Jerusalem lei, ningkun shoqlaq laüta thongshiri ajong ma janonglaq! Asii Shiikeawe chela lei, achhai anyii miirii tiimiikhiiq nonglaq! Thatsang maiqse ka üm kilamchong thun mong na nyapmak she miraq.

AJONJÜ 1:10

Ajaqtinok raq atsiiq tum thun wiita tsuq wanto; Apaiq raq tsangshiq ka asii Shomjam mong na nyap wan chhito, Kiijaq Tatiwe raq pongmunti tiiwamak riito.

EJEKIEL 4:6

Ümtiikiiwa ümniiraq kra milot haü, ümniika jaqtsi nü siim niishe hali bum nonglaq. Laüta Juda mungti ngarai miitu raroqblai mo ka holaq laüta chamchaolaq. Tsangshiq ümchu rawii moho chang wa sitlaq kra miitu, wiishi chamchao ka ranaiq shishi chamchao laq.

EJEKIEL 42:20

Krai mren, kra ruk siim thun wa hiq ka alu nü na tsingblai thun ka mitar 250 siisaq riito. Ara ruk armaq jamlai wa asii phan kriika jamlai wa siimak phan kriiwa pong na rai thütlo.

DANIEL 12:7

Kiijiishe rase raq ajaq wiinai ka ra nü na doraüta, pattup pat-sa Shiikeawe mang na, ramkhamkok sham raüta, akha kiqkham kuqto. Apaiq raq akha nguto taikang, “Kriika wiitsam ri wiithiq miraq. Shiikeawe sengi tiichamchao wan jai maq, arthun mra arshe mipin wan.”

DANIEL 7:19

Kiijiishe, ngi raq ngamthaiq kaüblai ngoja, kra kaü ka anok ikha riimak, aliilot chang riimak phiiptsi jiiptsi, kra kaü riika ngam thun ka akhang miiki khang, awi ka jin wi, kriimaq phiimsaqsaq bunlak buncha kaqphaq hotlo. Raüta arok arii tiibun miilak raüta ahok maq nishishi kaqphaq hotlo, kra liichum ka samhea sapha jaq nguta ritkang.

DANIEL 7:25

Apaiq raq Ajong Thaq Na Ajong Shiikeawe kra mishummii. Kiimaq Shiikeawe sengi wiita, hok maq nishishi mitiichamchao. Apaiq raq tsangshiq Shiikeawe, shomnoq thunglai nai poi tri thun ka, laibaiq wan mitan khan. Kiimaq Shiikeawe sengi ka, apaiq raq wiitsam ri wiithiq mijam sha wan.

DANIEL 8:10

Kra rongkaüti ka ramungtan phenlabi thun kriimin khatlotli chang she ningkun henghea she jawanto. Kiimaq ra wa raiqsaiq thun kiimin khatto. Raüta raiqsaiq thun wiijam ka mangjong hiq na tiidea tsuqbaiqto. Raüta apaiq raq tsangshiq ka hok maq nishishi nibaiqto.

DANIEL 8:13

Kiijiishe ngi raq rase ashi raq rase ashi ma bom ka akha waito taikang, “Riita ara riisham mak maq tiichhikuq tlaq mra pin arka, ümtincho na saüli wa mipin wan? Ranaiqtek honglu kewan jaqsham ka, atinkhan abi riiqkhiq ngarai jaqsham maq ümtincho na saüli wa milai baiq wan? Kiimaq ramungtan phenlabi nai Shomjam ka ümtincho na saüli wa hok maq nishishi mihaihii wan?”

DANIEL 8:14

Kiijiishe rase ashiti raq, “Arka ranaiq 1,150 na saüli mitangta wan. Ara akhing bala na ranap nai raji honglu take wan ka tiikuq mak miraq. Kriijai miishetiq Shomjam na honglu ka mitiikuq wan,” nguta treto taikang.

WEAWEA 14:34

Namshiq ka namshiq maiqmii ngarai kra ningkhan rawii roqblai michamchao wan han. Kanan mung sisin wa raroqblai kriiwa ranaiq shi la na rawii shishi she michamchao wan han. Namshiq raq Ngi ka namshiq ngengtiwe ma tiija wan ka akhiidea shea ngutiishe misap wan han!

Matthew 27:53

Kiimaq tsangshiq ka makho mong wa dong wan raüta, ahin niishe wawanto. Kra jai maq, Jesuq ka ama wa dong wan jai she, tsangshiq ka Asii Chela Jerusalem kiina wawanto. Kiijaq maiq pahea raq tsangshiq ka chhito.

Matthew 4:5

Kra jai miishe, Thawe raq Jesuq ka Asii chela Jerusalem niishe shea wanto. Raüta apaiq ka Shomjam wukhupong diilu pinthum ba kiiniishe shea wan raüta tiichapto.

Matthew 5:13

“Namshiq ka maiqse ngusaq kun li ma shum sitlan. Shatmaq shum ka asum she khoiki raü ka, ja she wa miraq? Kriika jamkha she wa mitiisum nong? Kriika thiihü she. Kriika araü baiq chang li she. Raüta maiq raq hok miili she mini baiq.”

Luke 21:24

Maiq wiijamti ka, re raq mitsat baiq. Kiimaq, maiq abiti thun kriika, rewe raq shumraü kharü maq khawan raüta, shumwi ma mungrap mungrii na mitsuq wan. Raüta, thatsang maiqse raq, tsangshiq raq mung jamsha wan akhing rahiq kra minyi wan shaq wiiwii, Jerusalem arka botkhulai rai shot baiq raüta, mungmaiqse ka mijam sha wan.”

Hebrews 10:29

Ikhiijiika, Shiikeawe Se ka ji maq nishishi raüta saisi tlaq, kriiti ma kiiha? Shiikeawe tongshong khamchong ram chang tiijai kok, apaiq maiqmii ngarai khum ka tiisii he chang tiijai ka, apii ashi min ngu mak, shishe tlaq, kriiti ma kiiha? Tiima rong liita, akhnok maiqse miika, Shiikeawe raq ümtinkhan heng mo tiihoke chang she wa miraq!

Revelation 11:11

Shatmaq, ranaiqtsam ri shethiq sijai niishe, Shiikeawe phawa tsitsü raü ka saüki raüta tsangnai khum na shangto, raüta tsangnai tsitsü ka tiichüm kuqto. Krai mren, tsangnai ka amaa wa tiidorang she chapto. Kiimaq, maiq ümchu riiwa kra chhitaqti thun ka, akii anyii watrang lishe, kai phiip raq tsaito.

Revelation 11:3

Ngi raq i shammi anai, ngi miitu hakhi kekai mitiikiha. Tsangnai ka maaho maanyi miirii sam raüta miki. Tsangnai raq Shiikeawe tsütsa ka 1,260 ranaiq liipan na mangjong maiqse ma, chiiriim raüta michong kuq.”

Revelation 12:6

Kiimaq, jechak nyung ka kumtsaiphii bintang jüngi hiq bashi, Shiikeawe raq tiijeje athü, kiijaq tiipaü juhoto. Kiijaq jechak nyung ka 1,260 ranaiq aheawiq shiililii raüta mitiisi wan.

Revelation 21:10

Asii Wenyi raq ngi ka rom wanto. Raüta rase raq ngi ka pum ashi diiluhea langlang thaq niishe shea wanto. Apaiq raq ngi ma Asii Chela Jerusalem ka ramungtan wa Shiikeawe pha wa akai rai kra tiichhi kuqto.

Revelation 21:2

Kiimaq ngi raq Asii Chela Jerusalem anye ka junriise, awese phana ajun wakai ma tiimiikhiiq raüta kitlaq ikha, tiimii raüta Shiikeawe pha wa ramungtan maq asat kai chhikang.

Revelation 22:19

Kiimaq ashi ra raq, ara shammi bom chong lakdap mong wa, bomtsi poshi ra kra lambaiq raüla, Shiikeawe raq, ara lakdap na chong tlaq apaiq rii, rilung pechong tsi kiimaq Asii Chela mong wa achu shiiman kra alam mirbaiq.