John 15:5 - ASII LAKDAP Bible (BSI)

⁵ “Ngi ahata spiqraü chong. Namshiq ka i kü i ko thun. Juwa i dü na chamshat maq sitlaq, kriiti raq atsi ango, pahea mitsi ngo. Ngi ahü miika, namshiq raq jamlai phan jaqsham min lot man.

Hawa Naga Bible 2001

⁵ “Ngaz kuex svpiq ruiuz rvtauk, nuimshiq kuex vphak vnoz htenc rvtuit. Ukhaq yuq muinz ngaz nuex rvwak vtueq ngaz muinz kvruex waz nuex rvwak ruiux yuq, kvruex waz kuex vthuey paunghvlc thuey tuex, ngaz rulc rv-phvlc ruiux yuq kuex nuimshiq rueq yvmx muinz rvlot muit.

Muklom

⁵ “Nga suti bang, nim uking uphak. Utang i tinmong na tong aa etho nga piq tinmong na tong ang, piq sha daqhan tingo na, chammatakoi nga wang nim taphal inn jo chamtho jin somlo min ang inn.

John 15:5 Referencias Cruzadas

TAKSU LAK 11:30

Kechu jaqsham tsingo ka rilung, shatmaq matsaü tsase jaqsham riika, maiq miisaq mithum.

Hosea 4:8

Namshiq raq isenginok ngarai tsiiq siq lanta, chiithe ma jatlan. Kriikha na mungmaiqse ma, ngarai apapa tiitang tlan.

Matthew 13:21

Shatmaq bomtsi ka tsangshiq tsan mong na atsaü na shang mak dea. Kriikha maq alu ka kham mak. Krai mren, ümra akhing niiwa, Shiikeawe bomtsi kra miitu maitai chamchao she saü tlaq, kiimaq maiqse raq tsangshiq ka tiichamchao tlaq, kra akhing na tsangshiq raq kamtsantsii ka thaq baiq saq lishe, thaq baiqtlo.

John 12:24

Ngi raq chongtiikang arka tengteng: Tsam rai ka wak na jangki raüta, hiqmong na atsai arki ikha siwan hü wiiwii ka, raishi laqlaqse asiiliili misi. Shatmaq, kra raishi sitlaq kriika, atsai raüta cham wan raütiq, anyam ka midong wan. Raüta arai ka pahea she midong man wan.

John 15:16

Namshiq raq i puk na nyap wan miitu, ngi ka ritwan man dea. Shatmaq, ngi raq namshiq ka tsea tsiiq wan kang. Lata, namshiq ka shong wan kang. Arka namshiq rilung jaqsham na, pattup thenkimak chang phan, atsi ango pahea mitsi ngo laq nguta, ngi raq namshiq ka shong wan kang. Krai mren, i mang na namshiq raq ajaü jaü kra, i We raq namshiq ma mikuq.

John 5:19

Kriikha maq, Jesuq raq tsangshiq bom ka treto, “Ngi raq chongtiikang arka tengteng: Ase raq apaiq tsii tsii miika jamlai phan sham akai min shamlot mak. Apaiq riika Awe jaqtho kra liiraü tli shamtlo. Awe raq jamlai wa sham tlaq, kriili Ase riimin shamtlo.

John 9:33

Riita, krai mren, arwe armin Shiikeawe raq atiiki riimak ngu raü jiika, i mak ka tiipiiq kuq lot mak mirwa.”

Acts 4:12

Maiqse chhiiti ka apaiq kli. Ra raq aham mangjong hiq raikhü na, Shiikeawe raq apaiq kli nashiq chhii wanti we nguta tiikito. Apaiq tlea raüta, ahin ka jumin ahü she.”

Romans 12:5

Akhiisii hali, nashiq ka apum wea miika, maiq ka apawiq sitiikai. Li jiimin, nashiq tarü arka, Khristo pum lümaq, weshi ikhli sitiikai. Kiimaq, nashiq tarü arka, maiqpum shi na ahok, ajaq jamkho sitlaq, ikha nashiq min adam na, atiipumke wan wishe. Nashiq tarü arka, pumshili she sitiikai.

Romans 6:22

Shatmaq, ümchaü sanha, namshiq ka ngarai kharü mong wa ada wan kun she. Ümchaü sanha, namshiq ka, Shiikeawe disetiim she. Krai mren, namkhum ka ngamrea phu akuq ikha, Shiikeawe ma, namrilung ka kiinong kuq lan krai mren, namshiq rilung ka ümchaü asii she. Riita, akha sitlan ara tsingo ka, namshiq raq pattup pat-sa rilung she lap tlan.

Romans 7:4

Phunainotiim lei, ara chongtiikang tri bomtsi ara niq riri, namshiq kiimin sitlan. Thungtri nai namshiq liipan niika, lamphan railo ka atiipan kai kun she. Namshiq ka Thungtri kharü mong wa atsai kai wishe. Jamkhano ngukla, namshiq ka Jesuq Khristo khum sitlaq kra, pan athiq she sitlan. Kiimaq ümchaü namshiq ka amaa wa tiidong wantaq we kra rii ngutiishe sitlan. Arka, ümchaü sanha, nashiq tarü ka Shiikeawe kriili she shomnoq laita siwan miitu atra sitiikai.

1 Corinthians 10:16

Nashiq raq Tatiwe Poi klo tiikai akhing na khap sham tiikai kra miitu, Shiikeawe ma kechu tum tiikai. Nashiq raq kra khap wa spiqtai nyang tiikai kriika, Jesuq Khristo tiijai riisha nyang tiikai. Kiimaq kiikha hali, nashiq raq winsii phu ka tiikho phaq tiikai. Kra tiikho phaq tiikai kriika Khristo han-ngam phu phaq tiikai.

1 Corinthians 12:12

Khristo pum ka ashi li. Shatmaq apum ashi na akhum ka pong panpan sitlo. Apum ka ashi li. Shatmaq akhum pan ka apawiq sitlo. Li jiimin, apum ka ashi li.

1 Corinthians 12:27

Riita, namshiq wiitarü ka Khristo pum siisaq li sitlan. Kiimaq namshiq pumtek ka, apaiq pum sitlaq kra pan athiq siisaq sitlan.

2 Corinthians 13:8

Ngi riika, Tsütsa Ahea chongke jaqsham kra, jong wan lam miituli misham ha. Ngi raq Tsütsa Ahea jaqsham lam ka tiibanbilot mang.

2 Corinthians 9:10

Shiikeawe ka maiqse ma achhi ajang chang tsamlai chomrom keti we. Kiimaq maiqse ma phaqnai sea chomrom keti we. Krai mren, Shiikeawe raq, namshiq ma tsamlai achhi ajang ma, namshiq ma ümchuwa ra wan tlaq, kra mikuq. Raüta, jamlai wa chhi jang tlan kra, mitiijong luwan. Akhiisii hali, ara ümchaü namshiq raq ümchuwa honglu phongtsoktsok kuqne wan lan, kra dong man wan raüta, namshiq raq asho awo tsam mijut wan han.

Galatians 5:22

Shatmaq, Asii Wenyi riika maiqse rilung na, arthun ara tiitsi ngo kuq tlo: Lungwiitsii, chochi, khusang, anin wan, arlungwii, athuk atsom, phan rap na tsapkapkap,

Ephesians 5:9

Ara chongtiikai rawü li raq, phanrap lam na, athuk atsom, kechu jaqsham, kiimaq tingting rilung tsi ka, tum akhiiq ama tiishowo kuq tlo.

Philippians 1:11

Krai mren, namshiq rilung ka, Jesuq Khristo pülii ahea awa rong arai ngu tu petsi chong ikha miraq. Kra chongtiikai petsi tu kriika, Khristo riitiq dongdii tiitsi ngo chang. Kra maiqse raq chhi raüta, Shiikeawe khushü mitiijong. Raüta, Shiikeawe klishe mishomra wan.

Philippians 4:13

Khristo raq ngi ma ningkun kuq tlaq kriimaq, ngi raq phanrap akhing saü wan tlaq kra nin lot tiikang.

Philippians 4:17

Ara chongtiikang arka, ngi raq namshiq jaq wa kongphiq jaqmiiq siika, akhing khing na, lapphaqsiq wan ruq riiha jaq nguta ngo nang ka riimak. Ngi riika namshiq ma aliip apha riiwe ka apapa, liip pha wan raü jaq nguta tiima lalata chongtiikang.

Colossians 1:10

Kra laphan jiitiq, namshiq Tatiwe raq namshiq ka jamkhii tiisinga wan wa lungwii tlaq, kiikha misi wan lot han. Kiimaq namshiq raq, ranaiqtek apaiq raq lungwii tlaq jaqsham kaiwa kra misham lot han. Krai mren, namshiq rilung na shamhea kaiwa ümchuwa sitlaq kra tsingo pahea she misi. Kiimaq namshiq ka Shiikeawe tiima tsantsii ka atsaü maq sap lanta mijong luwan han.

Colossians 1:6

Ara chongtiikai Tsütsa Ahea raq mangjong tlotli na nyam rat wanto she. Raüta mangjong maiqse pahea raq achu shiiman lap wan tlo. Arka man na namshiq phong na, aphaji na namshiq raq Shiikeawe kaphap mangchan ka atinkhan jonghea sitlo nya nguta sap lan ikha, raüta namshiq phong na nyam wantaq ikha, ümchaü min, nanok sang amang mung ahin liipan niishe nyam wan tlo.

James 1:17

Phanrap ahea awa kongphiq ümchuwa sitlaq, kiimaq phanrap athuk atsom kongphiq ümchuwa sitlaq kriika, ramungtan na siti Shiikeawe raq siisaq akuq. Arthun arka Shiikeawe jaq wa siisaq saütlo. Apaiq ka ra na diim tlaq raiqsaiq, jipi, rashe sitlaq kra Tiiqti we. Apaiq ka pattup klai mak phan. Apaiq riika maiqse rilung na ra tiinyaq mak phan.

1 Peter 2:4

Riita ümchaü min, warong ra, Tati Jesuq Khristo, atra longkaü, mangjong maiqse raq apaiq ka jam min taimak, thiihü nguta atiithu baiq, apaiq pha na warong ra. Shatmaq, Shiikeawe raq apaiq ka rahea longkaü nguta tsea wanto.

2 Peter 3:18

Shatmaq nashiq Tatiwe kiimaq Chhiitiwe Jesuq Khristo kaphap na kiimaq apaiq sap wan niili chhanchhi wan ruq ronglaq. Apaiq khushü ngao kli ümchaü kiimaq pattup pat-sa na saüli mijong laq! Amen.