Nehemia 8:17 - Bibl Koad 21: Ar Bibl e Brezhoneg evit ar Vretoned

¹⁷ Evel-se, holl vodadeg ar re a oa deuet diouzh an harlu a reas logelloù, hag ec'h azezjont el logelloù-se. Mibien Israel n'o doa ket graet un hevelep tra abaoe deizioù Jozue mab Nun, betek an deiz-se. Hag e voe ul levenez vras.

Nehemia 8:17 Referencias Cruzadas

1 Danevelloù 29:22

Debriñ hag evañ a rejont en deiz-se dirak an AOTROU gant ul levenez vras. Hag ec'h embannjont roue evit an eil gwech Salomon mab David. E oleviñ a rejont dirak an AOTROU evel rener, ha Zadok evel aberzhour.

2 Danevelloù 30:26

Bez' e voe eta ul levenez vras e Jeruzalem, rak abaoe amzer Salomon mab David, roue Israel, ne oa ket c'hoarvezet un dra heñvel e Jeruzalem.

2 Danevelloù 35:18

Ne oa ket bet graet ur Pask heñvel ouzh hemañ en Israel abaoe deizioù ar profed Samuel. Hini ebet eus rouaned Israel n'en doa graet ur Pask heñvel ouzh an hini a reas Jozia, gant an aberzhourien, al Levited, holl Juda hag Israel en em gave eno, ha tud Jeruzalem.

2 Danevelloù 8:13

Hag e kinnige bemdez ar pezh a oa bet gourc'hemennet gant Moizez, d'an deizioù sabad, d'al loarioù nevez, d'ar gouelioù meur, teir gwech ar bloaz: gouel ar bara hep goell, gouel ar sizhunioù, gouel al logelloù.

Ezdra 3:4

Hag e lidjont gouel al logelloù, evel ma'z eo skrivet, hag e kinnigjont loskaberzhoù bemdez, kement ha ma oa ret, evel ma c'hourc'hemenne ar c'hustum evit pep devezh.

Sant Ian 1:14

Ar Ger a zo bet graet kig hag en deus chomet en hon touez, leun a c’hras hag a wirionez, ha gwelet hon eus e c’hloar, ur gloar evel hini ar Mab nemetañ deuet eus an Tad.

Adlezenn 16:15

E-pad seizh devezh e ri ar gouel d'an AOTROU da Zoue el lec'h dibabet gant an AOTROU, rak an AOTROU da Zoue a vennigo ac'hanout ez holl eostoù hag e kement a ri gant da zaouarn, hag e vi leun a levenez.

Hebreed 11:13

Holl int marv er feiz hep bezañ resevet an traoù prometet, met o vezañ o gwelet a-bell hag o vezañ kredet enno, asañtet o deus hag anzavet o deus e oant diavaezidi ha beajourien war an douar.

Hebreed 11:9

Dre ar feiz e chomas en douar a oa bet prometet dezhañ evel en un douar estren, o chom dindan teltennoù gant Izaak ha Jakob, kenheritourien eus an hevelep promesa.

Hebreed 4:8

Rak m’en dije Jozue o c’haset en diskuizh, ne gomzje ket goude-se eus un devezh all.

Jozue 1:1

Goude marv Moizez servijer an AOTROU , setu, an AOTROU a gomzas da Jozue mab Nun, servijer Moizez, o lavarout: