Kata Efées 5:3 - Jola-Kasa

³ Bukuluul bukan kata Ateemit joom, mó mújimuu jakum baj li bukuluul húfulo bo muñaˈa, kákaanikoo kanookan kasuuneniye, li efañ sídalam.

Kata Efées 5:3 Referencias Cruzadas

Máciya 15:19

Mata li buyinumabu uyinoolawu wajakutaawu úfulumulemuu: jamuk bukan, kahinten anaale alet ooli, húfulo an an jiyabowut, ékuwet, émalimiñ, li kúloboo.

Hulimahu Hásuumaahu loon Lík akiic homuu 12:15

Yéesu li afamen aaniil feh: — Jijuke to ban li jíkaanum efanhubaj, mata buloŋabu bata mal̥egen bata an, bulet li ebajayi yoola, maayeet min akite abaj ŋáa’.

Hulimahu Hásuumaahu loon Lík akiic homuu 16:14

Muñeˈe Kufaaliisiyeŋaku li kujam kulimaku unku feh, li kulako kajakakaay Yéesu, mata kukankaan bukan kafañe sídalam.

Bakaanelabu 15:20

Bale ukiicaaliil min oonaaliil jakum kutokoñ eliw yata sínuukuleŋ san kákaanumutumuu li Ateemit balewool kusilaye mata esikosiko, jakum an áfulo an an kuyabowut, ban jakum kutokoñ sínuukuleŋ sakuumi min siket, jakum foof kutiñ húsim.

Bakaanelabu 20:33

Imelowut ehaaliis yata an, mantee éwulus yata an, mantee wañ wata akee.

Kata Lom 1:29

Li baj li buko bóono banooban bacolut, bújakaati, kásiibo wah kanookan kajakut, búl̥afut. Li kuyili batahaay li jamuk bukan, úmuy, bubuntoo li kákaanikoo kanookan. Anoowan li buko li ámal al̥oof afaalool.

Kata Lom 16:2

Jiyabool booluul li kajaw kata Amaaŋenawu, loon bukanabuku kata Ateemit kuyaboolemuu booliil, ban li jilambenool li wahoowah wan emmuu jokool li wo li bukuluul. Akila humumool lalambenlamben bukan kameeŋe, lí ínje humumom.

Kata Lom 6:13

Jakum jiŋa’ wah wata eniilayi yooluul min jinaak jikaan kahoofoo loon eenimuu wah wata boot kakaan majakut. Jisenoolo min jilok boot li Ateemit loon bukan kayitowumulo li eketayi kubil koono li buloŋ. Jisenoolo foofuul feh boot kakaan wah wacole boot li Ateemit.

1 Kata Koolent 10:8

Alolaal jakum ulowaal li kákaanikoo loon kukee li buko kukaanumuu, min bukan koono sínjunne áyii li síhaaji kuket hunak hano.

1 Kata Koolent 5:1

Jamowe tanootan kaanaku babbaj kákaanikoo li bukuluul. Kákaanikoolaku unku kubajut maayeet li bukanabuku kákaanumutumuu li Ateemit balewool. Lijame kaanaku akee li bukuluul lahintenehinten anaalaawu ata atuubawool.

1 Kata Koolent 6:13

Li jinaak foof joon: «Mutiñaay lakaanikaan boot li ha’, ha’ li akaani boot li mutiñaay.» Mal̥egen! Ateemit fan abil aniilen wo úl̥uba: mutiñaayamu li halahu. Bale eniil yata ál̥ahukowan ekaanuti boot bucagayet. Eniilayi yoonosoono to boot li Amaaŋenawu, Amaaŋenawu li aano to boot li eniilayi.

1 Kata Koolent 6:18

Jitey bucagayet! Uhoofoo waawu wan an akaane fan ulako tíyaŋ eniilayi yoola, bale an alomuu li bucagayet, li ahoofoo li eniilayi yoola humum yo.

2 Kata Koolent 12:21

Líkolikoli min ban li ílaañul booluul naana íliiŋul, Ateemit li asuuwenom hákiluul, min il̥ok mata min kameeŋe li bukuluul kuloŋumuu li kuhoofoo loon naanaŋ. Kukatut wahawu wan kunaake kukaan nomuu wasetutumuu, húfulo bo muñaˈa li kahinto li aletalet.

Kata Efées 5:12

Li mal̥egenamu, wahawu wan bukanabuku umbuku kuyolowemuu min kukaan, usuunenisuuneni elob.

Kata Efées 5:5

Mata joote jihaas kaanaku an áfulowe bó muñaˈa, an ákaanikoole suuneni, li an afañe sídalam, let anoken li Jáyiiyaju jata Kilisita li Ateemit. Li mal̥egenamu, efañ sídalam láalu kamanen kuteemit kalet mal̥egen.

Kata Fílib 1:27

Bale lil̥awuul min jiloŋ hákil ésukayi feh loon Hulimahu Hásuumaahu hata Kilisita hulobumuu, mantee ibilumuu bóoluuloo li íbilaatiwoo, li ijam mooluul kaanaku jítuutuk lit, ban li jibaj kayinoo kano, min jikaan uyinumuul tin tano min jitaj mantee bukanabuku kujamumuu Hulimahu Hásuumaahu li kúyinen.

Kata Kolos 3:5

Kama muñeˈe jífulen wahawu wáamimuu li buloŋuul wata etaamaye loon: kahinto li aletalet, kákaanikoo, kamelo wah kajakut, kásiibo wah kajakut, li efañ sídalam yammuu kamanen ateemit alet mal̥egen.

1 Kata Tesalonik 4:3

Wahawu wan Ateemit afañumuu wo wommuu min jilako bukan kanabe, ban jakum jihinto li an an jiyabowut.

1 Kata Tesalonik 4:7

Mata Ateemit ahooñutolaal boot min unaak uloŋaal buloŋ bajakut, bale min uloŋaal buloŋ banabe.

1 Tímote 2:10

Bale kukaan majake, loon kanaalaabuku feh kaanumuu kútuttuul Ateemit kóotimuu kukaan.

1 Tímote 3:3

Jakum alako an ákaliyenoole mantee foof an ámuyitene bukan, bale laate akaan an ájoobiye buyinum ban li alako an abebene. Jakum lako an afañe sídalam ŋáa’.

1 Tímote 6:10

Li mal̥egenamu, efañ sídalam huhaa’ hata majakut manooman. Kukee síibiisiib kubaj sídalam bil gay, li kúloyi káyinenaku min kukaanoolo buko humumiil sílaam sameeŋe.

2 Tímote 3:2

Bukanabuku fan kunaak kuyinoo mooliil bale, ban li kufañ sídalam. Fan kunaak kusaloolo ban li kutebenoolo. Fan kunaak kugel Ateemit, ban let kútuul sibukoolayiil. Let an akaaniil wah wajake li kusalool, ban let kuluuken wah wata Ateemit.

Eleetalayi yan Fool akiicumuu Tit 1:11

Jakum ukatiil min kúlobul. Mata kumbuku min kúguul̥emuu utoŋ feh, li baliikene ban kooteenut kuliiken bukanabuku. Ban kukankaan mo mantee li kúbajum tó wah suuneni loon makee.

Eleetalayi yan Fool akiicumuu Tit 1:7

Li mal̥egenamu, anahaan ata ejangu an kusene bulok bata Ateemit, jakum an ajuk majakut li akila. Jakum alako an atebenoolowe, an ahile kawuñet, an ákaliyenoole, an ámuyitene bukan, ban jakum alako foof an aweelowe li sídalam.

Eleetalayi yan Fool akiicumuu Tit 2:3

Ulob kanaalaabuku foof kahallenumuu ooniil, baloŋelabu booliil boote bulako baloŋe bata bukan kasenoolowe boot li Ateemit. Jakum kunaak kúloboo bukan, jakum kunaak kúkaliyenoo. Kunaak kuliiken bukan wah wajake.

Eébulo 12:16

Jíkaanum, jakum baj an li bukuluul áfulowe li aletalet mantee foof an ákaanumut wahawu wáñeyimuu wata Ateemit, loon Esáyii an hutiñ ñano bale hújimuu li aŋa’ huhaanaahu hoola hata añiil átinaa anoomen.

1 Fiyeel 5:2

jicookoo bumatabu ban Ateemit asenuulumuu jooken. Jifooy bo, ban inti loon bukan kan kutuuŋe, bale li buyinum básuume, loon Ateemit afañumuu. Jakum lako boot huŋes ebaj, bale lako li kasenoolo.

2 Fiyeel 2:10

háŋum bukanabuku kanabemuu li kásiibowaku kasetutumuu kata bóonowabu booliil, min kubes huhaanaahu hata Ateemit. Bukanabuku umbuku kúkangumoolokangumoolo, li kutebenoolo, ban kúkoliwut bagel búwuwenumabu báyiineniyaabu;

2 Fiyeel 2:14

Li kuŋa’ kúkiliil feh kuya li kanaalaabuku, ban kúmusut kukat kakaan kahoofoo. Fan kunaak kubuutoo bukanabuku kágootomuu. Uyinumawu wooliil feh li woono li huŋes hubaj. Katekaku kata Ateemit kunku li buko.

2 Fiyeel 2:3

Efañ sídalamayi yooliil fan éjiyiil li kubuntumuul li ukoŋ wan kujuul̥e min kúbajum tó wah. Bale fiyowe ŋáa’ nan katekaku kooliil kóomi li kakobiil, ban let fiyo kújowum li sambun.

Búhiisenumabu 2:14

Bale baje wah wan eete iwatateni mata wo: lubaje booli bukan kanabe li kulimaku kata Balam, alobumuu Balak buu lammuu abuutoo kata Isilayeel min kutokoñ eliw yawaaseni, li buu kommuu kunaak kúfulo bo muñaˈa.

Búhiisenumabu 2:21

Liseneenoosen taŋ mantee li átiiwo aŋa’ buloŋ buwunkul, bale afañut min akat húfulowahu han áfulowe bomuu muñaˈa.

Búhiisenumabu 21:8

Bale bukanabuku kákol̥l̥imuu, kátukutumuu lit, kakaanemuu wah wasuuneniye, kamukemuu bukan, káfulowemuu li aletalet, kakaanemuu jángafayinde, kamanenemuu kuteemit kalet mal̥egen li kúmalamiñaku feh, buko fan kujow li buwokaayabu bata sambunasu li batolokabu básoyiyaabu. Bo bommuu eketayi yál̥ubutayi.

Búhiisenumabu 22:15

Bale bukanabuku kammuu li kulako tíyaŋ ésukayi, buko kommuu kakaanemuu wah wasuuneniye, kakaanemuu jángafayinde, sicagaasu, kamukemuu bukan, kamanenemuu kuteemit kalet mal̥egen, li bukanabuku feh kafañumuu émalimiñ ban li kunaak kúmal.

Búhiisenumabu 9:21

Bukanabuku umbuku kujokut foof li ehaaseen min kukat jamuk bukan, kukatut kakaan jángafayinde, kukatut húfulo li alet alet, kukatut ékuwet.