Miquéias 5:2 - Kaxinawá Bíblia (BR)

² Haskabiaibũ mã Belém Efrata anu hiweabuũ, na hãtxa nĩkakãwẽ. Judá enabũ mai pakea anu mĩ mae peshepishtabiakẽ mia anua shanẽ ibu tashnitã Israelĩ enabu dasibi yununika kushipa ishanikiki, bawakĩ Deusũ taewariama hiwenirã.

Miquéias 5:2 Referencias Cruzadas

Gênesis 35:16

Betel anua kaĩbaini mae betsa Efrata ma kemai buaibũ Raquelĩ bake bima tuya kai bai namakia bake kainũ ika kaĩtxakai bika tenehairaya hatũ bake imaitũ yuikĩ: “Dateama iwe, mĩ iki peairã, huni bake betsa mĩ kaiainã”, aka

Gênesis 35:19

haskatã Raquel mawa Efrata bai kesha maiwatã hawẽ tsumabubetã Jacó mishki keyatapa hawẽ unãti wakĩ hawẽ mai mamaki nitxinibukiaki. Na habia eskatiã Efrata mae hawẽ kena bena Belém wanibu txaima anu na unãti uĩriatirubuki.

Gênesis 48:7

hawẽ aĩ Raquelkiri shinãkĩ yuikĩ: —Uiã. Padãkiria ẽ txĩtũkiranaya bai putxinĩ mae Efrata kemayui ma Canaã anua mĩ ewa Raquel mawaniki. Habianuri ẽ mai waniki, Efrata kemai anurã— anikiaki. Natianã, Efrata kena betsa wakĩ Belém wanishũ kenamisbuki.

Isaías 11:1

Jessé enabu Assíria nawabũ hatu itxakawakinã, hi derakĩ hatu hawẽ buru keska besti wanibuki. Hakia ha hi buru anua ana takushanikiki. Hawẽ tatxa anua hawẽ tapũ betsa hukũmis keskai huni betsa ana kaĩshanikiki.

Isaías 53:2

Mai tsusĩhaira anu mibã tatxa uke merãhaira ka hawẽ pei benei pekaũmis keskai Senhor Deusũ hawẽ tsuma yumeai uĩkatsis ikikiki. Hawẽ yurarã, hawa hawẽruakĩ hatu hawẽ kemumakĩ betxipaimatiruma ishanikiki.

Isaías 55:4

Ẽ haibu Davi ekiri txanikaũti eã ẽ nawabu unãti wamaniki, shanẽ ibukĩ hau habu ekiri tapĩmashanunã.

Isaías 7:14

Mĩ haska shinãbiaya Senhor Deus kayabitũ hawẽ unãmati hatũ matu uĩmashanikiki. Txipash tsuã txutariama anua huni bake nanetã kaĩshanikiki. Ibuã hawẽ kena kenakinã, Emanuel washanikiki.

Amós 9:11

Senhor Deusũ ana yuikĩ: “Davĩ enabũ mae nawabũ hatu babu watã di akĩ txakabuwanibu ana habianuri mishki di anibu benikĩ hatũ mae ẽ hatu kushipa washanai ma kemaikiki. Uatiã hiwenibu keska ana hiweshãkanikiki. Edom enabu hatiri tesheabu inũ yura shukuabu tibiki ẽ kena ẽ netani Israelĩ enabube hau ana dasinũbũ ẽ hatu kushipa washanaii”, itã hawẽ hãtxa Senhor Deusũ habias yuiai keska akĩ meneshanai yuinikiaki.

Miquéias 4:10

Matunabu nitxiãbu kaĩbaini maema anu hinamas hiwekubainaibu ushakubaini Babilônia anu matu iyushanaibuwẽ taea Sião anu hiweabuũ, yura isĩ uminai bis ikubaĩkãwẽ, aĩbu bake kaĩ isĩ memis keskairã. Hakia harishũ matuki sinatakĩ matu iwanibu anua habukiri sinatakĩ Senhor Deusũ mã hawenabu matu ana mebikinãkĩ matu piskumashanikiki.

Mateus 2:1

Herodes Judéia anu shanẽ ibuaya Belém anua Jesus kaĩkẽ hanua bixi unãnikabũ bixi bena tashnia uĩtã txaikea bari huai lestekiria bekubirani Herodesĩ mae ewapa Jerusalém anu hikituxitã hatu yukabaũkĩ: —Judeubũ shanẽ ibu bena kaĩmarã, hanimẽ? hawẽ unãti bixi bena tashnia betxitã kẽwãnũ ika nũ huairã— ikĩ hatu yuka keyubaunaibũ

Mateus 28:18

Jesus nukuki kematã nuku hãtxa wakĩ yuikĩ: —Hawẽ kuxipa ea inãkĩ hawara nai anua inũ hawara mai anua mekekĩ ẽ yunukubaĩshanũ Ẽ Epã ea Shanẽ Ibu waniki.

Lucas 23:2

hakiri txitekĩ Pilatos yuikĩ: —Na huninã, txakabu betsa betsapa hatu yusĩkĩ nukunabu itimaska wakĩ hatu paraĩkiki. “Mĩ shanẽ ibu César hau pei inãyamanũbũ nukunabu hatu nemamiski”. Habiari: “Ẽ Shanẽ Ibu Messias Cristoki”, imiskiaki— akĩ hakiri yuiaibu

João 7:42

Hanua tashnikirãshanairã, “Davĩ mae Belém anua Davĩ babarã, Cristo Messias ishanikiki”, akĩ nuku keneshuniki. Haskakenã, Jesusrã, Deusũ Messiasmaki— akaibũ

Colosenses 1:17

Haska inũ, hamapai betsa betsapa Deusũ damiwariama Cristo hiwepaunikiaki. Hawẽ taeshũ dasibi damiwanishũ pewakĩ keyunishũ heneama mekekubaĩmiski.

Hebreus 13:8

Ha inũ, Jesus Cristorã, hawa maei betsaisma habiaskaski, uatiã inũ, natiã ikai inũ, ipakeshanairã.

1 João 1:1

Ẽ betsabu inũ ẽ puibuũ, ẽ matu kene bumai uĩrakãwẽ. Mai damiwariama Cristo hiweni natiã hiwea mã nĩkakubainairã, haskarã, nukũ dukũ hawẽ daya tateskĩ taewabainai nukubũ nũ nĩka taewabainiki. Hanushũ nukũ beruwẽ daiskĩ mekĩ hatũ nuku hiwekuĩmamis ha hãtxa hiwea haya nũ beiskubainiki.

Apocalipse 19:16

Ha inũ, hawẽ kena mestenepa Dasibi Shanẽ Ibubu Inũ Dasibi Yununikabu Binukĩ keyuaki, ika hawẽ tari txaipaki inũ hawẽ kixi kateki ha dabeki hawẽ kena neaki.

Apocalipse 2:8

Ana Jesusũ ea yuikĩ: “Ha hatũ Deusũ hãtxa yuinika Esmirna anu itxamisbu mekea anu na hãtxa ẽ mia yuiai keneshũriwe: ‘Earã, ea dukũ ẽ hiweni inũ ẽ hawẽ henea debesekeaki. Mawabiatã ẽ ana bestẽni ẽ hiweatũ ẽ matu yuiai nĩkakãwẽ.

Apocalipse 21:6

ana ea yuikĩ: “Dasibi haskashanai ẽ yuinirã, ma ẽ akĩ keyuaki. Ea dukũ ẽ ini inũ niti ikama ẽ hiwepakeshanaii. Tsuabũra ũpash akatsis ikĩ manuaibu keska ea anu beaibu ẽ hatu hiwea inãshanaii, hawa hatu pakamamarã.

Rute 1:1

Israelĩ enabu unãti wanikabũ hatu merabewakubainaibũ habiatiãri ana ui ikamawẽ taea hatũ bai yunu beneama eskarabeswẽ taea Israel mai pakea hirabi anu dasibi bunihairabaunaibũ Judá enabu huni betsa hawẽ kena Elimeleque mae Belém anu hiwebia buniwẽ taea Hene Jordão pukebaĩkĩ hawẽ aĩ Noemi inũ hawẽ huni bake dabe Malom inũ Quiliom hatu shetukunamakĩ hatu hiwemayunũ ika Moabe maiwã pakea betsa anu bui hikimabu Belém anua buimabu hatube hiweabuwẽ taeshũ: “Efrata nawabuki”, iwanã, hatu kenakubainibukiaki.

Rute 4:11

mapubaunabu inũ anibu unanepabũ kemakĩ Boaz yuikĩ: —Haa. Nũ nĩkashuki. Israelĩ enabu shuku betsa betsapabu pai taekĩ nukũ shenipabu Israelĩ aĩ dabe Raquel inũ Léiã huni bake itxapa bikubainibu keska wakĩ ha aĩbu mĩ hiwe anu mĩ bishanairã, Senhor Deusũ hau duawakĩ pepa wakubaĩshanũwẽ, bake itxapa bimakinã. Ha inũ, nukũ mae Efrata Belém anu huni pepa hiweshũ hatu uĩmakubaĩshãwẽ, hau dasibibũ mikiri pe shinãkubainũbunã.

1 Samuel 10:19

Hakia habũ matu txakabuwakĩ bika tenemaibu matũ mekenika Deusũ matu merabewakĩ matu nemashũbiakubirana ha besti txitikatsi ikama natiã mã ha danãkĩ yununika shanẽ ibu kushipahaira mã ea yukaimawẽ taea na habiatiã Senhor Deus bebũ Jacó huni bake tibitũ enabu shukuabu tibi itxatã hanua hawenabu tibi anua Senhor Deus bebũ hau bebirã bebiranũbũwẽ— hatu wa

1 Samuel 17:12

Saul shanẽ ibuyukẽ Efrateu nawa Belém anua huni betsa Jessé anibuhaira 8 huni bakeya hawẽ bake mashku Davirã, Jessé 3 huni bake iyua, Eliabe inũ Aminadabe inũ Samá Filisteu nawabube detenamenũ ika Saulbe ma bushiãbu

1 Samuel 17:18

Ha dikabi hatũ shanẽ ibu beshmas inãkuĩkĩ 10 awa txutxu tãki bushũriatãwẽ. Mĩ betsabu haskaramẽkaĩ, hatu ea uĩshũtãwẽ. Mĩ betsabu ma pe hiweabumẽkainã, kakape nĩkatãkĩ ea yuiyutãwẽ”, aka

1 Samuel 8:12

betsabu 1.000 detenamenikabu shanẽ ibushũkĩ yunuti wakinã, betsabu 50 detenamenikabu yunuti hatũ shanẽ ibu beshmas wakinã. Matu mã huni ewaburã, hatiri katukĩ hawẽ bai anu dayarubu wakĩ hatiri bai anu bimi tsekanika wakĩ hatiri habũ hashi inũ kanũ inũ pia wanikabu wakĩ hatiri hawẽ detenameti cavalo tarãti dami wanika matu wakubaĩshãkanikiki.