João 14:27 - Kaxinawá Bíblia (BR)

²⁷ Ẽ hãtxawẽ datei matũ huĩti nixmayamakãwẽ. Deusũ unãnuma hawẽ uke meranu unãnumati ẽ matu inaiĩ. Haska yurabu hatũ xinãwẽ hiwekĩ unãnumai hiwemisbu keska matu inãma hakia Deus anua daewanika kayabi unãnuma ẽ matuki baxiaii.

Kashinawa : Diosun Jesúswen taexun yuba bena yiniki

²⁷ En janchawen datei matun juinti nishmayamakanwen. Diosun unanuma jawen uke medanu unanumati en matu inaiin. Jaska yudabu jatun shinanwen jiwekin unanumai jiwemisbu keska matu inanma jakia Dios anua daewanika kayabi unanuma en matuki bashiaii.

João 14:27 Referencias Cruzadas

Salmos 27:1

Senhor Deus ẽ shaba keska hatũ ea mekemiswẽ taea ana hamapai betsaki ẽ dateamaki. Ẽ hiwea Deusũ ea keshekubaĩmiswẽ taea ana tsuki ẽ dateamaki.

Salmos 91:5

Meshu merã kai hawara meseki dateyamakãwẽ. Bariri matukiri pia bishku bishku abiaibũ dateyamakãwẽ.

Provérbios 3:25

Senhor Deuski mĩ txiti ika hatũ hawẽ pepawẽ mia inãkubaĩshanikiki, babui mĩ hawẽ dateyamanunã. Hanua hawara mesehaira huaitiã mia mekekĩ nemashuna ha mesẽ mia atxiama ishanikiki. Ha inũ, hunibu txakabu mibe hiweabu hatu kupikĩ yamawaya mĩ hawa dateama ikũkaĩshanaii.

Isaías 41:10

Dateyamakãwẽ, ẽ matubekirã. Dateyamakãwẽ. Earã, ẽ matũ Deuski. Matu merabewakĩ ẽ kushipa ẽ matu inãmiski. Ea kushipa binumamistũ matu tsumashũ hawa matu heneama ẽ matu mekekubainaii.

Isaías 41:14

Senhor Deusũ hawẽ hãtxa mestẽwãkĩ yuikĩ: “Jacó enabu Israelbuũ, ha mã tesheishtani mã babubiarã, hawa dateyamakãwẽ, ẽ matu merabewairã. Earã, Israelĩ Deus meribirã, ẽ matũ piskumanikaki.

Isaías 54:13

Hanushũ eanã, mĩ bakebu dasibi ẽ tapĩmashanaii. Habu dasibirã, benimai hawẽruai unanuma hiweshãkanikiki.

Isaías 55:12

Nenu Babilônia anu mã Israelbu benibu ana matũ mae anu txĩtũbaini benimabaini bui matũ mai pakea anu unanuma mã hikishãkanaii. Mã haskabainaibu matu uĩtã mati matipa inũ mawa tibi matuwẽ benimai kãtaibũ ni shukuabũ matu uĩtã matuwẽri benimakĩ mekẽ paush paush akai keskai bubi bubi ishãkanikiki.

Isaías 9:6

Hamẽ betsarã, Deusũ hawẽ kushipawẽ dasibi betsa wakĩ bakeishta nuku inãshanikiki. Ha bake nuku anu yunua kaĩshanikiki. Hatũ kushipa bitã shanẽ ibuhairashanikiki. Hawẽ kena tibi inãkinã, eska washanikiki: Hawẽ yubakani nũ haskashanai unãmanika pehairaki. Deus kushipahaira tsuã binutirumaki. Epa hiweibi hiweaki. Hawẽ taea Deusbe unanuma hiwetiki.

Jeremias 1:8

Haska ẽ mia yunuaiwẽ taearã, tsuki dateyamakũkaĩshãwẽ. Eanã, mia mekei mibe kakĩ ẽ mia merabewashanaii. Ea Senhor Deusũ txanima ẽ hãtxa ẽ mia inaiĩ”, iwanã,

Ezequiel 2:6

Mia mĩ hunirã, habuki dateyamashãwẽ. Ẽ hãtxa mĩ hatu yuibia haburã, eskabũ mia atxia mĩ hiweshanaii. Mushã mia yabubauna keska inũ nibube mĩ hiwea keskashanaiwẽ taea hatuki mesei dateyamashãwẽ. Haburã, nĩkatirubuma sinatahairabuki. Haskawẽ taea habũ hawara yuikĩ mia datetirubuwẽ e iki dateyamashãwẽ.

Daniel 4:1

Bari betsatiã dasibibũ hau tapĩshanũbũ Nabucodonosorĩ hatu banabimakĩ yuikĩ: “Yurabu dasibi inũ shukuabu betsa betsapa tibi inũ, hãtxa betsa betsapawẽ hãtxamisbu mai hirabi anu hiwebaunabu hawa nuitapama unanuma mã hiwekubaĩshanũbũ ea ẽ shanẽ ibuhaira Nabucodonosorĩ matukiri ẽ shinaiĩ.

Daniel 6:25

hanushũ yurabu dasibi inũ nawa shukuabu betsa betsapa tibi inũ hãtxa betsa betsapawẽ hãtxamisbu mai hirabi anu hawẽ yunuti hãtxa hatu bumakĩ shanẽ ibuhaira Dariõ hatu kenemakĩ yuikĩ: “Hawa nuitapama unanuma hiwei mã mabuyakũkaĩshanũ haska ẽ matukiri shinaiĩ.

Números 6:26

Senhor Deusũ mã hawẽ haibu txakabuma keska matu betxipaikĩ hau uĩ pewakĩ matu unanuma hiwemakubaĩshanũwẽ’,

Mateus 10:26

ana nuku yuikĩ: —Habũ matu itxakawaiburã, hawara habu beparametã hune akubaĩmisburã, Deusũ dasibi shabakabi hatu uĩmashanaiwẽ taea hatuki dateyamashãkãwẽ.

Lucas 1:79

Yurabu hatũ txakabuwẽ taea atimapanu mawai benui bupanãbũ mexu tẽ ikai anua bĩ txasha watã nuku inã keska wakĩ nũ habu hiweyuabu nũ hawẽ unãnuma hiwei kai nuku yusĩshanikiki”, inikẽ

Lucas 10:5

Ha inũ, mae anu hikitã tsuanura hiweyukatsi iki hatũ hiwe anu hikitã hatu yuikĩ: “Deusũ hau matu unãnuma hiwemakubainũwẽ”, hatu ashãkãwẽ.

Lucas 12:4

ana betsa haki txiti ikabu yuikĩ: —Ẽ haibuaibuũ, ana matu yuinũ nĩkakãwẽ. Tsuabũra matũ yura besti tenãtirubuwẽ dateyamakãwẽ, tenãshũ matu ana itxakawapaketirubumakirã.

Lucas 2:14

“Mai anushũ tsuabũra habũ Deus txibãkĩ duawamisbu Deus kuxipahairatũ hau hatu unãnuma hiwemanũwẽ. Haskakẽ dasibibũ Deus kuxipa nai anua hau kẽwãrianũbũwẽ”, hatu watã

João 14:1

nukuri Jesusũ yuikĩ: —Na haska ẽ txaniayarã, huĩti meteshei dateyamakãwẽ. Deus ikũwãkĩ eari ikũwãkãwẽ.

João 16:33

Ea haibuwai eki dasia mã dateama unãnuma hiweshanũ na hãtxa ẽ matu yuishuki. Mai anushũ ea ikũwãbumã matu itxakawariaibũ dateyamashãkãwẽ, ẽ ma hatu maemakĩ binuniwẽ taearã— nuku watã

João 20:19

habias domingo mexu merã Tomé nukubemakẽ hiwe merã itxatã judeu shanẽ ibubuki datekĩ beputi nũ beshekĩ keyukẽ Jesus hikikaĩ damituxitã nuku naxui ika nishũ nuku hãtxa wakĩ: —Haska mã unãnumamẽ? Ma ẽ huai dateyamakãwẽ— nuku watã

João 20:21

ana nuku yuikĩ: —Haska mã unãnumamẽ? Ẽ matu hushuãki. Datetima kuxipa ẽ matu baxishunaii. Haska inũ, haska ẽ Epa Deusũ ea nitxĩkĩ yununi keska wakĩ ẽ matu nitxĩkĩ yunuriaii— iwanã,

João 20:26

ana oito dia kaya Tomébe itxashũ ana nũ shui bepukĩ keyukẽ Jesus ana hikitã nuku bebũ damia naxui ika nishũ yuikĩ: —Haska mã unãnumamẽ? Ana ẽ huai ewẽ dateyamakãwẽ— iwanã,

Hechos 10:36

Hamẽ dasibibũ Shanẽ Ibu Jesus Cristõnã, Israelbu anu dukũ hau habu yusĩnũ Deusũ yununiki. Hanushũ tsuabũra hawẽ hãtxawẽ unãnuma hiwetirubukiri Jesus hushũ hatu yusĩkubaĩyamaki.

Hechos 18:9

Hanua mexu betsatiã Paulo usha namaya Jesusũ yuikĩ: —Datei hãtxa neseama ekiri ẽ kakape yusĩkĩ heneyamawe.

Romanos 15:13

Haska hakiri kenenibu keska wakĩ mã Jesus ikũwaĩbu Deusũ hawẽ Yushĩ Pepatũ kuxipawẽ unãnuma matu hiwemakĩ benimawaya hawa txikixama hawẽ matu duawashanai pepa manakakubaĩkãwẽ.

Romanos 5:1

Hawẽ hãtxa nũ ikũwaĩwẽ taeshũ Deusũ nuku pepa wakĩ xinãkubainikiki. Nukũ Shanẽ Ibu Jesus Cristõ Deusbe nuku haibunamemaya unãnuma hiwei nũ benimakũkainaii.

Romanos 5:10

Haska inũ, Deus dasibi yurabuki sinataya nũ habe haibunameriamabiakẽ hawẽ Epa daewakĩ nukũ kupiti nuku bishuĩ Cristo nuku mawashũkĩ nukũ txakabu bua keyukĩ ana xinãtima watã pepa keskabu nuku waniki. Hawẽ bake hiwekũkaĩkĩ txanima nuku mekeshanikiki, nũ ma Deusũ haibuaibukenã.

Romanos 8:6

Haska inũ, hawara txakabũ nuku amakatsis ikai nukũ huĩti babukĩ tsuabũra ha besti txibãkubaĩmisburã, hawẽ mawatã Deusbe hiweama ishãkanikiki. Hakia tsuabũra Deusũ Yushĩ Pepatũ bai txibaĩ unãnumati hawẽ nũ hiwenũ ikai ha besti xinaĩbu nuku duawakĩ hawama unãnuma nukũ hiwea nuku inãkubainikiki.

1 Coríntios 1:3

Nukũ Epa Deus inũ nukũ Shanẽ Ibu Jesus Cristõ hau matu unãnuma hiwemakĩ pewakĩ duawakubainũbũwẽ.

Gálatas 1:3

Ẽ kene uĩtã mã haskaya mã unãnuma hiweaibũ Epa Deus inũ nukũ Shanẽ Ibu Jesus Cristo matuwẽ nuikĩ hatũ pepawẽ hau matu duawakubainũbũwẽ.

Gálatas 5:22

Hamẽ betsarã, heshe pepa banabu pepa hukũmis keskai tsuabura Deusũ Yushĩ Pepatũ mekeshũ amakĩ hatu pe hiwemabainairã, eska shabakabi hatu anua tashnimiski, abunamei hawenabuwẽ nuirã, benimakĩ Deus kẽwaĩnã, unãnuma hiwea tsuki sinatamarã, hĩ hĩ ikama hawara teneirã, hatu txikixwabu kũyã akamarã, hatu duawairã, yauxiama hawara pepa hatu inãkubainirã, hawara yubakashũ kaneama akirã,

Gálatas 6:16

Haska ẽ matu yuiai keska xinã betsa watã Jesus besti ikũwaĩ mã hawẽ dasibi hiweaibu txanima mã Deusunabu kayabiki. Hanua Deus matuwẽ nuikĩ hau unãnuma matu hiwemariakubainũwẽ.

Filipenses 4:7

Mã haska waibu Deusũ unãnuma matu hiwemakĩ haska tsuã xinãkĩ nĩkatirumawẽ Deusũ hawẽ unãnumawẽ matũ huĩti inũ matũ xinã mekekubaĩshanikiki, Jesus Cristo nĩkakĩ mã txibaĩwẽ taeshunã.

Colosenses 1:2

tsuabura Colossos mae ewapa anuabu Deusũ hawenabu meribi matu wani mã nukubetã Cristo ikũwaĩ mã txĩtuĩsmakẽ habetã ẽ hãtxa ẽ matu bumai uĩrakãwẽ. Nukũ Epa Deusũ hau matu unãnuma hiwemakĩ duawakĩ hau matu xinã txãkãwãkubainũwẽ.

Colosenses 1:20

Haska inũ, Jesus cruzkia mawai hawẽ himi nuku habashuniwẽ taeshũ nukũ txakabu Deusũ buashũ hakimakĩ nuku hakimawatã ana nukuki sinatakatsi ikama Deus nuku daewamakĩ hawẽ haibuaibu nuku wamatã hiweabu mai hirabi anu inũ nai anu Cristoki dasitã hanus nuku shukuwakatsi Deusũ hatu dasibi pewakĩ keyukĩ daewanikiaki, yurabu inũ yurabumarã.

Colosenses 3:15

Hakia Cristõ unãnuma matu hiwemayarã, ha matũ huĩti uke merã shanẽ ibu wamakãwẽ. Matu haska wakatsi ikĩ Deusũ ma matu katunishũ habias yura matu wakatsis ikikiki. Dasibi ma hatũ matu ashuni xinãkĩ kẽwãkubaĩkãwẽ.

2 Tesalonicenses 3:16

Nukũ Shanẽ Ibũ hamebi hawenabu unãnuma hiwemakubaĩmistũ maturi unãnuma hiwemakĩ hawara bari tibi betsa betsapa mã akai hau matu uĩrakubainũwẽ.

2 Timóteo 1:7

Deusũ hawẽ Yushĩ nuku inãkĩ yushĩ babu dateti nuku inãma iniki. Hakia hawẽ Yushĩ kuxipa pepa inũ hawẽ abui nuinameti inũ hawẽ nukũmebi nũ pepakĩ xinãtiru nuku inãniki.

Hebreus 13:20

Nukũ Shanẽ Ibu Jesusũ himiwẽ Deusũ yuba bena ikibi ika ma pewani hawẽ bake txashuwã mekenika pepa keska nukũ mekenã bestẽwanitũ unãnuma hawẽ kuxipawẽ nuku hiwemakubaĩkatsis ikikiki.

Hebreus 7:2

Haska washunaya Abraãonẽ hawenabu yunua nawabũ mabu mebĩxina pashkakĩ mãtxĩ mekẽ dabeti wabu Melquisedeque duawakĩ kẽwãkĩ mabu mãtxĩ bestitxai Abraãonẽ inãkuĩnikiaki. Hamẽ betsarã, Melquisedeque hawẽ kena maewarã, shanẽ ibu xinã pepaki. Ha inũ, hawẽ kena betsa Salém shanẽ ibu maewarã, hawenabu unãnuma hiwetanika shanẽ ibuki.

Apocalipse 1:4

Mã Jesus txibaĩbu ha sete yusĩnanaĩ itxamisbu tibi Ásia mai pakeanuabuũ, ẽ Joãonẽ, ẽ matu kene bumai nĩkairakãwẽ. Ha ini inũ, ikũkainai inũ, ana hushanaitũ, nukũ Deusunã, hau matu duawakĩ hawẽ pepa matu inãkĩ unãnuma matu hiwemakubainũwẽ. Habiaskari wakĩ ha sete yushĩ pepa hawẽ shanẽ ibu tsauti bebũ mapuabu hau habũ habiaskari matu wanũbũwẽ.

Apocalipse 2:10

Matu bika memashanaibuwẽ taea dateyamakãwẽ. Eska wakĩ diabõ bestibu matu hatu atximatã bitxiti hiwe anu matu bitximashanikiki. Haska wakĩ dasibi mã ea ikũwaĩbu matu bika tenemaibu hawẽ matu unãti wakeakeshãkanikiki. Haskawẽ taea dez dia besti haska matu tenemaibuwẽ taea txĩtũyamashãkãwẽ. Matu itxakawakĩ matu tenãbiaibũ tenekubaĩshãkãwẽ. Matu haska waibuwẽ taeshunã, eãnã, matũ manakuti inãkinã, hiwea kayabi ẽ matu inãshanaii.

Apocalipse 21:8

Hakia hamẽ ekiri hãtxabiai eki dakemis inũ, eki petxia hawa xinaĩsbuma inũ, yura betsabe danãnanãmisbu inũ, yura betsa tenãmisbu inũ, txutanamebaũmisbu inũ, mukayakĩ Satanásã kuxipa yukamisbu inũ, yushĩ dami betsa kẽwãmisbu inũ, txani txakabaũmisbu habu dasibi ẽ kupia hanu buirã, ha iã hanu enxofre menui here hi hi ikai anu ha hatũ dabeki mawa meshãkanikiki”, ea wa ẽ matu keneshunaii.