Isaías 45:8 - Kaxinawá Bíblia (BR)

⁸ Senhor Deusũ ana yuikĩ: “Hamapai tibi ẽ maemati kushipawenã, nai anushũ eã ẽ yunumiski, eska keska tibirã, nai anu basnũ kurumayai inũ nai kuĩ anua ui haya wakinã. Habu tibirã, maĩ tsu amis keska wakĩ meketi pepa inũ yunuti pepa ẽ kaĩmamiski, yunu huatã bimimis keska wakinã.

Isaías 45:8 Referencias Cruzadas

2 Reis 19:25

Hakia mĩ haska hatu wamaimarã, ẽ Senhor Deus ma bebũkiri yubakanishũ ẽ mia amaima mĩ unãmamẽ? Nenumahaira mĩ shenipabutiã ẽ hatukiri yubakani natiã miã mĩ hatu akubainimaki. Maewã mishki kenebaunibu betsa betsapa txakabuwakĩ dasibi teke teke akĩ hanus mishki mãtxiã keska mĩ hatu yamawakubainimaki.

Isaías 11:1

Jessé enabu Assíria nawabũ hatu itxakawakinã, hi derakĩ hatu hawẽ buru keska besti wanibuki. Hakia ha hi buru anua ana takushanikiki. Hawẽ tatxa anua hawẽ tapũ betsa hukũmis keskai huni betsa ana kaĩshanikiki.

Isaías 32:15

Senhor Deus dasibi damiwanikatũ hawẽ kushipa ana nuku anu yunua huaya hanu hawa mibã hayamabiakẽ betsa maewakĩ mai anu dayati pepa wakĩ hanu mibã pepa benemis anu ana bimihairati hayashanikiki.

Isaías 44:24

Matũ mebikinanika Senhor Deusuũ, mã kaĩriama matũ yura yumewanitũ matu yuikĩ: “Earã, ẽ Senhor Deusũ dasibi dami wakĩ nai hirabi kesukauana wakĩ inũ mai dikabi tashnimatã ẽ mestẽwaniki, tsuã ea hawa merabewamarã.

Isaías 44:3

Mã haskawẽ taeshũ hanu tsua hiweabumanu mai hawa beneisma anu pashku wakĩ ẽ ũpash tuea habashanikiki. Matũ bababu pepawẽ duawakĩ hiwea bena inãkĩ ẽ hatu yunushanaii.

Isaías 46:13

Eã ẽ matu tashnimabirãshanairã, ma kemaikiki. Mekekĩ hawairakirã ẽ matu piskumashanai ma txaimaikiki. Sião mekea haya wakinã, eã ẽ ashanaii. Haska watã Israelbu ẽ kushipa ẽ hatu anu buteshanaii”, itã,

Isaías 53:2

Mai tsusĩhaira anu mibã tatxa uke merãhaira ka hawẽ pei benei pekaũmis keskai Senhor Deusũ hawẽ tsuma yumeai uĩkatsis ikikiki. Hawẽ yurarã, hawa hawẽruakĩ hatu hawẽ kemumakĩ betxipaimatiruma ishanikiki.

Isaías 60:21

Dasibi matunaburã, huni duapa pepabu besti ishãkanikiki. Matũ mai pakea mã ana bishanairã, matuna inũbarikiki. Mibã meshtetã eã ẽ matu banani keska hawẽ kataku hukũmis keska mã ishanaii. Ẽ kushipa uĩtã hau ea duawashanũbũ ẽ mekẽnẽ ẽ dayamis keska ẽ matu pepa wamis uĩshãkanikiki.

Isaías 61:11

Haska mibã mai anua hukuĩ peshei taemis keska inũ bai watã hawara heshe betsa banashinabu peshetã hukuĩ ewamiski. Haska keskari wakĩ Senhor Deusũ hawẽ kushipawẽ hawenabu hatu binumakĩ dasibi nawa shukuabu hatu kãtamakĩ kẽwãmashanikiki.

Isaías 61:3

Sião anu bika tenei hiweaburã, ana txi mapu hatu mapu tukumama maiti hawẽrua inãkĩ hatu sawematãwẽ. Nui kashatxakayamisbu hatu nese watã benimati sheni ininipa hatu inãtãwẽ. Tsuabura hawawẽ haskatima merabewakĩ benimawakĩ kãtati shinã txãkãti hatu yusĩtãwẽ. Mĩ hatu haska wa yurabũ hatu kenakĩ: ‘Ha hi kushipa tekeisma Senhor Deusũ bananishũ hawẽ kushipa hatu unãmati hiki’, akĩ hatu kenashãkanikiki.

Joel 3:18

Ha shaba haskaitianã, ui ikaya mati anua hene hababirãmis keskai uva vinho inũ ina awa txutxu itxapa hamẽ ikai mã hayashanaii. Judá enabũ mai pakea anua pashku tibi ũpash mirimahaira hayariashanikiki. Ha inũ, ẽ kẽwãti Templo anua txatxa ũpash tuetã pashku Sitim napaku anu habapakeshanikiki, mai dasibi pepa metxa wakinã.

Hechos 2:33

Hanushũ ana bestẽwãtã Deus hau habe shanẽ ibunũ, iwanã, hawẽ yusiuri tsaũtã haska yubakani hawẽ Yushĩ Pepa hawẽ Epã Jesus inã hatũ nuku inãkeakekĩ nuku kuxipa waikiki, na habia nĩkakĩ mã uĩanã.

Efésios 2:10

Deusũ haska nukukiri xinãkĩ hatũ nuku damiwakinã, hawẽ bake Jesus Cristoki dasitã hawenabũ hawẽ daya pepa inũ hawẽ bai pepa txibãkĩ ashuĩ nũ hiweyukubaĩshanũbũ Deusũ bebũkiri nuku katukĩ pewaniki.

Efésios 4:24

Matũ hiwea bena tari bena sawea keskakĩ matũ yushĩ bena wakĩ Deusũ matu damiwani hawẽ Yushĩ keskarikãwẽ. Haska txakabu pashkatã meribikũkaini mã hiwea pepaswẽ txanima hãtxa besti txibãkubaĩshanaii.