Isaías 42:3 - Kaxinawá Bíblia (BR)

³ Txanimahaira hawẽ yunuti kushipawẽ txakabu maemakĩ binuriama yurabuwẽ nuikĩ tawa yushtu puaka keskabu huĩti babubiabũ hatu danãma ishanikiki, bĩ pahi ibubis nukabiaya nukawama keska wakinã.

Isaías 42:3 Referencias Cruzadas

Isaías 2:4

Hanushũ nawa shukua tibi Senhor Deusũ unãti wakubaĩshanikiki, ha yurabu itxapahairabu hawawẽra ha imisbu haratura pepa inũ haratubũra kaneaibu unãtã hatu pewakinã. Hatu haska wa hanua habu maei betsairã, hatũ nupe kenu txaipabu betsa wakĩ hawẽ mai tsispubirãti washãkanikiki. Ha inũ, hatũ txatxiti betsa wakĩ teshki matxatu washãkanikiki. Ha haskaibutianã, ha yurabu ana hatũ detenameti mabu betsawẽ ana tsuabe detenameama ishãkanikiki. Ha inũ, detenametikiri ana tsuã hatu yusiãma ishanikiki.

Isaías 40:11

Txashuwã mekenikatũ hawẽ txashuwã shukua hatu mekemis keska wakĩ txashuwã bake bitã hawẽ shutxi anu ikubaĩkĩ inũ dama kaĩ benabu meke pewamisbu keska wanũ ika ma huikiki, nukũ Shanẽ Iburã.

Isaías 42:2

Hawẽ hui kushipawẽ hawa hãtxama unãshubira hãtxai hawẽ hãtxa kaiaĩ bis bis ikamakẽ bai namaki mapushũ nĩkama ishãkanikiki.

Isaías 50:4

Habu nuitapai punu nukabu ea Isaíasĩ ẽ hatu merabewakĩ benimawashanũ Senhor Deusũ ea unanepa watã ea yununiki. Ẽ shabakabi pe nĩkakubainũ merabewakĩ shaba tibi Deusũ ea pe yusĩkubaĩmiski.

Isaías 63:1

Isaíasĩ Deus yukakĩ: —Ha hawẽ tari tashipaki pukuima keska tari hawẽruahaira sawea bai tanabirani kushitxakayamakirani Edomnẽ mae ewapa Bozra anua huairã, tsua hui ikimẽkaĩ?— ẽ aka Deusũ ea kemakĩ: —Habia ea Israelĩ Deus ẽ hui kaii, matuki sinatamisbu matu maemashũtã ẽ kushipawẽ ẽ matu piskumashina matuki txani huirã— aka

Isaías 66:2

Dasibi betsa betsaparã, eã besti dami wakĩ ẽ keyuniki. Haska wakĩ ẽ taewa hayai hiwenibuki. Eã hunibu uĩkĩ merabewakinã, habu keĩsbuma inũ hatũ txakabu henetã ẽ hãtxaki mesekĩ nĩkamisbu ẽ hatu amiski, ikĩ ea Senhor Deusũ ẽ hãtxa ẽ mestẽwaiĩ”, iniki.

Isaías 9:7

Ha yumetã tsauirã, Davi shanẽ ibuni anu tsaushanikiki. Shanẽ ibuhairakĩ hawẽ kushipawẽ mai hirabi anu shanẽ ibukĩ tsuma keyubaũshanikiki. Hawẽ unanuma hiweaibu keyuama inũ hawẽ yunuti kushipa keyuama ipakeshanikiki. Ha shanẽ ibuhairairã, mestẽ tsuã maewakĩ tsekatiruma habias ipakeshanikiki. Deus kushipahaira dasibi binua hawẽ nui pae tsuã nuka watirumatũ nuku haska washũshanikiki.

Miquéias 7:9

Kanekĩ txakabu wakĩ Senhor Deus ẽ pashkaima eki sinataya: “Enaki”, ishũ hawẽ sinata ẽ teneshũkubaĩshanaii. Ẽ haska wakubaĩmis unãti watã ea pepa wakĩ Senhor Deusũ ea hatu kupishũshanai ariamakẽ hĩ hĩ ikama ẽ manayukubainaii. Hatu maemakĩ ea uĩmakĩ hawẽ kushipa shabakabi Senhor Deusũ ẽ txakabu unãti wakĩ ea unãmashanikiki, bĩ dekua keska anu ea iyukinã.

Mateus 11:28

Tsuabũra shãkama ia inũ dayatxakayamai keskai mã punu nukaburã, ẽ matu huĩrukũmakĩ merabewanũ eanu bekãwẽ.

Mateus 12:20

Txakabu maemakĩ binuriama yurabuwẽ nuikĩ tawa yuxtu sẽkeama keska wakĩ huĩti babubu danãma ishanikiki, bĩ pahi ibubis nukabiai nukama keskarã.

João 20:27

Tomé habis yuikĩ: —Ikis ea uĩriwe. Ẽ mekẽ shui mewe. Mekẽ sanãbaĩ ẽ haxi shui misturiyuwe. Ana ikũwãbuma keskama ẽ hiwea ea ikũwãwẽ— aka

João 5:30

Jesusũ shanẽ ibubu hatu nĩkamakubaĩkĩ yuikĩ: —Earã, ibubis e iskaũ ẽ xinãnẽ ẽ ikamaki. Hakia haska ẽ Epa Deusũ ea yunuai besti nĩkatã ẽ akubainaii. Haska hawẽ pepa ea katumairã, ẽ haska xinaĩwẽ ẽ akama hakia haska ẽ Epã ea yununitũ abuai haska yunuaya unãti wakĩ ẽ ashũkubainaii, kaneamarã.

Apocalipse 19:11

Hanua nai bepemanaya shanẽ ibu hawẽ kena Txanima Hãtxa Kaneisma cavalo hushupaki katsauwa ẽ uĩshu matu yuinũ nĩkakãwẽ. Shanẽ Ibu pepatũ yurabu unãti wai hatube detenamẽnũ ika ikairã,