Isaías 2:2 - Kaxinawá Bíblia (BR)

² Hanu bari hawẽ henei ma kemaya ha mati anu Senhor Deus kẽwãti hiwe hayakẽ Deus hakiri hãtxakĩ mestẽwãshanikiki. Ha mati binua anushũ hakiri pe shinãkĩ mati tibi binua anu nawa shukua betsa betsapa beshãkanikiki.

Isaías 2:2 Referencias Cruzadas

Gênesis 49:1

hanushũ ana betsatiã Jacó hawẽ huni bake dasibi kenashũ hatu yuikĩ: “Ea anu itxakãwẽ. Mã haskanũbariai matu bebũkiri yuinũ ea nĩkai bekãwẽ”, hatu wa itxabu

Salmos 2:8

Mĩ ea ea akaya mai pakea hirabi anu dasibi hiweabu ẽ mia yunukĩ mina ẽ mia wamashanaii, hatũ Shanẽ Ibu kayabi mia wakinã.

Salmos 22:27

Senhor Deusrã, ha nukũ shanẽ ibu kayabiki. Mae pakea tibi hatu shanẽ ibushũmiski. Haskawẽ taeshũ mai hirabi anu hiwebaunabu yura betsa betsapa shukuabũ Senhor Deus shinãtã ha bebũ dãti ishũ hau kẽwaĩ beshanũbũwẽ.

Isaías 11:10

Ha haskaibutiã ha Jessé tatxa ha hawẽ tapũ betsa benetã yurabu shukua tibibu hatũ Deus hatu unãmati ishanikiki. Habũ hatũ shanẽ ibu benakinã, hawẽ mae pehaira txashakapaki nukunũ ishũ benabaũshãkanikiki.

Isaías 49:6

Deusũ yuikĩ: “Hau Jacó enabu shukua pakea tibi habu Israel teshenibu habu besti anu merabewakĩ ea anu mĩ hatu txĩtũmashanũ mĩ ẽ tsuma katushũ ẽ mia yunuama iniki. Hakia txaihaira mai pakea anu hiweriabu haska haburi mekekĩ piskumakĩ mĩ hatu yusĩbaũshanũ bĩ ewapa txasha keska ẽ mia yunuriaii”, ikaya

Isaías 60:3

ha uĩtã nawa shukuabu tibi matũ mekenã uĩ beshãkanikiki. Shanẽ ibuhairabũ matũ kushipa penai keska uinũ ika matu anu beshãkanikiki.

Jeremias 26:18

“Judá enabu anua Ezequias shanẽ ibuhairakĩ hatu yunukubainaitiã mae betsa Moresete anua yumeni Deusũ hãtxa yuishunika Miquéiasĩ Judá enabu Senhor Deus hãtxashũkĩ: Eska Senhor Deus kushipahaira dasibi binuatũ matu yuikiki. Nĩkakãwẽ: ‘Mati Sião betsairã, hanu dayati bai besti ishanikiki. Jerusalém tekei keyui di ika hanus hawẽ mishki mania ikũkaĩshanikiki. Templo mati anurã, txaka besti benei besheshanikiki’, hatu waya,

Jeremias 31:12

Mati Sião anu bei benimai Israelĩ enabu kãtakubirãshãkanikiki. Senhor Deusũ hatu merabewa shekiwã trigo itxapa inũ, uva vinho inũ, piti sheni itxapa inũ, txashuwã nami itxapa inũ, ina awa nami itxapa hayawẽ taea benimahairakubirãshãkanikiki. Bai mibã bana uiã txa amis keska Israelĩ enabu hatũ kushipa hawa ana benuama ikubaĩshãkanikiki.

Daniel 2:28

Habiaskabiakẽ Deus bestitxai nai anu hiweatũ hawara hunea unãmamiski. Haskanũbariai mĩ shanẽ ibuhairakẽ mia unãmashinaki. Mĩ usha namakĩ hawara mĩ uĩshina ẽ mia unãmaii.

Daniel 2:35

hawaira mane ferro inũ, mapu bawa inũ, mane bronze inũ, mane prata inũ, mane ouro ibubis tureke tureke iki mishpui keyushinaki, baritiã shekiwã trigo tsekatã manaũrishũ kata kata aka niwẽ hawẽ shaka sa abaĩkĩ txai bua hawa hawẽ shaka betsa dakama keskairã. Hakia mishkipã ha dami tu aka di iki mishpuaya hanubi ha mishki hawẽ shãtukũ ewakauani mati itamamatã dasibi mai hirabi atxi keyushinaki. Haska mĩ namashinaki, ha haskarã.

Daniel 2:45

Ha haska mishkiri yuiarã, mĩ uiãyã mati keyatapa anua mishki ewapa bestitxai tsuã meshte meshte akama ibubis tsekekirani mati anua taramekirãkĩ mane ferro inũ, mane bronze inũ, mapu bawa inũ, mane prata inũ, mane ouro haki tĩ ikĩ dasibi mishpu wakĩ keyua keskashanai mĩ shanẽ ibuhaira Deus kushipahairatũ mia unãkĩ mia uĩmashinaki, haska tashninũbariairã. Mĩ namashina txanimahairaki. Ha inũ, ẽ mia nĩkamakĩ yuiairã, txanimariki— aka

Malaquias 3:12

Matũ mai pakea hawẽruahairawẽ taeshũ uĩkĩ yurabu shukuabu tibi hiwebaunabũ matukiri yuikĩ: ‘Deusũ hatu benimawakĩ hatu duahairawakubainikiki’, akĩ matu yuikubaũshãkanikiki. Eska ea Senhor Deus kushipahaira dasibi binu keyuatũ ẽ matu yuiai nĩkakãwẽ”, itã,

Números 24:14

Haskakenã, ẽ maekiri ẽ ma kaii. Hakia ẽ kariama ha yurabu minabube haskakubaĩshanaibu mia yuinũ ea nĩkawe— iwanã,

Hechos 2:17

Deus txanii: ‘Ma bari hawẽ henei kaya ẽ Yushĩ Pepa yurabu anu ẽ hatu yunua hatuki dasikẽ matũ huni bakebu inũ matũ aĩbu bakebũ ekiri yusĩaĩbũ berunãbu usha keskashũ dami betsa betsapa uĩaĩbũ anibubu usha ekiri namariashãkanikiki.

2 Timóteo 3:1

Hanu Jesus Cristo ma ana hua kemaya bika betsa betsapa kaĩbirãshanairã, mĩ ma unaĩ uĩrakubaĩshãwẽ.

Hebreus 1:2

Haska wabiakubaĩkĩ hawẽ bake kuxipa watã mai hirabi dasibi damiwamanishũ dasibi ibu wamanishũ natiã hawẽ henekĩ hawẽ huni bake hãtxamakĩ Epa Deusũ hawẽ hãtxa nuku unãmaniki. Haskakiri matu ana yusĩnũ nĩkakãwẽ.

2 Pedro 3:3

Na haska dasibi ẽ matuki txaniai mã bebũkiri unãtirubuki. Txanima hanu bari hawẽ henei ma kemaya yurabu hiwe txakashũ ibubis txakabu xinãkĩ mã ikũwaĩbu matuki kashei ẽ hẽ ibiai

Apocalipse 11:15

Ha sete nai tsumabu hawẽ heneatũ trombeta txã akai ẽ nĩkaya nai anua hui kuxipawẽ habũ kẽwãkĩ yuikĩ: “Nukũ Shanẽ Ibu Deus inũ hawẽ bake Messias Jesus Cristo besti natiã mai hirabi anu ha besti shanẽ ibukĩ hatu mekekubaĩshanikiki, niti ikamarã”, ikaibũ

Apocalipse 20:4

Hanushũ habũ hatu unãti washanai haki tsaushũ unãti wati habũ hatũ kuxipa biaibu ẽ uĩshuki. Ha dikabi Deusũ yusĩa txibãkĩ txĩtuãma Jesuskiri yusĩkubainaibu habũ bushka teshteabu hatũ yushĩ ẽ uĩshuki. Habu ikirã, ha yuinaka mese atimapahaira inũ, hawẽ dami kẽwãbuma inũ, yuinaka mese atimapahairatũ enabu unãti habũ betũkuki inũ hatũ mekẽ petxiki hatũ kene netãmakĩ amama ikubainimabuki. Haskawẽ taea ana besteĩ benibaũ 1.000 ano Jesus Cristobe shanẽ ibushãkanikiki. Haskaibu ẽ uĩshuki,