1 Coríntios 9:24 - Kaxinawá Bíblia (BR)

²⁴ Hamẽ matuburã, beyusi itxapa kuxibaini hawairabainaibu bestitxaitũ hatu binutã maemamis mã unaiĩ. Ha bestitxaitũ hatu binukĩ keyutã hawara pe bimis keska wakĩ Jesus ikũwãtã duawakĩ nĩkahairai txĩtuãma ha besti txibãkubaĩkãwẽ, haska keskai matu tibi mã pe hiweawẽ taeshũ hau Deusũ matũ pepawẽ taeshũ matu manakushanunã.

Kashinawa : Diosun Jesúswen taexun yuba bena yiniki

²⁴ Jamen matubudan, beyusi ichapa kushibaini jawaidabainaibu bestichaitun jatu binutan maemamis man unaiin. Ja bestichaitun jatu binukin keyutan jawada pe bimis keska wakin Jesús ikunwantan duawakin ninkajaidai chintuanma ja besti chibankubainkanwen, jaska keskai matu tibi man pe jiweawen taexun jau Diosun matun pepawen taexun matu manakuxanunan.

1 Coríntios 9:24 Referencias Cruzadas

Salmos 19:5

hanua benimai kauãkĩ mai hirabi dũkekubaũmiski, huni aĩyaĩ kai hawẽ mae anua benimai kaĩkaĩmis keskairã, ha inũ, huni kushikaĩkĩ hatu maemanũ ika kushikaĩmis keskairã.

Romanos 6:16

Yura betsã yura betsa tsumawamakĩ inã hanushũ hawẽ shanẽ ibu ha besti hau dayashũkĩ hawẽ yunua besti ashũmisrã, mã unaiĩ. Hakia habiaskari wakĩ matũ txakabũ matu tsumawakẽ haskai ha txakabu txibaĩ mã hawẽ mawa kayabi mã benushanaii. Hakia haska binumakĩ Deus mã nĩkakĩ txibaĩ hawẽ haibuaibu matu wakĩ hiwekuĩmakĩ hawenabu matu washanikiki.

1 Coríntios 9:13

Ha inũ, Templo anushũ ha habu dayanikabũ yura betsabũ inãkuĩ Deus inaĩbu ha nami menushũkĩ hamapai betsa betsapa wakĩ habianushũri hatiri kuakĩ hatiri bikĩ hatũ piti dasibi bishũ hawenabu hatu pimamisbu mã unaiĩ.

1 Coríntios 9:26

Eã ẽ xinãnã, kuxikaĩkĩ ẽ binukatsis ikai keskaki. Beyus betsai detenamekĩ betsa maemanũ, iwanã, tsuãra mekenẽ kaneama detenamemisbu keska wakĩ eã Jesus txibãkubaĩkĩ

Gálatas 2:2

Haskakaini kairã, ẽ xinãnẽma Deusũ haska ea unãmaya ẽ kaniki. Jerusalém anu Jesusũ kuxipayabu yununikabube hatube besti itxatã haska hatumaki Jesuskiri kakape judeubumakiri kashũ ẽ hatu yusĩtãmis ẽ kanemismẽkaĩ ika datebetanã ẽ hatuki txaniniki, hau ea nĩkatã unãnũbunã.

Gálatas 5:7

Haskakẽ hãtxa kayabi mã nĩkahairakubainaya parãkĩ tsuabũ ha hãtxa txanima mã txibãyamanũbũ matu nemakubaĩkanimẽkaĩ?

Filipenses 2:16

matubunã, Deusũ kakape hiweakiri hãtxa hatu unãmakubaĩkãwẽ. Mã haskaya ea ẽ matu anu hamẽ dayai kama iniwẽ taea ea matuwẽ keĩ ẽ tse iki ẽ benimashanaii, hanu Cristo ana huaitianã.

Filipenses 3:12

Jesus besti txibãkatsis ibiai ẽ pepai keyuriama inũ ẽ tapĩ keyuriamariki. Hakia pepa besti ẽ ikũkaĩshanũ Jesus Cristõ ea abukĩ ea katuniwẽ taea hawẽ xinã txibaĩ pepatã haki nukukatsis iki heneama manai ẽ txĩtũkiranamaki.

Filipenses 3:14

Haska Jesus Cristowẽ nuku Deusũ yubani haska nai anua haki nukukĩ haria bishanũ ika nĩkamas Jesus ẽ dayashũkũkainaii.

Colosenses 2:18

Haskakẽ tsuabura pepa kayabitikiri xinaĩ keĩsbuma inũ, tsuabũra nai tsumabu kẽwãmisbu inũ, haskamabia usha namai keskakĩ hawara tashnikiranai shabakabi uĩ hatũ xinã merã keĩ xinã txãkãmisbuki. Haskamisbũ hau habũ matu txitekĩ dakewayamanũbũ uĩrakubaĩshãkãwẽ.

Hebreus 12:1

Haskakẽ nukunabũ habu dukũtũ Deusũ yubaka hãtxa ikũwãkĩ bika betsa betsapa hatu tenemakĩ memabu habuã hatũ xinã nuku uĩmakubainishũ natiã nuku uĩkanikiki. Xinanãkãwẽ. Nuku hatũ itimaska wai inũ hamapai txakabu tibitũ nuku beshetiru henetã beamabaĩkĩ hawara pepa Deusũ nuku yubamis ha xinaĩ kuxipai dayashũkĩ heneyamakubainãkãwẽ.

Santiago 1:12

Tsuabũra ikũwaĩ bika betsa betsapa tenebiai babuama binukubaĩmisbu Deus hatuwẽ benimakĩ hatu manakukĩ haska habũ Deus abumamisbu haskabu hatuki Deus yubakai hiwekuĩa hatuki tanani hatu hawẽ manakushanikiki, maiti sawemakĩ akawakinã.

Apocalipse 3:11

Ha inũ, matũ pepa hawẽ kupiti hau tsuã matu biãbaĩyamashanũ ẽ yusĩa xinãkĩ txibãkĩ heneyamakãwẽ, ẽ samama ana txĩtũkirãshanairã.