Gálatas 6:14 - Kashinawa : Diosun Jesúswen taexun yuba bena yiniki

^14-15 Janua tsuabunda jau Diosun ea duawanun, iwanan, jatun jina kubichi mextekinan jamen akanikiki. Jaska inun, tsuabunda mexteama jamendi ikanikiki. Jakia nukudan, Dios duawanun ika shinan betsa watan besti Dios nun benimawakubainaii. Jesús ea mawaxuniwen taexun shinan benawatan: “Mabu ichapa besti binun”, iwanan, ana en shinanmaken chakabun ea ana achiamadiki. Jaskaken keanma nukun Xanen Ibu Jesucristo ji cruzkia mawaxun jawada ea axunikidi besti yuikubainkin Dios en kenwaiin. En jawauma iniwen taea en jawa kentidumaki. Jakia Jesúswen taea besti en kentiduki.

Kaxinawá Bíblia (BR)

^14-15 Hanua tsuabũra hau Deusũ ea duawanũ, iwanã, hatũ hina kubitxi meshtekinã hamẽ akanikiki. Haska inũ, tsuabũra meshteama hamẽri ikanikiki. Hakia nukurã, Deus duawanũ ika xinã betsa watã besti Deus nũ benimawakubainaii. Jesus ea mawashuniwẽ taeshũ xinã benawatã: “Mabu itxapa besti binũ”, iwanã, ana ẽ xinãmakẽ txakabũ ea ana atxiamariki. Haskakẽ keãma nukũ Shanẽ Ibu Jesus Cristo hi cruzkia mawashũ hawara ea ashunikiri besti yuikubaĩkĩ Deus ẽ kẽwaiĩ. Ẽ hawauma iniwẽ taea ẽ hawa kẽtirumaki. Hakia Jesuswẽ taea besti ẽ kẽtiruki.

Gálatas 6:14 Referencias Cruzadas

Lucas 20:16

Bai ibu kaxun jatu kupidiakin dayakapabu jatu tenan keyutan januxun dayakapa betsabu jawen bai jatu yunuxanikiki— jatu wai ninkai e itan yuikin: —Jau jatu jaska wayamaxanunwen— ikaibu

Romanos 1:16

Tsuabunda Diosun kakape ninkatan ikunwainbu Diosun jabun chakabu buakin ana shinanma jawen kushipa paewen jawenabu jatu wamisxun mekepakexanikiki. Jaskawen taea ja dukun judio jatidibun ikunwankin taewanibuki. Januxun ja kachu judiobuma betsabundi ikunwandiakanikiki. Jaskaken Diosun kakape Jesucristokidi yuikin datan akin jawa jawen dakeama en jatu yusinkubainaii.

Romanos 6:2

ikin jaskakidi shinain janchatimajaidaki. Jakia tsuada ma mawa maiwabu ana chakabuwatidubuma keskakin Satanásan padanti jancha chibanma dasibi nun Jesucristo chibainbun nukun chakabu jenetan nun ana chakabuwen jiwekunkaintidubumaki.

Romanos 6:6

Ja dukun nun jawen jiwechakani xeni Cristobe cruzki netantan nun jabe mawani keskaki. Nun jaskaya nukun shinan xeni Diosun nuku betsa wamaken chakabun nuku bexetan jawen tsumawakin ana nuku yunutidumaki.

1 Coríntios 15:58

Jaskaken en betsabu inun en puibuun, jawada nukun Xanen Ibun matu yunua jeneama akin man jamen dayama man unainwen taea Jesús chibain chintuanma shinan betsa wama nukun Xanen Ibuki xukua pejaida dayakin apakekanwen.

1 Coríntios 2:2

Jesucristo cruzkia mawakin jawada nuku axuni man ninkakin ikunwanunbun ana jamapai miyui tibi betsa betsapakidi shinankatsi ikama Jesucristo bestikidi jas shinankin yusiin en matube jiwekunkainiki.

1 Coríntios 3:21

Jaskawen taea nun yudabu nun matun yusinan bestibiaken daketapakin nuku kenwain junibun tsumabu nuku wayamakanwen. Jamen Dios jawa yaushiama nukun nun matu medabewanun, iwanan, en Pablo inun, Apolos inun, Pedro inun, juni yusinanbu tibi nuku yununiki. Ja inun, man jiwea inun man mawabu inun na jabiatian inun badi betsa u unuatian dasibi inun mai jidabi Diosun matu yununi man jawen jiweadan, matunaki.

2 Coríntios 11:12

Diosun daya en amis keska jabun ea mawapaikin jau jawawenda kenyamanunbun jatu nemakin jaska matun pei bikin en matu ichakawaisma en jabiaska besti ikunkainxanaii.

Gálatas 1:4

Jaskaken nukun Epa Diosun jaska shinain keskawen nuku ikidan, natian jiweabun chakabujaida wakubainaibube jau nuku kupiyamaxanun jaskawen taea Jesucristo mawai jawen jiwea yaushiama nukun chakabu buanun ika iniki.

Gálatas 2:17

Jamen nuku ikidan, Moisin yusian chibain nun chakabu iyunibuki. Jaskawen taexun en mia yuiaidan, Cristonan, nuku chakabu amaismaki, chanimadan. Jaskaken nun pepakatsis ikin jatu unanti wamaidan, jau nuku unanti wanununbun Cristowen taea besti nun pepatidubuki.

Gálatas 2:19

Jaskaken Moisin keneni chibanjaidabiai eadan, jawen taeadan, en mawa keska iniki. Jaskawen taea Jesucristo mawaya en jabe cruzki dununi keskawen taea jatixunda en jiweawen Dios duawai en jiwexunyuaii.

Gálatas 2:20

Natian na en yudawen en jiweyuaidan, Diosun baken ea bechipai ewen taea mawanixun ea shinan betsa wamani ja ikunwain en jiweyuaii. Jaskawen taea eadan, en ana emebi yunui en jiweamaki. Jakia Cristo bestitun ea yunuai ewen jiweyuikiki.

Gálatas 3:21

Ja dukun Abraham Diosun yubani inun ana ja kachu Moisés yusinmanidan, ¿jaska ja dukun Abraham yuini Diosun betsa wakin nematidumen? Jaskamaki. Dios daewakin jawen nemati inun jawen yunuti jancha pe chibankubainkin tsuabunda jiwekuian bikeankanaii.

Gálatas 5:24

Jakia Jesucristo cruzki mastabu mawani keska wakin nun Jesús ikunwainbu nukun chakabu ichawatan Jesúsbe cruzki nuku mastaxunibu keskaki, ana chakabu nun meyamanunan.

Filipenses 3:18

Tsuabuda ichapa matube jiweabun jatun jiwea xeni jenekin betsa wakatsi ikama Cristo cruzki jatu mawaxuni shinanma jaki sinatai keska jiweabu jaskabukidi jawenchains en matu yuimiski. Natian jaska shinain kaxayabi ana jatukidi en matuki chaniaii.

Filipenses 3:3

Jaska nun yunu kayabiaibudan, nun nukuki, nun jabun Dios ken kayabi waibudan. Jesucriston ma nuku pewaxuniwen taexun Diosun Yushin Pepatun nuku kushipa wakin medabewaya jawada nukunmebi nukun yuda anua jina kubichi bemakisa nun mextemis keskawen nun kentidubumaki.

Colosenses 2:20

Tsuabunda Cristo man ma ikunwainbudan, man ma Cristobe mawani keskabuki. Jaskawen taexun na mai anuxun xanen ibukin jatun kushipawen beya betsa betsapa yunuaibun ana jabun matu tsumatidubumaki. Jaskabia ¿jaskai ikunwanbumabe jiwexun jabun matu yunuai ninkakin man chibankin jenediabumamen, jabu keskakinan?