2 Coríntios 13:11 - Kashinawa : Diosun Jesúswen taexun yuba bena yiniki

¹¹ En betsabu inun en puibuun, matu kenexunkin ma en keyuai ninkaidakanwen. Epa Diosun duawakin medabewakin unanuma matu jiwemakatsi ikaya matun juinti benimakin jawada Diosun matun jiwea matu pewamakatsis ikai adikanwen. Ja inun, punu nuka pesbudan, jau medabenankin matu benimawanunbun Dios jatu yukaxunkanwen. Man jaskai jiweabu Diosun matu bechipaikin matu unanuma jiwemai matube jiwekunkainxanikiki.

Kaxinawá Bíblia (BR)

¹¹ Ẽ betsabu inũ ẽ puibuũ, matu keneshũkĩ ma ẽ keyuai nĩkairakãwẽ. Epa Deusũ duawakĩ merabewakĩ unãnuma matu hiwemakatsi ikaya matũ huĩti benimakĩ hawara Deusũ matũ hiwea matu pewamakatsis ikai arikãwẽ. Ha inũ, punu nuka pesburã, hau merabenãkĩ matu benimawanũbũ Deus hatu yukashũkãwẽ. Mã haskai hiweabu Deusũ matu abukĩ matu unãnuma hiwemai matube hiwekũkaĩshanikiki.

2 Coríntios 13:11 Referencias Cruzadas

Mateus 5:48

Jaskaken matun Epa Dios pepa nuikipa keskai matudi pepai dasibibube nuidiakubainxankanwen— iwanan,

Marcos 10:49

Jesús niti itan junibu jatu yuikin: —Kenakanwen— jatu wa januxun juni bekun kenakin yuikin: —Mia kenaikiki. Shinan chankain benidikidanwen— akabu

Marcos 9:50

Tewedan, nami chaputima wati inun nami meketibia payukui keyumiski. Matubunan, Diosun jancha man unainbuwen taexun matunabu yusiin man tewe batawen meketi keskabuki. Jakia jaskai tewe jawen bata keyu bumis ana meketiduma keskama Diosun jancha ninkakin pewatan ea chibainbube medabenain unanuma jiwekubainxankanwen— jatu anikiaki.

Lucas 9:61

januxun betsandi Jesús yuikin: —Yusinaan, eandi en mia chibankatsi ¿ja dukun en jiweanua enabuki chaniyutanpa?— aka

João 17:23

Mia inun ea nun dasiniken jabubedi en dasiaya jabu yuda bestichai keska jau ixanunbun en mia jatu yukaxunaii. Jaskaibu mai jidabi anuabun jatu uinkin min ea yununi inun jaska wakin min ea bechipaimis jabudi min bechipaidiaidan, jabun unantidubuki— iwanan,

Hechos 15:29

Yushin dami betsa kenwankin nami inanmisbu ana piyamakubainxankanwen. Ja inun, yuinaka tenexabu piyamadiaxankanwen. Ja inun, yuinaka jimi ayamadiaxankanwen. Ja inun, ainyankinan, jaska Moisin nuku nemani ja chibandiakubainxankanwen. Jaska besti man mekeadan, jawa chakabuma man pe besti jiwexankanaii. Jau Diosun matu pe mekekubainunwen”, jatu waxuntan

Hechos 18:21

Pablon jatu yuikin: —Jerusalén anu jatube besiyutanun ika en kayuaii. Jakia Diosun ea ana yunua matuki en ana bayutiduki— iwanan, jatu yuibaini niwe xaxu ewapawen Éfeso anua Pablo inakaini

Hechos 23:30

Jakia tenanun ika jaki yubakaibu ninkatan ja juni jawaida mia anu en yunua iyukanikiki. Mian mekeyuwe. Jabu jaki sinataibu judiobu buxun jau jadixun chitenunbun mia anu en jatu yunudiaxanaii, jau jabun chiteai miandi min ninkaxanunan. En xanen ibu pepajaida Félixiin, jatiski, en janchadan”, axun jatu bumaya

Romanos 12:16

Ja inun, man jatubetan ikunwain jabube jiweadan, jatube ja ikama duanamei unanuma jiwekubainkanwen. Matunmebi keanmadan, jabun jawada jatun jamapai shinanma jakia jabu shinan pepa jaya keinsbumabe jaibunamekubainkanwen. Tsuanda shinain: “Ea besti unanepakin en pewamiski”, ikin jatu mesewakin dakewayamakubainkanwen.

Romanos 12:18

Ja inun, yuda betsabu duawanun, iwanan, dasibi pepa man akubaintidubu besti aki jatube unanuma jiwei pekatsis man ikaidan, dasibibu daewakubainkanwen.

Romanos 14:19

Jaskaken jawa chakabu ana piama medabenamekin ana jatu kushipa wakin unanuma jiweti benakubainankanwen.

Romanos 15:13

Jaska jakidi kenenibu keska wakin man Jesús ikunwainbu Diosun jawen Yushin Pepatun kushipawen unanuma matu jiwemakin benimawaya jawa chikishama jawen matu duawaxanai pepa manakakubainkanwen.

Romanos 15:33

Diosun jau matu unanuma jiwemanun jaska en matukidi shinaiin, jaskakidan.

Romanos 16:20

Man jaskai jiweawen taexun nukun Epa Diosun nuku unanuma jiwemamistun matu medabewaya man Satanás chitekin ja aka jawaida babutan matun mae anua kainkainxanikiki. Man jaska waya nukun Xanen Ibu Jesucriston jawen pepawen jau matu unanuma jiwemakubainunwen.

1 Coríntios 1:10

En betsabu inun en puibuun, nukun Xanen Ibu Jesucriston kushipawen en matu yunuai ninkakanwen. Matunmebi paxkanameama shinan betsa betsapa wama unanuma Jesús ikunwainbube jiwekubainkanwen.

2 Coríntios 1:4

Jamapai tibi mei nun bika teneaya Diosun nuku daewakin nuku benimawamiski. Nuku jaska wamiswen taexun Jesucristo ikunwain betsabu jawada mei bika tenei juinti nishmaibu Diosun ma nuku medabewamisken jatuwendi nuikin nun jatu benimawadiatidubuki.

2 Coríntios 13:9

Jaska inun, Diosun matun shinan kushipa waya jau niti ikama man pepaki nukununbun nun babubia benimakin Dios nun matu yuka jenexunama ikunkainaii.

Efésios 4:12

Jatu jaska wabainkin jawenabun jawen daya tibi jau axununbun jatu pewatan jatu yunubainiki, jau kushipanamei jaska Diosun bechipaiai jakidi ana tapin Criston yudai nun mestenepakubainunbunan.

Efésios 4:3

Ja Yushin Pepatun matu dasi waiwen taea unanuma jiwei ikunwain dasibibube putanameama jaskas jiwekubainkanwen.

Efésios 6:23

Nukun Epa Dios inun nukun Xanen Ibu Jesucristo man jabun ikunwainbu jaska tibi jabu jaya matu inan bikubainkanwen, ikunjaidawakinan, ikunwainbu betsabuwen nuikinan, unanuma jiwekunkainkinan.

Filipenses 1:27

Natian man jiweaidan, Diosun jawen bakekidi kakape unain jaska jiwekunkaintikidi benai na keska bestiwen jiwekubainkanwen. Jaska en matu uinkatsis ikai inun matu anu en kamaken matukidia matun kaka juai en matukidi ninkakatsis ikaii, jaska man chintuanma inun man ma dasi keyuxun bika tenebiai jeneama matun shinan kushipawen ikunwain man Jesucristo chibainbunan.

Filipenses 3:16

Nun ma jaska tapinmabudan, jaskas shinankin betsa wama chibankubainkin jeneyamanankanwen.

Filipenses 4:2

Evodia inun Sintiqueen, nukun Xanen Ibu ikunwain man nukun puibu matuwen nuikin en matu shinaiin. Nukun Xanen Ibu ebe man dayaxunbiamis man yuananandabeai en matu ninkaidan, jaskama menan daenamedikanwen, en matu yunuaidan.

Filipenses 4:4

Nukun Xanen Ibu ikunwainan, benimadikanwen. Ana jabias en matu yuaii. Jeneama benimadikanwen!

Filipenses 4:9

En jancha ninkakin ea uinkin jawada man tapini inun en matu yusinkubainima jeneama chibankubainkanwen, man jaskaibu nukun Epa Dios unanumatun matu jeneama medabewapakexanikikidan.

1 Tesalonicenses 4:1

En betsabu inun en puibuun, Jesúsun nuku yununi jawen yusian nun matu yusintanima man unainwen taexun kenewendi nun ana matu kenexunai uindakanwen. Jaska badi tibi Dios man benimawatidu nun matu yusinkubainima man akai keska wakin ana jabiasdi jeneama akubainxankanwen, iwanan, nun matu ana yunuaii.

1 Tesalonicenses 4:18

Jaskawen taea na yusian jancha ninkai ana jawa dateama shinan chankain jatube benimanamedikubainkanwen.

1 Tesalonicenses 5:16

Jaskakubaini benimai jeneyamakubainkanwen.

1 Tesalonicenses 5:23

Nukun Xanen Ibu Jesucristo juaitian dasibibu man tsua chakabuuma Dios jamebi unanuma jiweatun matu medibi pepajaidawakin matun jamapai chakabu putamakin matu mekekubainkatsi matun shinan inun matu yushin inun matun yuda jawa chakabuma jau matu pe bestiwakubainunwen.

2 Tesalonicenses 2:16

Januxun nukun Xanen Ibu Jesucristo jamebi inun nukun Epa Dios nukuwen nuikin bechipaikin nuku duawakin nuku shinan chankanwan niti ikama nai anu nun jatube jiwexanai manakamakin nuku yubaniki. Janua mestenwantan matun juinti shinan chankanwankin matu kushipa wai jeneama jamapai yuikin man akai pepas jau matu amakubainunbunwen.

2 Tesalonicenses 3:1

En betsabu inun en puibuun, nun ma matu kene keyuxunai uindakanwen. Jesúskidi kakape ninkaxun man shinan betsa waima keska wakin nanta manibaunabundi jabundi Jesúskidi kakape ninkatan jau jawaida shinan betsa watan Dios kenwandianunbun nun jatu yusinkubaunaya Diosbe janchakin kushipa nuku yukaxunkubainkanwen.

2 Tesalonicenses 3:16

Nukun Xanen Ibun jamebi jawenabu unanuma jiwemakubainmistun matudi unanuma jiwemakin jawada badi tibi betsa betsapa man akai jau matu uindakubainunwen.

2 Timóteo 2:22

Jaskawen taexun bedunanbu jamapai tibiwen kemumisbu keska jenetan janua ana jaska jiweama paxakunkainwen. Eska bestiwen jiweiti pepa benakubainwen, jawa chani chakama inun, Jesucristo ikunwain inun, nui bechipainamei inun, unanuma jiwei dasibu juinti xunpinbubetan nukun Xanen Ibu kenwankubainkinan.

Hebreus 12:14

Ja inun, tsuabuda dasibibube man unanuma jiwekatsis ikaidan, nuikipakin dasibi nukun Xanen Ibun yusian chibain pepa besti jiwekubainkanwen. Jamen man pepai jiweismadan, jaskatan nukun Xanen Ibuki dasitan man jiwetidubumaki.

Hebreus 13:20

Nukun Xanen Ibu Jesúsun jimiwen Diosun yuba bena ikibi ika ma pewani jawen bake chaxuwan mekenika pepa keska nukun mekenan bestenwanitun unanuma jawen kushipawen nuku jiwemakubainkatsis ikikiki.

Santiago 1:4

Jawada man teneai jawen Diosun matu kushipa wakin matu ewa wanun, iwanan, matu shinan nukumakatsis ikai jawen kushipai man ana jawawen bika tenetidumai ja jawen Diosun matu unanti wai jayai keyudikubainkanwen.

1 Pedro 3:11

Jamapai chakabuki jadi kemama jaskai unanumakin pe besti benakin jaska jau chibankubainkanwen.

1 Pedro 3:8

Jaska tibi en matuki chanixudan, jaska bestiwen jiwekin Jesús ikunwainbu tibibube jabias shinanwantan jatuki dasia binunananma pepai babu keskatan keanma bechipainamekubainkanwen.

1 Pedro 5:10

Ja dukunan, badi ichapama man nuitapayuaii. Diosun jaska matu memabiatan jabiatundi matu kushipa wakin paxkatima watan ja jawen mestenwantiwen matu pepa wakin keyuxanikiki. Jesucristobe nun jaki dasitan jiwea ikibi iki nun pepai kushipaxanunbun jabias Dios nuikipatun jawena wakatsi ikin nuku katuniki.

Apocalipse 22:21

Nukun Xanen Ibu Jesucriston jau matu dasibi jawen pepawen duawakubainxanunwen. Ea uinmakubidanxu en jancha chanimadan, jatiski. Juan