ПСАЛТЫР 86 - Кнігі Святога Пісання - Біблія - Біблія — пераклад Чарняўскага (выданне 2017 года) Кнігі Святога Пісання - Біблія - Біблія — пераклад Чарняўскага (выданне 2017 года)
ПСАЛТЫР 86

¹ Просьба. Давідаў. Нахіні, Госпадзе, вуха Тваё і выслухай мяне, бо ўбогі я і бедны.

² Сцеражы душу маю, бо я цнатлівы, збаў слугу Твайго, Божа мой, які ўскладае надзею на Цябе.

³ Злітуйся нада мной, Госпадзе, бо да Цябе ўсклікаў я цэлы дзень.

⁴ Узвесялі душу Твайго слугі, бо да Цябе, Госпадзе, узвысіў я душу маю.

⁵ Бо Ты ж, Госпадзе, добры і ласкавы, і вялікая міласэрнасць [Твая] да ўсіх, што прызываюць Цябе.

⁶ Успрымі вушамі, Госпадзе, малітву маю і звярні ўвагу на голас малення майго.

⁷ У дзень бяды маёй клічу я Цябе, бо ведаю, што Ты выслухаеш мяне.

⁸ Няма Табе, Госпадзе, роўнага між багоў і няма нічога [такога ж], як справы Твае.

⁹ Прыйдуць усе народы, якія Ты стварыў, і паклоняцца Табе, Госпадзе, і славіць будуць яны Тваё імя.

¹⁰ Бо вялікі Ты і творыш цуды. Ты толькі адзін Бог.

¹¹ Навучы мяне, Госпадзе, шляху Твайму, і буду хадзіць я ў праўдзе Тваёй; зрабі шчырым сэрца маё, каб шанавала яно імя Тваё.

¹² Буду вызнаваць Цябе, Госпадзе, усім сэрцам маім і буду вечна праслаўляць імя Тваё,

¹³ бо міласэрнасць Твая да мяне вялікая і вырваў Ты душу маю з пекла апраметнага.

¹⁴ Божа, пыхліўцы паўсталі супраць мяне, і зграя моцных шукае душу маю; і не паставілі яны Цябе перад сабою.

¹⁵ А Ты, Госпадзе, Бог міласэрны і літасцівы, і цярплівы, вялікай спагаднасці і праўды,

¹⁶ глянь на мяне і злітуйся нада мною, дай сілу Тваю слузе Твайму і збаў сына служанкі Сваёй.

¹⁷ Учыні са мною знак на дабро, каб убачылі тыя, што ненавідзяць мяне, і пасаромеліся, бо Ты, Госпадзе, дапамог мне і пацешыў мяне.