ПСАЛТЫР 85 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Кіраўніку хору. Сыноў Корэ. Псальм.

² Спагадным быў Ты, Госпадзе, у Тваёй зямлі, перавярнуў Ты паланенне Якубава.

³ Адпусціў Ты несправядлівасць народа Твайго, дараваў усе грахі іх.

⁴ Спыніў Ты ўвесь гнеў Твой, адступіўся ад абурэння раздражнёнасці Тваёй.

⁵ Навярні нас, Божа, збаўленне наша, і адвядзі гнеў Твой ад нас.

⁶ Ці ж вечна будзеш гневацца на нас, ці ж прадоўжыш гнеў Твой з пакалення ў пакаленне?

⁷ Няўжо Ты, навярнуўшы, не ажывіш нас і народ Твой не ўзвесяліцца з Табою?

⁸ Госпадзе, пакажы нам Тваю міласэрнасць і дай нам Тваё збаўленне.

⁹ Паслухаю, што кажа Госпад Бог, бо, напэўна, вясціць Ён мір народу Свайму, і святым Сваім, і тым, якія ўсім сэрцам навяртаюцца да Яго.

¹⁰ Сапраўды блізкае збаўленне Яго для тых, што шануюць Яго, каб пасялілася слава на зямлі нашай.

¹¹ Міласэрнасць і праўда спаткаюцца паміж сабою, справядлівасць і мір пацалуюцца.

¹² Вернасць узнікне з зямлі, а справядлівасць прагляне з неба.

¹³ Бо Госпад дасць добразычлівасць, а зямля наша дасць плод свой.

¹⁴ Справядлівасць пойдзе перад Ім, і паставіць на дарозе крокі свае.