ПСАЛТЫР 148 - Кнігі Святога Пісання - Біблія - Біблія — пераклад Чарняўскага (выданне 2017 года) Кнігі Святога Пісання - Біблія - Біблія — пераклад Чарняўскага (выданне 2017 года)
ПСАЛТЫР 148

¹ Алілуя. Хваліце Госпада з нябёсаў, хваліце Яго на вышынях.

² Хваліце Яго, усе анёлы Яго, хваліце Яго, усе магуцці Яго.

³ Хваліце Яго, сонца і месяц, хваліце Яго, усе зоркі бліскучыя.

⁴ Хваліце Яго, нябёсы нябёсаў, і ўсе воды, якія над небам.

⁵ Хваліце імя Госпада, бо загадаў Ён, і ўсё было створана;

⁶ устанавіў Ён гэта навечна і на векі вечныя, паклаў загад, і не зменіць [яго].

⁷ Хваліце Госпада з зямлі, марскія драконы і ўсе бяздонні,

⁸ агонь, град, снег, імгла, вецер навальнічны, які спаўняе слова Яго,

⁹ горы і ўсе ўзгоркі, дрэвы пладовыя і ўсе кедры,

¹⁰ дзікія звяры і ўсякая жывёла, паўзуны і птушкі крылатыя.

¹¹ Цары зямныя і ўсе народы, князі і ўсе суддзі зямлі,

¹² юнакі і дзяўчаты, старыя з падлеткамі

¹³ хай славяць імя Госпада, бо ўзвысілася імя аднаго Яго. Веліч Яго вышэй за неба і зямлю,

¹⁴ і ўзвысіў Ён рог народа Свайго. Песнь хвалы ўсім святым Яго, сынам Ізраэля, народа, які Яму блізкі. Алілуя.