ПСАЛТЫР 147 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Алілуя. Хваліце Госпада, бо Ён добры, спявайце псальмы Богу нашаму, бо Ён мілы, Яму належыць хвала.

² Госпад будуе Ерузалім, збірае расцярушаных з Ізраэля.

³ Ён лечыць зламаных духам і перавязвае іх раны;

⁴ Ён вызначае лік зорак і ўсім ім дае імёны.

⁵ Вялікі Госпад наш і вялікі магуццем, няма ліку мудрасці Яго.

⁶ Госпад падтрымлівае пакорлівых, а грэшнікаў прыніжае аж да зямлі.

⁷ Спявайце Госпаду песню падзякі, грайце псальмы Госпаду нашаму на цытры.

⁸ Ён закрывае неба хмарамі і ўдабрае зямлю дажджом, Ён вырошчвае траву на гарах і траву, карысную людзям.

⁹ Ён дае ежу жывёле Сваёй і вараняткам, якія прызываюць Яго.

¹⁰ Не захапляе Яго сіла каня, ані сіла ног чалавечых.

¹¹ Падабаюцца Госпаду тыя, што Яго шануюць, і тыя, што ўсклалі надзею на міласэрнасць Яго.

¹² Хвалі, Ерузалім, Госпада, выслаўляй Бога твайго, Сіён.

¹³ Бо Ён умацаваў засаўкі брамаў тваіх, дабраславіў сыноў тваіх у табе.

¹⁴ Ён усталёўвае супакой як межы твае і да сытасці корміць цябе пшаніцаю.

¹⁵ Пускае прырачэнне Сваё на зямлю, хутка ляціць Яго слова.

¹⁶ Ён дае снег, быццам воўну, іней, быццам попел, рассыпае.

¹⁷ Кідае градам Сваім, як крошкамі [хлеба]; хто ўтрывае перад сцюжаю Яго?

¹⁸ Пашле Ён слова Сваё, і растопіць іх; павее вецер Яго, і пацякуць воды.

¹⁹ Ён абвяшчае слова сваё Якубу, справядлівасці і загады Свае — Ізраэлю.

²⁰ Ніводнаму народу не зрабіў так, і не аб’явіў ім сваіх прысудаў. Алілуя.