ПСАЛТЫР 149 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Алілуя. Спявайце Госпаду песню новую, хвала Яму [гучыць] на зборы святых.

² Хай узвесяліцца Ізраэль з Тым, Хто стварыў яго, і сыны Сіёна хай узрадуюцца з Валадарствам сваім.

³ Хай хваляць імя Яго ў хоры, з бубнам і цытрай спяваюць псальмы Яму,

⁴ бо Госпад спагадны да народа Свайго і ўганаруе Ён пакорных збаўленнем.

⁵ Хай цешацца святыя славаю, хай весяляцца на ложах сваіх [застольных].

⁶ Праслаўленні Бога — у глотках іх, і мячы абасечныя — у руках іх,

⁷ каб учыніць помсту над паганамі, пакаранне над народамі,

⁸ каб у путы вязаць цароў, а князёў іх [вязаць] жалезнымі ланцугамі,

⁹ каб споўніўся на іх напісаны прысуд: гэта хвала ўсім святым Яго. Алілуя.