ПСАЛТЫР 25 - Біблія (пераклад В. Сёмухі) Біблія (пераклад В. Сёмухі)
ПСАЛТЫР 25

¹ Псальма Давідава. Рассудзі мяне, Госпадзе, бо хадзіў я ў беспахібнасьці маёй, і, у надзеі на Госпада не пахіснуся.

² Выпрабуй мяне, Госпадзе, растапі мне вантробы і сэрца маё,

³ бо міласьць Твая перад маімі вачыма, і ў праўдзе Тваёй я хадзіў,

⁴ не сядзеў я зь людзьмі аблуднымі і з падступнымі не пайду;

⁵ я зьненавідзеў зборню зламысьнікаў, і зь бязбожнікамі ня сяду;

⁶ буду мець у нявіннасьці рукі мае і абыходзіць Твой ахвярнік, Госпадзе,

⁷ каб абвяшчаць Табе голасна славу і пра ўсе цуды Твае расказаць.

⁸ Госпадзе! палюбіў я жытло Твайго дома і месца, дзе слава Твая жыве.

⁹ Не загубі душы мае з грэшнікамі і жыцьця майго з крыважэрнымі,

¹⁰ у чыіх руках ліхадзейства, і чыя правіца поўная зьдзірства.

¹¹ А я хаджу ў сваёй беззаганнасьці; вызвалі мяне, і ўмілажалься зь мяне.

¹² Нага мая стаіць на роўным; на сходах праслаўлю Госпада.