МАРКА 3 - Біблія (пераклад В. Сёмухі) Біблія (пераклад В. Сёмухі)
МАРКА 3

¹ І ўвайшоў зноў у сынагогу; там быў чалавек з высахлаю рукою.

² І сачылі за Ім, ці не ацаліць яго ў суботу, каб зьвінаваціць Яго.

³ А Ён кажа чалавеку з сухою рукою: стань пасярэдзіне.

⁴ А ім кажа: ці належыць у суботу дабро чыніць, альбо зло чыніць? душу ўратаваць, альбо загубіць? Але яны маўчалі.

⁵ І з гневам на іх паглядзеўшы, смуткуючы па ачарсьцьвеньні сэрцаў іхніх, кажа таму чалавеку: працягні руку тваю. Той працягнуў, і стала рука ягоная здаровая, як другая.

⁶ Фарысэі, выйшаўшы, адразу зладзілі зь ірадыянамі нараду супраць Яго, як бы загубіць Яго.

⁷ Але Ісус з вучнямі Сваімі адышоў да мора, і за Ім пайшло мноства людзей з Галілеі, Юдэі,

⁸ Ерусаліма, Ідума і з-за Ярдана. І з навакольляў Тыра і Сідона, пачуўшы, што Ён рабіў, ішлі да Яго ў вялікім мностве.

⁹ І сказаў вучням Сваім, каб напагатове была Яму лодка, з прычыны шматлюдзтва, каб ня ціснулі на Яго.

¹⁰ Бо многіх Ён ацаліў, так што тыя, хто быў хворы, кідаліся да Яго, каб дакрануцца да Яго.

¹¹ І духі нячыстыя, калі бачылі Яго, падалі перад Ім і крычалі: Ты - Сын Божы.

¹² Але Ён строга выгаворваў ім, каб не адкрывалі Яго.

¹³ Потым узышоў на гару і паклікаў да Сябе, каго Сам хацеў; і пайшлі да Яго.

¹⁴ І паставіў дванаццацёх, каб зь Ім былі і каб пасылаць іх зьвеставаць,

¹⁵ і каб мелі яны ўладу ацаляць ад хваробаў і выганяць дэманаў:

¹⁶ паставіў Сымона, даўшы яму імя Пётр;

¹⁷ Якава Зевядзеевага і Яна, брата Якаўлевага, даўшы ім імёны Воанергес, гэта азначае, «сыны громавыя»;

¹⁸ Андрэя, Піліпа, Барталамея, Мацьвея, Тамаша, Якава Алфеевага, Тадэя, Сымона Кананіта

¹⁹ і Юду Іскарыёцкага, які і выдаў Яго.

²⁰ Прыходзяць у дом; і зноў зьбіраецца люд, так што яны не маглі нават хлеба паесьці.

²¹ І пачуўшы, блізкія Ягоныя пайшлі забраць Яго, бо казалі, што Ён не ў сабе.

²² А кніжнікі, якія прыйшлі зь Ерусаліма, казалі, што Ён мае ў Сабе Вэльзэвула і што выганяе дэманаў сілаю дэманскага князя.

²³ І паклікаўшы іх, казаў ім прытчамі: як можа сатана выганяць сатану?

²⁴ Калі царства разьдзеліцца самое ў сабе, ня можа ўстояць царства тое;

²⁵ і калі дом разьдзеліцца сам у сабе, ня можа ўстояць дом той;

²⁶ і калі сатана паўстаў на самога сябе і разьдзяліўся, ня можа ўстояць, а настаў канец ягоны.

²⁷ Ніхто, увайшоўшы ў дом дужага, ня можа зрабаваць рэчаў ягоных, калі сьпярша ня зьвяжа дужага, - і тады зрабуе дом ягоны.

²⁸ Праўду кажу вам: дараваныя будуць сынам чалавечым усе грахі і блюзьнерствы, якімі б ні блюзьнерылі;

²⁹ але хто будзе блюзьнерыць на Духа Сьвятога, таму ня будзе дараваньня вавекі, а падлягае ён вечнай асудзе.

³⁰ Гэта сказаў Ён, бо казалі: у Ім нячысты дух.

³¹ І прыйшлі Маці і браты Ягоныя і, стоячы звонку, паслалі да Яго паклікаць Яго.

³² Каля Яго сядзеў люд. І сказалі Яму: вось, Маці Твая і браты Твае і сёстры Твае, вонкі, пытаюцца Цябе.

³³ І адказаў ім: хто Маці Мая і браты Мае?

³⁴ І азірнуўшы тых, што сядзелі вакол Яго, кажа: вось маці Мая і браты Мае;

³⁵ бо, хто будзе выконваць волю Божую, той Мне брат і сястра і маці.