ВЫСЛОЎІ 15 - Біблія (пераклад В. Сёмухі) Біблія (пераклад В. Сёмухі)
ВЫСЛОЎІ 15

¹ Лагодны адказ злагоджвае гнеў, а слова абразьлівае будзіць лютасьць.

² Язык мудрых нясе добрыя веды; а вусны неразумных вырыгаюць глупства.

³ Усюды вочы Гасподнія: яны бачаць ліхіх і добрых.

⁴ Лагодны язык - дрэва жыцьця, а неўтаймаваны - хвароба духу.

⁵ Неразумны пагарджае настаўленьнем бацькі свайго; а хто слухае засьцярогу, той у добрым розуме.

⁶ У доме ў праведніка - мноства скарбаў, а ў прыбытку ў бязбожнага - разлад.

⁷ Вусны мудрых пашыраюць веды, а сэрца немысьляў - не.

⁸ Ахвяра бязбожных - агідная Госпаду, а малітва праведных Яму даспадобы.

⁹ Агіда Госпаду - шях бязбожнага, а таго, хто ідзе шляхам праўды, Ён любіць.

¹⁰ Ліхая кара таму, хто скрывіць дарогу, і той, хто ненавідзіць засьцярогу, загіне.

¹¹ Апраметная і Авадон адчынены перад Госпадам, тым болей сэрцы сыноў чалавечых.

¹² Ня любіць распусьнік тых, што засьцерагаюць яго, і да мудрых ня пойдзе.

¹³ Вясёлае сэрца разьвесяляе твар, а пры сардэчным смутку дух маркоціцца.

¹⁴ Сэрца разумнага шукае ведаў, а вусны немысьляў кормяцца дурасьцю.

¹⁵ Усе дні ў няшчаснага смутныя; а ў каго сэрца вясёлае, таму заўсёды сьвята.

¹⁶ Лепей мець мала ў страху Гасподнім, чым вялікі скарб, і зь ім трывогу.

¹⁷ Лепей міска гародніны і зь ёю любоў, чым укормлены бык і зь ім нянавісьць.

¹⁸ Запальчывы чалавек абуджае разлад, а цярплівы суцішае свару.

¹⁹ Дарога ў гультая - як цярновы пляцень, а дарога ў праведных гладкая.

²⁰ Мудры сын радуе бацьку, а неразумны чалавек пагарджае маці сваёю.

²¹ Дурнота - радасьць недавумку, а чалавек разумны ідзе простаю дарогаю.

²² Бяз рады задумы разладзяцца, а пры мностве радцаў яны спраўдзяцца.

²³ Радасьць чалавеку ў адказе вуснаў ягоных, і як хораша слова ў свой час!

²⁴ Дарога жыцьця ў мудрага ўгору, каб ухіліцца ад апраметнай унізе.

²⁵ Дом пыхлівых зруйнуе Гасподзь, а мяжу ўдавы ўмацуе.

²⁶ Агіда Госпаду - намыслы ліхадзеяў, а словы беззаганных падабаюцца Яму.

²⁷ Карысьлівец разладзіць свой дом, а хто ненавідзіць хабар, будзе жыць.

²⁸ Сэрца праведнага абдумвае адказ, а вусны бязбожных вырыгаюць благое.

²⁹ Далёка Гасподзь ад бязбожных, а малітву праведных чуе.

³⁰ Прымружвае вочы свае, каб прыдумаць хітрыну; закусваючы сабе губы, учыняе зладзейства,

³¹ Вуха, уважлівае да навукі жыцьця, будзе жыць сярод мудрых.

³² Хто ня прымае настаўленьня, ня дбае пра душу сваю; а хто слухае засьцярогу, той набывае розум.

³³ Страх Гасподні вучыць мудрасьці, і славе папярэднічае пакора.